وئروبدی وعده خدا صاحب الزّمان گله جاق
دولاندا ظلمیله جوریله بو جهان گله جاق
بِشِمجی سِنّه یتیشم یشدی اِیلیوب غیبت
گَلنده سنّی اوتوز بِش کیمی جوان گله جاق
دگول غیاب و حُضوری ئوز اِختیارینده
ظهورینه اونا اذن اولسا هر زَمان گله جاق
گَلن گونون دئسه هر کیم بولور یالان دیوری
ئوزیده بولموری هانسی زمان هاچان گله جاق
بو اِنتظار فَرج بیر بیوک عبادت دور
که باغ دین خداونده، باغبان گله جاق
او کس که پاکدی پاکیزه دل مسلمان دور
اونا امام، اونا سُلطانِ مهربان گله جاق
اوکس که جُور دَگول حکم شرعیله عَمَلی
او شخصه حدّ ووران وئرمین امان گله جاق
بساط ظلمی یخان دادگاه عدلی قوران
سعادتین قاپوسین یوزلره آچان گله جاق
وصول ائدن فقرا حقّین، اغنیا لردن
بَنای ظلمی ستم کاخینی یخان گله جاق
قویان جهانیده اجرایه حُکم قرآنی
عدالتیله بو دنیانی دولدوران گله جاق
بو دینی اِیلمه آلت، مرام دنیایه
اَلینده حافظ دین تیغ جانستان گله جاق
امامه پیرو اولان تابع هَوی اولماز
بهارِ عمره بولر دورۀ خزان گله جاق
دئمه امام نیه گَلموری، نه علّتی وار
دایان عمل لرون اصلاح ائله دایان گله جاق
یالان دانیشما قمار اویناما زنا ایلمه
حدود شرعی گوزَتله، که حَد ووران گله جاق
وئریم بو یرده سیزه مژده ای حسینی لر
حسین تشنه لبون قانینی آلان گله جاق
پِیمبر عَربی (کهنمویی) جدّون دور
سن افتخار ائله دنیاده که آقان گله جاق
- پنج شنبه
- 11
- شهریور
- 1400
- ساعت
- 14:3
- نوشته شده توسط
- یوسف اکبری
- شاعر:
-
مرحوم سیّد حسین کهنمویی
ارسال دیدگاه