او دمکه صورتون نقاش عالم روبرو چکدی
ایاقلین یوز قویوب مِحرابه بیر مَستانه هُو چکدی
بو گون بیر کهکشان گویلرده حوری ازدحام ایلوب
یول آچسین تا سنه، جبرئیل بانگ طَرَّقوا چکدی
گریشماق چوخ چتندور، تار زلفوندور ولی نیینیم؟
منی آخر بو کفر آباد عشقه جستجو چکدی
حساب عشقمی تا اهل ایمانه بلوندرسون
گزوب زلفونده شانه مین الیله مو به مو چکدی
کمان ابرویه خم ورماقدا آتدون تیر مُژگانه
دلی هیچ بولمدون اشکمله زخم سینه سو چکدی
بیوکلر سهلیدی اطفالیده تکفیر ایدور از بس
دل دیوانمی زنجیر زلفون کو به کو چکدی
آتام تک ایستدی یولدان چخاتسین هاشمی خالون
گوروب زاهد سوزوندن کفرله لا تقربوا چکدی
نه نوعی جذبه وار حُسنونده ای گل بولمورم، نازون
نه تک من بلکه با هم آشنائیله عدو چکدی
لب لعلون شرابوندان ایچنلر فوری مست اولدی
خمارین اضطرارین من کیمی بیر زَرد رو چکدی
اگر یوسفده مشهور اولدی بازار محنتده
سنون دریای حسنوندن عزیزیم بیر سبو چکدی
(صمد) چوخ آچما عشقین سرنی، عالمده منصوری
فراز داره آخر فاش اولان راز مگو چکدی
- سه شنبه
- 9
- شهریور
- 1400
- ساعت
- 20:3
- نوشته شده توسط
- یوسف اکبری
- شاعر:
-
حاج صمد قاسمپور
ارسال دیدگاه