ایستدی قیلسون منوّر عالمی نورِ حسین
گلدی زهرادن ظهوره نور مستور حسین
امر اولوب بنت رسوله غیبیدن لعیا گله
حضرتِ صدّیقهء کبرایه اولسون قابله
نازل اولدی، نور پاکی، شوقیله آلدی اله
گوردی شمسه غالب ایلر نور مطهور حسین
دوشدی فورا تپراقا ال اوستن اول عالی وجود
قویدی آنّین سجدیه معبودینه قیلدی سجود
آشکار ایلردی اول دم جودینی، آثار جود
اولدی واضح ماسوایه وصف مذکور حسین
مصدر لاریبیدن اذن آلدی جِبریل اَمین
تا حسین نوریله قیلسون زینت عرشِ برین
آلدی قنداقین اله اول پیکِ ربّ العالمین
دایه لوق امریله چون اولموشدی مأمور حسین
گیتدی عرشه فرشیدن اول قاصد کوی وفا
ایستدی ویرسون حسین باشیله تا عرشه صفا
امر اولوب باشینداکی دستماله ایله اکتفا
روشن ایلر عرش و فرشی پرتو نور حسین
بیر باشیکه اولمادی راضی خدای ذوالجلال
عرشینه روحُ الامین ویرسین او باشیله جلال
بس نجه کسدی او باشی، شمر ایدوب پژمرده حال
نیزه لرده زینت اولدی رأس منحورِ حسین
ایسی قوملار اوسته قالدی پیکری فرد و وحید
ذکر ایدوب قران جدا باشیندا سلطان شهید
سینهء مکسوری اوسته آت چاپوب قومِ پلید
پایمال اولدی ستمله صدر مکسور حسین
دوتدی یوز نیزه باشیندا خیمیه شاه جهان
آیهء کهفی اوجا آوازیله ایتدی بیان
آگه اولدی بو صدادن زینب بیخانمان
آشکار ایتدی دلینده وِرد مذکور حسین
چیخدی اول دم خیملردن زینبِ علیا جناب
قتلگاهه یوز قویوب قیلدی بو نوعیله خطاب
قالدیلار باشسیز باجون ئولسون عیالِ بوتراب
دوره می آلدی مخالف یوخدی منصور حسین
خیملر یاندی داغیلدی چوللره آل رسول
ال آچوبلار غارته ظلمیله بو قوم جهول
قالموشام دشمن ایچنده گور نجه زار و ملول
آشنا یوخ نینوا دشتین دوتوب شورِ حسین
دستگیر ایتدی عیالون ظلمیله شمرِ شریر
زینبون بو درد و محنتدن اولوب عالمده سیر
یوز قویوب باشون دالنجه شامه تک گلّم اسیر
من اسیرم ظاهرا" وار دلده منظورِ حسین
- سه شنبه
- 9
- شهریور
- 1400
- ساعت
- 17:55
- نوشته شده توسط
- یوسف اکبری
- شاعر:
-
مرحوم روفه گر
ارسال دیدگاه