گوزوم یاشین کونول قانیله مرجان ایتمییم نینیم
بو آق دُری شبیه لعل جانان ایتمییم نینیم
قوروموش نِی کیمی هر بند بندیمدن چیخار ناله
اسیر بند عشقم آه و افغان ایتمییم نینیم
چکیبدور سینه مه دود سیه تک آیریلوق داغی
بناسین تیشهء آهیله ویران ایتمییم نینیم
انیسیم درد و محنت، مونسیم غم همدمیم ناله
بوجمع یتله دنیانی پریشان ایتمییم نینیم
دوتولموش خاطریم گور اهل شهرون ازدحامیندن
بویور مِجنون کیمی عِزم بیابان ایتمییم نینیم
گوزوم یاشی آخار هجرینده مروارید غلطان تک
اونی خون جگرلن قانه غلطان ایتمییم نینیم
دیللر شربت لعل لبون هر درده درمان دور
بولورسن اهل دردم میل درمان ایتمییم نینیم
منی بیجا یره ایلر مذمت زاهد بی دین
گورنده کفر زولفون ،ترک ایمان ایتمییم نینیم
ایدیبدور باغریمی قان لبلرون قوی بیر ایچیم قانین
بو باشسیز مملکت ده قانیمه قان ایتمییم نینیم
یقینیمدور اورکدن چیخسا پیکانون، چیخار جانیم
گوزل جان تک اونی سینمده پنهان ایتمییم نینیم
منی یالقوز گورنده تُرک مستین قصد جان ایلر
خط و خالون خیالین مونس جان ایتمییم نینیم
بو بازار محبت ایچره صراف تهیدستم
یتیم درّ اشکی زیب دکان ایتمییم نینیم
- چهارشنبه
- 10
- شهریور
- 1400
- ساعت
- 14:19
- نوشته شده توسط
- یوسف اکبری
- شاعر:
-
مرحوم صراف تبریزی
ارسال دیدگاه