ای صحبتی عزت، سوزی عزت، اوزی عزت
خاک حرمی جوهر اکسیر سیادت
ای سنله میسر هامویه عزت و اعزاز
اسمون کتب عزته عنوان و سرآغاز
ای دوده آدم سنیله رتبه ده ممتاز
شان و شرفون مایه فخر بشریت
ای ثقل وقارونله زمین عرشه مباهی
ای خلقه وجودون اثر فیض الهی
اسلامده قولون سبب هدم مناهی
آفاقده فعلون ثمری، نشر فضیلت
ای خاک درون کعبهء مقصود خلایق
ای سنله عیان پرتو انوار حقایق
ای پرتو حسنیله صفا صبحنه فالق
ای بارقهء رحمتله کاشف ظلمت
ای سن گل شاداب بهشت ازلیت
ای سن مه رخشان سپهر ابدیت
ای سن اثر رحمت ذات احدیت
ای سن هامی دنیایه اولان علت خلقت
ای شمس فلک شمسهء ایوان جلالون
ای ماه افق مهچهء اعلام کمالون
ای کاهکشان مصطبهء صفّ نعالون
ای ثابت و سیاره سنه فوج جلالت
ای درج نبوتده اولان گوهر نایاب
ای شرق امامتده چیخان مهر جهانتاب
ای رشحه فیضونله شریعت گلی سیراب
افسوس سنی شهید ایتدی بو امت
باللهی تحیرده دی بو نکته ده اوهام
شیرازه دن اولموب نه سبب دفتر ایام
خضرا گنه دور ایلدی، غبرا دوتوب آرام
خشگ اولدی عطشدن لب سرچشمه رحمت
ای گون که مدینیدی سنه مشرق انوار
دور ایلدی وارونه ز بس گنبد دوار
یاتدون افق ماریه ده، اولدی جهان تار
دوتموشدی او گون عالمی ظلمات جهالت
آزاده دگول قید بلاده اولا دلتنگ
کونین ده مملوک لرون، صاحب اورنگ
مملوک لروندن بیری بیر عبد سیه رنگ
بیر بنده که آزاده لره مایه حسرت
شه لطفی اولوب بنده سینین حالنه شامل
افتاده سنه بذل ایلدی رحمت کامل
آزاده لریله اونیدا دوتدی مقابل
ایتدی اونی شایسته تشریف شهادت
ماذون ایلدی قانه باتا راه وفاده
بذل ایلیه جان، شوقله میدان بلاده
حشره گله محشر گونی سلک شهداده
باشه قویا اکلیل مباهات و شرافت
بو اذن اولوب بندیه منشور سیادت
چتر آچدی باشی اوسته اونون طایر دولت
باشدان ایاقا شوق و شعف، جذبه و حالت
میدانه ایدوب قصد جهادیله عزیمت
بالیده لنوب اوز اوزونه شوق و شعفدن
جان فارغ اولوب سلطه اندوه و اسفدن
باش عرشه اوجالدیبدی بو اکرام و شرفدن
توفیق خدادندی دییردی بو سعادت
پیغمبرین اوغلی نه گوزل ایلدی احسان
بولدی منیده لایق قربانی جانان
مین جان اولا گر منده، ایدم به شهه قربان
اولماز عوض بیر بیله احسان و کرامت
گه اوج سعاتده یتوب قلبینه تردید
یارب اولی که ذره اولا چشمهء خورشید؟
یا سنگ سیه ده گورونه جلوهء ناهید
یا برگ خزاندیده تاپا لطف و طراوت
بو حال، عجب اولمیا پندار و تخیل
چون بوته خار اولماز اولا خرمن سنبل
بو عزته هر قدر ایدورم فکر و تامل
من بنده ناچیزده یوخ قدر و لیاقت
بیر سلکه دوزولمز خزف و لوءلوء شهوار
بیر اولماز اولا باد دی و نفخه اسحار
یکساندی هاچان چهره صبحیله شب تار
یوخ خاکله افلاک آرا، سنخیت و نسبت
من بیر حبشی بنده، سیه رو و مقید
بو بیر شه، اونا عرش خداونددی مسند
من عبد، او کونین ده سلطان موید
من پست، اونا افلاک کیمین پایه رفعت
بو روی سیه، قرمزی قانیله بویانسا
بو سوخته، عشق آتشینه شوقله یانسا
قان اولماقینی دل، ره جاناندا اینانسا
احساس غروریله اولار خفتی عزت
قانیم قاریشار پاک لرین قاننه یارب؟
قربان اولی جانیم بو شهین جاننه یارب؟
ممکن اولی که ال یته داماننه یارب؟
قسمتدی خدایا منه آخرده بو دولت؟
جنگ ایلدی کفاریله باشینده بو سودا
توپراقه سالیب چوخلارینی یکه و تنها
یاره گوتوروب قالمادی دلده داخی یارا
آتدان یخلوب جسمده بی حد جراحت
گورموشدی او صحرای بلاده شهدانی
هر تک تکی ترک ایلیه ایستردی جهانی
فریادینه سسلردی شه تشنه لبانی
اول شاهدن آخر نفس ایستردی حمایت
شه رافتیله جمله سین ایتمشدی اجابت
هر تک تکی اولموشدولا مشمول عنایت
سالمیشدی او شه باشلارینا سایه رحمت
یوخ اونلاریله منده ولی وجه شباهت
اونلار هامی آزاده دی، من بنده مسکین
من خار مغیلانم اولار لاله و نسرین
ممکندی خدایا گوره سن پادشه دین
سایر شهدا تک، منیده ایتسون اجابت؟
چوخ خجلتله سسلدی ای بنده نوازیم
ای خاک درون سجده گهیم، مهر نمازیم
تشریفوه شاها بولوسن چوخدی نیازیم
احسان ایله آی آیت احسان و مروت
موج ایلدی بحر کرم و لطف الهی
سالدی باشنا بنده سینین سایه شاهی
آلدی دیزی اوسته، سر مملوک سیاهی
چکدی او غلامین یوزینه دست محبت
شاه ایتدی غلامین ایکی دنیاده سرافراز
گوی سمتنه یوز دوتدی دعا ایلدی آغاز
ای خالق من ای هامی دنیایه سبب ساز
ای حکموه مقهور، قوانین طبیعت
یارب بو سیه عارضه ویر جلوه بیضا
قلبی کیمی رخسارینیده ایله مصفا
پاکیزه اولا رایحهء جسمی خدایا
ویر بو بدنه رایحه نافه جنت
دلجولوقا وار گوردی او شه حاجت محسوس
محتاجنی دریای کرم ایتمدی مایوس
روشن گونوزی ایتدی شب تاریله ممسوس
بیر قانیله آغشته اولوب هر ایکی صورت
ای بنده سینه عزت کونین ایدن اعطا
بیر نوکرون ایلوبدی جهان ترکینی شاها
اخلاصیدی ایمانیدی عشقونده سراپا
مستظهر احسانون ایدردی سنه خدمت
حاشا کرموندن تاپا یاس و اولا نومید
واضحدی که فیاضدی هر ذریه خورشید
یوخدور قسم اوز جانوه بو نکته ده تردید
لطفون یته جاخ نوکریوه روز قیامت
- چهارشنبه
- 10
- شهریور
- 1400
- ساعت
- 15:9
- نوشته شده توسط
- یوسف اکبری
- شاعر:
-
محمد عابد
ارسال دیدگاه