قوشون تا گوردی جنگه اکبرِ سیمین لقا گلدی
قالوبلار شَکّده اکبردی بو یا مصطفی گلدی
یتیشدی مرکزِ میدانه، ایتدی بیر رجز ایراد
اولوندی نطقِ عالی سیندن، عالی پندلر ایفاد
ایدوبدور امر بر معروف و نهی منکراتی یاد
بو منظور اوسته بیر گمراه اولان بلکه یولا گلدی
دیوب اوندان صورا من اکبرم ای قوم، اولون آگاه
منیم جدّیم محمّددور، حبیبِ حق، رسول الله
بابام دور مرتضی حیدر، ضمیرِ لفظِ من والاه
اوئیکه صدره جامع، عالِم و شیرِ غزا گلدی
علینون کفّی جَدّه مدور، ملیکه کلّ آفاقه
همان زهرادی که پرتو سالوبدور طاقِ نُه طاقه
عَموم دور مجتبی، میزانِ محکم، حق و انصافه
حسین بن علیده، بابِ نسبتدن اَبا گلدی
گورنده شهدِ نطقی، اهلِ کفره ویرمدی شیره
ال آتدی فاتحِ خیبر، علی تک اوندا شمشیره
شغالِ کورلر گویا اولوبلار روبرو شیره
آت اوستوندن یره، باشسیز السیز اشقیا گلدی
ترابِ تیریه سالدی او قدری پهلوان لاردان
آلیندی رنگِ صورت، سالم اعضا قهرمان لاردان
اولوندی کُشته دن پُشته، دوتولدی یول قاچانلاردان
قدَر احسن دئدی، ابلاغِ تحسینه قضا گلدی
او قدری قالمادی اَسسون هواده پرچمِ تسلیم
او موقع سعدین اوغلی، نقشه ایلدی تنظیم
مقرّر قیلدی لشکر، چار سمته اولدولار تقسیم
مجهّز دورت طرفدن اوستونه اهلِ جفا گلدی
او رزم آرا ایچون بو حمله لرده عرص تنگ اولدی
قاریشدی بیر بیره دریای لشگر، سخت جنگ اولدی
همین اثناده حیفا، توسنِ امّیدی لنگ اولدی
الینده تیغ منقذ، ناگهان اول بی حیا گلدی
ایله بیر ضربه ووردی، جسمینی سالدی تعادُلدن
توانا سلب اولوب، ووردی گلن دشمن، مقابلدن
او اندازه جراحت وارد اولدی، تا دوشوب دلدن
ایراق لیلا گوزوندن، یاره اوستوندن یارا گلدی
هوا ایسّسی، اوزی یورقون، گیدور قانی، بدن خسته
آخوبدور نازنین باشی، دوشوب اوندا عقاب اوسته
هیاهو قوپدی، مرکب رم یِدی، گیتدی نه آهسته
لُجام آزاد، میدان ایچره باش قویدی هارا گلدی
دولاندوردی نه اندازه، عقاب، اقطارِ میدانی
گلن ووردی، گیدن ووردی، او رعنانی او زیبانی
یخیلدی عاقبت توپراقلارا اولدی بو عنوانی
بابا گَل اکبرون تاپ، باشینه گور نه بلا گلدی
قیامتدور بلا صحراسی، مَملُوّ اضطراریله
شهِ لب تشنه مشغول، اهلِ بیتِ دلفکاریله
ایشتدی دادِ استمدادی، بولمم نه قراریله
اوغول جان ویرماقین گورماقلیقا، مظلوم آتا، گلدی
گلوب گوردی تَلئلو یاغدیران آیدان دوشوب سایه
ز بسکه قان دوتوب اندامینی، گلمز یارا سایه
بویوردی باخمادی قاتل، بیله زلفِ سمن سایه؟
سنی بو حاله سالدی، هانسی ظالم ابتدا گلدی
قتیلِ عشق، امامین عطرین آلماقلیق دَلیلیله
گوز آچدی عرض ایدوب، سیراب اولوندوم سلسبیلیله
بویوردی سن علی گئت، منده گللم بو سبیلیله
آنان اما اوغلسوز قالدی، دنیاسی قرا گلدی
خیال ایتدی خیامه حمل اولا، اول قامتِ شمشاد
بویوردی ای جوانانِ بنی هاشم ایدون امداد
اولوب امرِ امام اجرا، جوانلار چکدیلر فریاد
گریبان چاک، تک تک، دللرده وا اکبرا گلدی
بویوردی سرورِ آزادگان، ای با وفا انصار
خیامه حمل ایدون، قارداشوزی سیز، منده یوخ انجار
گوروبلر چون جراحت چوخدی ، مشکل حمل اولا، ناچار
کنارِ فرشِ غبرا اوسته آخر بیر عبا گلدی
عباده حمل اولوندی سروِ طوفان دیده آخرده
بسانِ یاسمن، گللر بوتون آشفته پژمرده
بنی هاشم قاباق، دالدا، او سلطانِ جوان مُرده
بو تشییعی گورنده نالیه اهلِ سما گلدی
یتیشدی تا حریمِ خیمه گاهه، دل غمین موکب
عزیزِ فاطمه فریاده گلدی، گل باجی زینب
یوزوم لیلایه یوخدور، سن گَل آخر گور ندور مطلب
دئ لیلایه سِنوب آئینهء احمد نما ، گلدی
چادلاردا بو سس تا دوشدی، بولدی عترتِ طاهر
بوتون گوزلر دولی، نعشِ علی اوسته اولوب حاضر
ولی لیلا دایاندی گلمه دی حقّه اولوب (شاکر)
دئدی صد شکر، حسینه نوجوان اوغلوم فدا گلدی
- سه شنبه
- 9
- شهریور
- 1400
- ساعت
- 19:15
- نوشته شده توسط
- یوسف اکبری
- شاعر:
-
جعفر فتح اللهی
ارسال دیدگاه