هر کیم آلوبدی دَرس شَهامَت رقیه دن
کَسب ایلیوبدی عزّ و شَرافت رقیه دن
باخما که اوچ یاشیندا صَغیره یَتیمه دور
چوخ گورسنوبدور کَشف و کَرامَت رقیه دن
ویرانسرای شامده بیر خوردا قبری وار
ایلر او قبر پَخش مُحبّت رقیه دن
وار خوردا قَبری اوسته نچه خورداجه بِشیک
ایلَلّه اَصغَریله حِکایت رقیه دن
آلما خَبر حَقیقتی اَهل مَجازدن
اورگش بو مُشگل اَمری حَقیقّت رقیه دن
ثابتدی کَهرباده اولان رَنگ زَعفران
اَخذ ایلیوبدی رَنگ صَداقت رقیه دن
اوز نوبه سنده دینَه بیوک نُصرت اِیلیوب
اِسلامه چوخدور آز دگی خدمت رقیه دن
تا کربلاده یتدی شَهادت نَهایته
اوّل اوجالدی پَرچَم نِهضَت رقیه دن
غارت اولاندا مَعجَری زلفون سالوب یوزه
پَخش اولدی اَهل عالمه عِصمت رقیه دن
زَهرا کیمی قولوندا یوزونده نشانه وار
اولدی آناسینا تَبعیت رقیه دن
شامات یولاروندا بیوک یادگاری وار
چوخ نُوک خاریده وار عَلامت رقیه دن
قان باغلادی یارالی دل خانه خانه سی
آلدی قَرار تیر شَماتت رقیه دن
ویرانه شام رَشگ بِهشت بَرین اولوب
از بَسکه اولدی قَصد اِقامت رقیه دن
کُفر یَزیدی هاردا بولردی جَهانیان
گر اولماسیدی شامده هُمّت رقیه دن
یاتدی خَرابه ده یوزی توپراقدا نِچه آی
غم کَسمدی او مدّتی اُلفت رقیه دن
آج قالدی چوخ گجه دلَه اَمّا گتورمدی
آلموشدی گر چه صَبر او حالت رقیه دن
راضی دگولدی عَمّه سی زِینب علی قیزی
چَکسین بو اُودلی دردیله خِجلت رقیه دن
رویاده گوردی بیر گجه مَظلوم آتاسنی
نِی تک اوجالدی نالۀ رقّت رقیه دن
اوز شیون و فغانی اویاندوردی خوابیدن
مَشق آلدی اَهل بِیت رسالت رقیه دن
اَهل حَرَمدن اوج ایلدی ناله گوگلره
آخدوقجه گوزدَن اَشگ مُصیبت رقیه دن
تا روشن اولدی حال یَزیدِ ستمگره
آلسین دوباره ایستَدی طاقت رقیه دن
گوندردی شاهزادیه شاهین کَسیک باشین
بألمرّه صَبری اِیلدی غارت رقیه دن
آغوشه آلدی جان تَک آتا باشینی بالا
باشلاندی اُودلی طَرزیله صحبَت رقیه دن
سسلندی کیم کَسوب بابا بُوینون دامارلارین
طاقت آلوب بو گُوندوزی ظلمَت رقیه دن
عمّم دیوردی کَعبه یه سَن اِیتموسن سفر
بو سرّی گیزلدوردی بو مُدّت رقیه دن
مَعلوم اولور که ایندی یَتیم اولموشام بابا
قطع عَلاقه ایلیوب عزّت رقیه دن
آلما خَبر نیه رُخ زَردیم کَبود اولوب
عرض اِیلسَم یِتَر سَنه مُحنت رقیه دن
آلما خبر که آبله پا اولموشام نَدن
ناراحت اولما پای جَراحَت رقیه دن
هجران غَمندن ایلدی شِکوه آتاسینا
آلدی توان او عالم وَصلَت رقیه دن
باش دوشدی بیر یانا او بالا دوشدی بیر یانا
کسدی عَلاقه رُوح اُو ساعت رقیه دن
زینب دیدی حَرَملَره آهسته آغلیون
یاتدی بالام آزالدی مَشقّت رقیه دن
چَکسین کناره ایستَدی بلبل قزیل گُلون
آلسون دوباره سینه ده نِکهت رقیه دن
عُذر ایسترم بو یرده اِمام زَماندن
مَجبورم اِیلماقدا کِتابَت رقیه دن
سوز ناتمام قالسا یَزیدین جَفاسنی
بُولمَز جَهان گَر اولماسا صحبت رقیه دن
زِینب دیدی فغانیله اُلدی بالام گَلون
دوشدی دوباره قَلبه حَرارَت رقیه دن
شمر هاردادور گَلوب آچا قولدان طَنابنی
بو حالده آزالسین اَذیّت رقیه دن
بیر بیر خانملار آلدی اَل اوسته جَنازه سین
هر کس آلاردی بُوسۀ حَسرت رقیه دن
نوبت یِتَنده اوپمدی اَصغر آناسینا
دوندردی مَین فَغانیله صورَت رقیه دن
سَسلندی من اوپَم یوزوی گَلموری یوزوم
شَرمَنده ام اُولونجه قیامَت رقیه دن
قلبنده سوندورم اودونی چارَم اولمادی
یا بیر آچام طَناب عَداوت رقیه دن
ایندی اوپَم یوزون بالامون نه یوزیله من
یا اولمیوم نه نوعی خَجالت رقیه دن
(نجمی) بیوکدی گر چه گناهون جزا گونی
نه باک وار گر اولسا شَفاعَت رقیه دن
- چهارشنبه
- 10
- شهریور
- 1400
- ساعت
- 15:4
- نوشته شده توسط
- یوسف اکبری
- شاعر:
-
مرحوم نجمی تبریزی
ارسال دیدگاه