خَم ایتدی قامتِ دنیانی غم هِلالی حسینون
که دولدوروب هامی عالم الری مَلالی حسینون
چکوبله گویلره قاره اولوبدی مجلسِ ماتم
بو آیدا عرشِ خداوند ذُوال جَلالی حسینون
خدایه ممکن اولا آغلاماخ یقین ایله بی شک
باتار مَلاله بو ماتمده لايزالی حسینون
توکر سرشکنی صاحب زمان گجه گونوز آغلار
نچون بو آی پوزولوب رُونقِ جلالی حسینون
قوناق آدیله گتورديله کربلایه او شاهی
نه بی حیادی گورون دشمنِ ضلالی حسینون
سو یوللارینی ازل باغلا دیلا ویرم دیلر سو
سوسوزدان اودلانوب اطفالِ خردسالی حسینون
کفن سالوب اوزی اَل چَکدی اکبرین دن او سَرور
گوزی باخا باخا ئولدی او مَه جَمالی حسینون
دوتولدی قاسمه بير طُوی آدی و لیک او طُویدا
هامی حَرم لَری اُولدی باشی قَرالی حسینون
الینه زلفنه قانین خضاب ایلدی داماد
اَجَل کمندينه صيد اولدی اول غزالی حسینون
سو اوسته قولّارینی ویردی شوق اوزیله ابوالفضل
که بلکه رفع اولا بو باره ده ملالی حسینون
نَقدر جَهد ایلدی بلکه مَشکه دگمیه پِیکان
خجالت اُول ميا اُول مرتضی مثالی حسینون
ورولدی مَشکنه اوخ آخدی سو چو اشگِ سکینه
دویوب حیاتِ جهاندان او خوش خصالی حسینون
سو ممکن اولمادی، بو نقص دن اوزین ئولوم يله
خلاص ایتدی او سقّای باکمالی حسینون
يتوردی خیمه ده قارداشا پیکِ آهله پِیغام
که صُون نَفَسده نصیبی اولا وصالی حسینون
الی بیلنده یتشدی باشی اوسته سرورِ مظلوم
گورنده نعشنی قول سوز پوزولدی حالی حسینون
اَل اوسته اصغرینی اوخ لادیلا فرقهٔ باطل
مگر گناه ایلمشدی او نِطقی لالی حسینون
ئولوب کمکلری قالدی امام او عرصه ده یالقوز
همان او دمده يتوب نوبتِ قتالی حسينون
چوخ آختاروب ئولوم، آختاردیقین تاپوب آخر
دوتولدی گون یتشوب گون کیمی زَوالی حسینون
سو ایچ مدی سو کنارینده ویردی جان سوسوز ئولدی
اولوبدی قانلی او گون زَمزَمِ زُلالی حسینون
توكولدی خیمه لره اهلِ کوفه آتلی پیاده
تالاندى ظلمیله اول خیمهٔ جلالی حسینون
سويولدی آل پیغمبر بیوک کیچیک هامی یکسر
گیدوبدی غارته جمله منال و مالی حسینون
وُرولدی خیمیه اود یاندی خیمگاهی او شاهون
داغیلدی چوللره آهو کیمی عیالی حسینون
دچار اولوب حرم آهولری کمندِ جفایه
اولوبدی عازمِ شام اهلبیتِ عالی حسینون
کفاف دور بو بیان (شانیا) دایان داخی یازما
بونی اینان که بودور مقصد و خیالی حسینون
شفاعت ایلیه محشر گوننده امّته یکسر
یاز آغلا عرض ایله وار ای شه عرض حالی حسینون
- جمعه
- 12
- شهریور
- 1400
- ساعت
- 22:50
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه