ای جماعت آتامون من دُر دُردانه سیم
آنامون یوخ داخی اوغلی، بیر بیر دانه سیم
وورموشام شعلهء شمع رخ یاره اوزومی
اود دوتوب بولمرم اصلا اوزومی نه سوزومی
یاریم اود ووردی منه یومدی جهاندا گوزومی
یانورام یاندیرارام عالمی پروانه سیم
خُم میخانهء عشقم من پیمانه پرست
اولموشام ساغر مجلس اولالی کاسه شکست
دولانوب صفلری بیر بیر گزرم دست به دست
گتوروب گردشه ساقی منی پیمانه سیم
قان گوروب باشدان آشور گور نجه تدبیر ایلیوب
داغیدوب کاکلی قان جسرینی زنجیر ایلیوب
داش دوزوب دوره مه، اطرافیمی نخجیر ایلیوب
اودی آباد ایلین من اودی ویرانه سیَم
زلف پُر چینی توکدی یوزومه دام ایلدی
خالیله دانه سپوب مرغی اونا رام ایلدی
آنامی خیمه ده بی طاقت و آرام ایلدی
یوز قویوب دامیمه، مرغ دلینین دانه سیم
من که مفتونم اونا عالمی مفتون ایدرم
شور و فریادی میله دهری دگرگون ایدرم
بیر حزین آهیله یوز لیلینی مجنون ایدرم
بلی مجنون ایدرم لیلینی دیوانه سیم
محرم خلوت جانان بولی، جاناندا نه وار
صدف ایستر که بوله شاخهء مرجاندا نه وار
بونی جانانه بولر بس که بو بیر جاندا نه وار
آلالار مین جانا ویرمز منی جانانه سیم
مرغ خوش لهجه سیم، لهجهء گفتاری میله
طوطی ناطقیم، نطق شکر باری میله
چشم و قدّ و رخ و زلف و خط رخساری میله
نرگس و سرو و گل و سنبل و ریحانه سیم
آزالوب جود و سخاوت، چوخ اولوب نخل نخیل
کسیلوب بارش رحمت قوریوب نخل نخیل
شاعر الحق که (فضولیدی) نوالیدی (دخیل)
(تائبم) من، اولارین دهرده افسانه سیَم
- سه شنبه
- 9
- شهریور
- 1400
- ساعت
- 19:29
- نوشته شده توسط
- یوسف اکبری
- شاعر:
-
صادق تائب
ارسال دیدگاه