وعده ویروب پیمبره خلاق لایزال
اوز عهدینه وفا ایدر البته ذوالجلال
کهنه لم سون حبیبی حسینون مصیبتی
تجدید اولون سون ایل به ایل، ایام و ماه و سال
جدی اولوبدی علت غائی ممکنات
تا واجب الوجود، ظهوره ویره جلال
خلق ایتدی عالمی تانونا واجب الوجود
یوخ بحثه احتیاج، من الراد ما یقال
کنز خفی تانونماقینی سوودی احمدی
خلق ایتماقا مشیت علاقه دوتوب مآل
افلاک و عرش و فرش و مه و آفتاب، خلق
اولمازدی اولماسیدی ایکی میم و حا و دال
علت بودور پیمبر اکرم دیردی چوخ
بیز اولماسیدوق اولمازیدی عبد لایزال
بو شوکت و شرافت پیمبره سبب
اوغلی حسیندی، عرض ایدرم شاهد مقال
توحید گلشننده پیمبردی باغبان
اسلام دینی صدق اولونور گلشنه نهال
گر اولماسا نهال، نه لازمدی باغبان؟
واضحدی مطلب ایستمورم شرح و قیل و قال
اسلام بسته دور بو حسینون وجودینه
اسم حسین اولماسا اسلام اولا محال
هر دوره ده مروج اسلام حسین اولوب
خط موحدینی تاپوب فرقه ضلال
باشدان گیچوبدی ایلیوب اسلامی سربلند
توضیح ایدوب حرام ندور یا ندور حلال
قانیله آچدی معرفته خط مستقیم
کج فکرلر بوله ندی بو قتل و ابتهال
بیر خدمت ایتدی چشمه چشم حسینی دن
توحید نخلینه ویروب اوز قانی تک زلال
عبدی اطعنی اجعلک مثلی، امر ایدن
ایتدی بقای دائمه بو سروره نوال
قانی آلون میونجا دیولسون حسین آدی
قاصر عقوله ویرسون عزاسی گرک کمال
مقصود ایتر، هوایه گیدر مطلع کلام
ذکر اولماسا نه وقت ویروب وعده لایزال
جدی ولادتنده حسینون شهادتین
ویردی خبر آناسینا، یتدی اونا ملال
عرض ایتدی من ایستمورم بیله بیر اوغول
یوخ طاقتیم گوزیمده مجسم اولا او حال
ویردی جواب جدی بودور امته شفیع
ظلمت سرای دینه سالار ضوء ، بو مه جمال
دوقوز امام والدی دور بو قتیل حق
بو اولماسا وصی لریم ایلله انفصال
زهرا ایشتدی بو سوزی عرض ایتدی راضیم
صبر ایلرم نقدر یته غصه و کلال
اما بویور گورور بابا اولام جهاندا من؟
اول دم که تنگ اولور بالاما عرصه جدال
یا سن، آتاسی، قارداشی حاضر اولار بابا؟
قاتللری ایدنده بو مظلومیله قتال
ویردی جواب جدی، نه من، نه علی، نه سن
نه قارداشی اولار ایده جان نقدین انتقال
ایله پوزولدی حالتی زهرای اطهرین
آز قالدی غصه دن ئوله خاتون بی مثال
بیر صیحه چکدی، وا ولدا، وا غریب الام
وا مهجتا دئدی، باباسندان ایدوب سوال
کیم لر عزا دوتار بابا بس اوغلوما منیم؟
ایللَّه خوار عزاسنی اشرار بدفعال
نازل اولوب او وقتده فوراً امین وحی
گتدی پیام حقدن، اول پیک خوش خصال
زهرایه دئ خدا بویورور ایتمسون فغان
وا مهجتا صداسی سالور عرشه اختلال
من قویمارام حسینون اولسون عزاسی خوار
اولماز اگر چه آغلاماقا زینبه مجال
بیر جمع پاک شیعه گتورم بو عالمه
اوغلون حسینه اوخشیوب آغلالا ماه و سال
عورتلری عزا دوتار اهل و عیالینه
ثکلا مثال ایده لر اوزینه نوا، رجال
منده باغشلارام اونا ماتم دوتانلاری
دریالرین کفنجه اگر ایتسه لر وبال
گور وعده صاحبی ایدوب اوز عهدینه وفا؟
