امام مُفترض الطّاعه دور امام عقیل
اوزی مروّج اسلام، مسلمینه دلیل
چکر منادی غیبی بو نوعیله فریاد
گرک بیان اولا حالاتِ سیّد سجّاد
بو فکر قاصریله شرح کامل ایلماقا
اوزیندن ایلورم اول شاه دینون استمداد
وار اختلاف تواریخده ولادتینه
مورّخین ایدوب نچّه نحویله ایراد
بشمجی گون مهِ شعبان یازولّا بعضی لر
همان گون عیدیدی مخصوص بو شهه میلاد
بیر آیری عدّه نصف جمادی الاوّل
یازولّا، ایستمورم تک به تک یازیلسون آد
بو گون سپهر امامتدن ایلیوبدی طلوع
اولوب منوّر اونیله بو عالم ایجاد
غلطدی گون دییم، اوندان گون اقتباس ایلر
نظیر اولا بونا گون، یوخدی اوندا استعداد
آتا آنا طرفیندن بیوک جلالتی وار
ایدر جلالینه غبطه تمامی افراد
عجمده فُرسین، عربده قُریشین عزّتی وار
اولوب هر ایکی سینه منتَسب بو پاک نژاد
آدی علیدی، آتاسی حسین، شاهِ عرب
آناسی دختر یزدگرد نسل قُباد
اودور کُتبده آدی ابن خیرتین یازیلوب
اولوبدی مُشتهر عالمده زُبدَةُ الاَمجاد
کنیّه سی عرب ایچره ابا محمددور
دیه لّر اسمینه ایرانیان یگانه و راد
آتاسی شهدی بو شاهین، آناسی شهزاده
اولوب ملقّب اوز عصرینده قبلة العبّاد
بونا ویروبدی خدا زین العابدین لقبی
بودور عوالم امکاندا زینت زُهّاد
نه وار نظیری جلالتده نه مصیبتده
ایدوب بو نوعیله مرقوم، صاحب ارشاد
همینکه گلدی جهانه آناسی ایتدی وفات
اولوب آنا طرفندن غمی فزون و زیاد
ایگرمی اوچ ایل آناسیزلقین غمین چکدی
بودور موافق اخبار معتبر اسناد
قورولدی کرب و بلاده بساط عاشورا
حسینون ایلدی انصاری بیر بیر عزم جهاد
کومکلر ئولدی، امام حسین شهید اولدی
تاپولمادی ایدن آل محمّده امداد
دوشوب کمند بلایه حرم غزاله لری
مخدّراته آچوب جور و ظلم الین صیّاد
گوزی باخا باخا اولدی اسیر عمّه لری
حیالی باجیلاری چکدی ناله و فریاد
بقیّةُ الله اوزی ناخوش، اهل شامه اسیر
علاوه بوینونا زنجیر ووردی اهل عناد
ایده لّه ناخوشا حرمت جهاندا رسمیدی بو
غریبه حرمت ایدوب کوفیان بد بنیاد
ویروبله ناخوشا مرکَب جهازسیز ناقه
ایا امام زمان اهل شام الیندن داد
گوروبدیلر دوه اوستنده اگلشه بولمور
بیر آیری ظلم ایلیوبلر او فرقهء بیداد
ایاقلارین دوه نین قارنی آتدا باغلادیلار
ئولونجه شیعه نی قویماز بو غملر اولسون شاد
روایت ایلوری راوی گیرنده کوفیه من
جهازسیز دوه ده گوردوم اول شفیع معاد
گیوب ایاقلارینا تازه قرمزی چکمه
دئدیم عزالی گیه قرمزی اولور ایراد
یاخونلاشاندا نه گوردوم که گورمسون گوزلر
دامارلارینان آخور قانی، قانه دوندی #فؤاد
گیدوب او حالیله ابن زیاد مجلسینه
او مجلسین ستمین من ایلنمرم تعداد
امام بوینونا بیر غل جامعه ووردی
اولوب او بار بلادن کمان، قد شمشاد
بو ظلمه ایلمدی اکتفا او بدفرجام
پیمبر عترتینی سالدی حبسه ابن زیاد
نه حبسخانه که تاریک و تنگ بیر یریدی
گوزیمده تار اولور عالم او حبسی ایتسم یاد
اوزی درین یریدی هم سو باغلامیشدی عدو
خانیملار اوردا چکردی گیجه گونوز فریاد
ز بسکه قول قولا باغلیدیلر خانم بالالار
دگلدی ممکن اوتورسونلا، نیلسون سجّاد؟
او قلب عالم ایدوب تاب بیر بیله ظلمه
حصار صبری ولی شامده اولوب برباد
نجه دیوم که بنی هاشمین خانملارینا
دیار شامده کفّار خارجی قویوب آد
یزید ایلدی احضار شراب مجلسینه
امام قلبینی قان ایتدی، ایتدی اخذ مراد
باخوب امامه گهی گولدی، گه شراب ایچدی
امام قتلینه گه حاضر ایلدی جلّاد
ویروب خرابه ده یر اهل بیت اطهاره
ندندی اولمادی بر باد بو خراب آباد
(حسینی) شکر ایله کفران نعمت ایتمه که حق
فنونِ شعره سنی لطفیله ایدوب استاد
اگر چه واردی قوافی ده دال و معجمه ذال
ولی یازوبلار اسانید یوخدی استبعاد
- سه شنبه
- 9
- شهریور
- 1400
- ساعت
- 18:33
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه