زینب حسینه دشمن ایوینده دوتوب عزا
رسوا ایدوب یزیدی چکوب قصرینه قرا
آگاه اولوبدی مطلبه شامون خانملاری
قاره گیوب عزایه گلور دلده آه و وا
غوغادی شامون اهلی دیور بیربیره گلون
نادم اولوب یزید ستمکار و بیحیا
قصرینده یر ویروبدی خرابه نشین لره
ایستر ایده اسیرلری قیدن رها
طعن و شماتت ایلین عورتلر آغلوری
دیوانه تک گلور هامی باشه ویرا ویرا
هنده گیوبدی اگنینه قاره، کنیز تک
سویلور گوروم یزید ایکی دنیاده خار اولا
زهرا یانندا خار و خجل ایلیوب منی
زهرا ایوین یخوبدی او مرتدّ و بیحیا
یاسه گلن خانملارا مین حرمت ایلیور
آغلور دیور ایویم یخلوبدور او باوفا
هر دم آتاسی قارداشی اوغلی اُلنلره
عرض ایلور حق اوزی سیزه صبر ایلسون عطا
شرمندیم سیزی بیله پوزقون گورنمیرم
عفو ایلیون کنیزیزی عفو ایلسون خدا
مجلس سکوت محض هامی خاموش و ناگران
آغلار گوزیله گلدی دله دخت مرتضی
الله ذوالجلالین آدین ذکر ایدوب ازل
بسم اللهیله یعنی سوزون ایتدی ابتدا
باخدی تأسفیله عزایه گلنلره
ایتدی خطاب نایبهء خیرة النّسا
اوّل گرگ سیزه اوزومی من تاندّیرام
آگاه ایدم، بیزه گوره فکروز گیدوب خطا
بیز آل عصمتوخ کی دیدوز خارجی بیزه
هر ناروا مصایبی گوردوز بیزه روا
بو شامیده سیزه نچه گون کی قوناقئدوخ
ایتدوز قوناقه حرمت بیحدّ و انتها
ویرانه ده واریدی بیزیم بیر مریضه میز
نه بیر طبیب تاپودوق او زاره نه بیر دوا
غربت مکاندا ایللریمه چاتمادی اَلیم
توپراقلار اوسته اُلدی او رنجور و بینوا
دنیا گوزی بو محنتی تا حال گورمیوب
بیر قیز اُله، مزارون اونون عمه سی قازا
دردلر دانشدورور ایدورم بیر گلایه لر
سوزلر محالدور ولی سیزده اثر قویا
حق سوزلری ایشتماقا سیزده زمینه یوخ
حقّی گرگ دیاخ اولا بیزدن خدا رضا
حق اوسته قارداشم ایلیوب قانلی بیر قیام
کون و مکان او نهضته سویلولّه مرحبا
باش اگمدی یزیده حسین کسدیلر باشین
کرب و بلا چولونده سوسوز لشگر جفا
بو قانلی کوینگه باخا هر کیمسنه بُلر
قارداشما نقدر ویروب قوم کین یارا
سدّ ایتدیلر فراتی بیزه اوچ گجه گونوز
یاندی شرارهء عطشه آل مصطفا
بیرمشگ سو بهاسینه بیر جفت قول ویروب
سقای دشت عشق ابوالفضل مه لقا
ظاهرده اُلدی یاور و یاری حسینمون
باطنده فاتح اولدی شهیدان کربلا
گور بیر یزیدی خار و زبون ایلدوخ نجه
مالي و لِلحسین دیور اول ناکس و دغا
خلق ایچره مفتضحدی یزید ستم شعار
خلق جهان حسینی بُلور لیک مقتدا
غارت اساسین آغلیوب اللردن آلموشام
بیز اهل بیتیده قالا میراث انبیا
ایمدی سوزوم بودور کی گیدون خانمانوزا
مهمان گلنده اللروزه یاخمیون حنا
اکرام ایدون قوناقه سفارش ایدوب نقدر
ای اهل شام سیزلره پیغمبر خدا
شرمنده سوز، قیامته تک آغلیون یانون
قورخون او وقتدن کی قیامت اولا بپا_
قارداشمون بیرالده آنام قانلی کوینگین
حشره بیر اَلده ده گتوره قانلی بیر لوا
شاهدسن عرض ایده؛ اوزون ای خالق جلیل
اوغلوم حسینی تشنه لب اُلدوردی اشقیا
نقل ایلیوبله بزمه گلوب خواهر یزید
یاندوردی قلب زینبی اول شوم و بیحیا
سویلوب مگر نه واقع اولوب دخت فاطمه
نالنله شامی ایلموسن تعزیت سرا
چوخ جنگلرده جدون آتان فاتح اولدولار
ایتدوخ هاچان بو نوعیله بیز ناله و بکا
آل امیّه اُلدوله بدر و حنینیده
قارداشیم ایستدی اولارا انتقام آلا
یاندیردی قلب زینبی چون دخت معاویه
آل امیّیه دیدی نفرین و لعن اولا
بیر قانلی قونداق آلدی اَله زینب حزین
جنگ ایلیوردی سویلدی بو سودامر بالا؟!
چشم جهان بو درد غم افزانی گورمیوب
بیر سودامر نشان اولا اوچ شعبه لی اوخا
کسدیز باشین بوسود امرین ظلم و جوریله
ویردوز اونی جدایه آناسی باخا باخا
دنیانین اهلینه ایدر اثبات کیمدی حق
بو بی گناه حالینه قان آغلوری سما
حاصل خانم دانشدی اویاتدی یاتانلاری
بیگانه یاندی اولدی او بزم ایچره آشنا
لعنت بنی امیّیه سسلردی بانوان
سویلردیلر حسینه سلام و درود اولا
فرصت آز اولدی قالدی اورکده سوزون چوخی
لطف ایلیون (پرنده) سوزون باقیسون یازا
- چهارشنبه
- 10
- شهریور
- 1400
- ساعت
- 15:8
- نوشته شده توسط
- یوسف اکبری
- شاعر:
-
حاج محمد پرند
ارسال دیدگاه