وار یر یوزینده ماتمی بو شاهین اتصال
چوخلار دوشوب بو فکره اساسین پوزا، ولی
آخر حسین اونون اوزین ایلوبدی پایمال
آل امیه سلطنتین محو ایدوب حسین
علت نولوب او ذلته، نولدی همان جلال؟
ایستوردولر حسین آدی دنیاده اولماسون
محو اولدی اوزلری، داغلوب شوکت و منال
بیرده بو بارده متوکل چالشدی چوخ
مقصوده یتمدی چکوب امریندن انفعال
بیر عمر باغلی قویدی حسین قبرینون یولین
زوار قلبینه غم اودی سالدی اشتعال
ال کسدیروبدی، گوز چیخادوب، یوز قزل آلوب
شرح مطول ایستوری، لیک ایتدیم اجتمال
هر اون نفردن امر ایدوب ئولدورون بیرین
زوار ال چکه، گوره یولادا ارتحال
بونلان بیله حسینی سونلر گیدوب گینه
باشدان گیجوب ایدوبله خداونده اتکال
بو فکره دوشدی، قبرینی نبش ایتسون عاقبت
آثارینی حسینون ایتورسون او بد سگال
مامور قویدی قبرینی نبش ایتماقا ولی
عکس اولدی، یوز جنوبه دوتوب قاصد شمال
اعجازه باخ، یریمدیلر گاولر دوروب
هر کیم باخوب دیردی شتر دور اولوب عقال
امر ایلدی سو باغلادیلار قبربنه ولی
دوردی دایاندی گیتدی سودان حال اعتدال
گلدی فرات، حایره یتدی گیچنمدی
گویا سویا دیوبله دایان حایر اوسته قال
معلوم اولان واریدی حسیندن خجالتی
اول تشنه کام امامدن ایلردی انفعال
جان اوسته چوخ فراته باخوب، العطش دیوب
کفار شام امرینه ایتمیوبله امتثال
رنگ فرات قانه دونوب انفعالدن
قادر دگل بیان وقوعاته نطق لال
بی جا دگل حسین آدی دنیانی دولدوروب
ترویج دین یولوندا ویروب باش و اهل و آل
خون خدادی قانی، اوزی مظهر خدا
عالی مقامی واردی، چتین درک ایده خیال
گوردی یاخوندی شمس شریعت غروب ایده
لازم گوروب شهادتی، اول شاه بی همال
اسلامه ویردی فدیه هامی یار و یاورین
نه اکبر ک نه قاسم و نه مسلم و هلال
اوز سود امر بالاسینی حتی ویروب فدا
ایتموب وفای عهد الستیدن اغتقال
تا وقت او وقت اولوب، دوزه لوب گون، یتشدی ظهر
آز قالدی آفتاب امامت تاپا زوال
قویدی یوزین ترابه عزیز ابوتراب
راز و نیازه خالقیله ایتدی اشتغال
عرض ایلدی الهی بو من بو گروه کین
تعجیل ایدوله قتلیمه ویرموله امتهال
گیچدیم تمام ماملکیمدن بو چولده من
قانیم چکوب بو دوغرانان اعضایه سرخ شال
عباسیم ئولدی، سندی بلیم، ئولدی اکبریم
دوزدوم بویاندی قانه سیه زلف و خط خال
بیر یاندا شامین اهلی چالور طالقانیدا و کره نای
بیر یاندا آه و ناله چکور بیر بلوک عیال
صیاد شام ایدر حرم آهولرین شکار
شمر آت دوشونده گزدیرر اطفالی چون غزال
بیر عمردور فراق اودینا جسم و جان یانوب
جان اوسته روحیم آختاروردی مجلس وصال
ایتدیم وفا اوز عهدیمه، آز قالدی جان ویرم
زهرا آنام گلوب باشیم اوسته دیور تعال
سنده باغشلا جدیمون امتلرین منه
خاصه (حسینی) ایلمسون مندن انفصال
مولدیدور حسینون (حسینی) گوتورمه ال
دوت دامنین عرایضون ائت، عیدیانه آل
- سه شنبه
- 9
- شهریور
- 1400
- ساعت
- 18:3
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه