آغلاما اِی زِینبین صَبر و قَراری آغلاما
جانیمه اُود سالدی بو آهون شَراری آغلاما
قوی دیزیم اُسته باشون نازلی رقیم چَکمه آه
آغلاما اِی قارداشمین یادگاری آغلاما
اِی خَزان اُولموش گُلوم سُولدون سارالدون غُصه دَن
اُولموسان چُوخ داندی آخر غَم دُچاری آغلاما
غَم کشیده عَمّن اُلسون سَن هارا بو شام هارا
تار مار اُولسون گوروم شامین دیاری آغلاما
گوزلرین قربانیم یات بیر دَقیقه راحت اول
اِیتمه اَشگین صُورت گلفامه جاری آغلاما
بو گیجه نُولموش سَنه چوخ اِضطِرابُون وار قیزیم
حالتین آلدی اَلیمدن اِختیاری آغلاما
مُرغ بِسمل تَک پَرو بالین سینوب چوخ تتروسَن
اِی جَفا صَیادینین پُوزقون شکاری آغلاما
قلبیمی اِیتمه پَریشان قُوی دیزیم اُسته باشون
تپراقا قویما بو زِلف مُشکباری آغلاما
بلمورم نیلوم اِلیم قُوم و قَبیلَمدن چیخوب
بیر نَفر یوخ بو غَریبین غَمگساری آغلاما
چوخ مُکدر اُولموسان اَکبر غَمینده سَن قیزیم
نِسکلین چوخ یاندورور بو اَشکباری آغلاما
آغلیاندا سَن تمام آغلور حَرملر گُورموسن؟
آغلادور دَردین سَنون من دِلفگاری آغلارام
قولارون باغلی اُوزون آج یر خَرابه فَرش یوخ
آز دَگول دَردون بالا صَبر اِیله باری آغلاما
عَمه جان تا جاندا وار تاب و تَوانیم آغلارام
آغلارام عَمه چیخی نجا خَسته جانیم آغلارام
بیکسم من نه آتام وار نه عَموم نه قارداشیم
سَندن اوزگه کیمسیه گلمز گمانیم آغلارام
پَر شِکسته بُلبُلم آیریل موشام گلزاریدن
جُور خاریله پُوزولموش گُلستانیم آغلارام
عَزتیم گیتدی اَلیمدن اِعتباریم قالمادی
خوار و زار اُولدوم داغیلدی خانمانیم آغلارام
ناز اِیدردیم هَر زَمان اَکبر کیمی قارداشیمه
خُولی و شِمر اُولموش ایمدی پاسِبانیم آغلارام
من نِجَه آرام اولوم صَبر اَیلیوم راحت یاتوم
وار دَرون دلده بیر دَرد نَهانیم آغلاما
عَمه جان قُربانوام از بَس آجام گلمز یوخوم
بی سَببدور سانما بو آه و فَغانیم آغلارام
(آصِفین) چیخ ماز خیالیندن رقیه نِسکلی
اُولسا قان باغریم کیمی اَشک رَوانیم آغلارام
- پنج شنبه
- 11
- شهریور
- 1400
- ساعت
- 13:39
- نوشته شده توسط
- یوسف اکبری
- شاعر:
-
مرحوم آصف تبریزی
ارسال دیدگاه