شهپرون گوتور روزِ وصل دور
حایل اولماسون یاره جبرئیل
کوی یارده خوش گلور منه
دگسه هر قَدَر یاره جبرئیل
موعدم ازل گونده یاریلن
ایلیم منا کربلانی من
شهپرون گوتور مَحرم اولموشام
نیلورم بو گون سایبانی من
سو کیمی آخان قانیله گرک
زینت ایلیم بو منانی من
کعبه نی طواف ایلیوب یِتَم
جلوه گاهِ دیداره جبرئیل
سعیله صفایه یتورموشم
جِدّ و جهد ایدوب جسم و جانیمی
بسکه اوخ دگوب قان گئدوب آلوب
الدن اختیار و توانیمی
مَروه ائتمگیم بو سورونم گیم
حجّ ختم توکسونله قانیمی
وصلِ یاردن غیره یوخ منیم
دردیمه اولا چاره جبرئیل
ویرمه شهپرون اوخ قباقنه
شوقدن گوگل بیقرار اولور
یاردن اوتور بسلنوب بدن
باش ویرور بدن خاکسار اولور
کوی یارده شوقیله سوسوز
جان ویرور حسین، جان نثار اولور
وقتِ ظهر دور قان وضوسی دور
سو یِرینه رُخساره جبرئیل
شهپرون گوتور نوبهاریمه
صرصرِ خزان وقت دور اَسَر
نِی کیمی ایدر ناله عندلیب
ناله سی ایدر عالمه اَثَر
چکملی چیخار سینم اوستونه
شمرِ دون سوسوز باشیمی کَسَر
خیمگاه یمی یاندیرار، جفا
ایلر آلِ اطهاره جبرئیل
شهپرون گوتور قوی وورا عدو
وورسا هر قَدَر فرقه ظُلَم
لشگریم سینوب بیرقیم یاتیب
صاق دگل ئولوب صاحِبِ عَلَم
مشگی اوخلانوب جسمی دوغرانوب
باش سینیب اولوب قوللاری قَلَم
قالمیوب داخی یار و غمگسار
بیر نفر بو غمخواره جبرئیل
شهپرون گوتور قوی وورا عدو
چون اُلوب هامی یاوریم سوسوز
ظلمیلن الیم اوسته اوخلانوب
جان ویروب علی‌اصغریم سوسوز
قاسمین اولوب طوی حناسی قان
جان ویروب علی اکبریم سوسوز
یاس اولوبدی طوی، نو عروسِ زار
باشینه سالوب قاره جبرئیل
شهپرون گوتور زخمِ نیزه و
تیردن منی ایتمه بی نصیب
چاک چاک اولوب جسمِ اطهری
عون و فضل و هم جعفر و جبیب
غربت اولکه ده، کوی یارده
تشنه لب ویرم منده جان غریب
غارته گیده خیمه لر تمام
گُل اسیر اولا خاره جبرئیل
شهپرون گوتور دوغراسون منی
تیغِ کینلن لشگرِ جفا
باشیمی کسوب شمرِ دون منیم
ایلسون سَنان زینت جِدا
اوچ گون اوچ گیجه قانلی پیکریم
بی کفن قالا خاک و خون آرا
بو گیجه گیده بو باشیم قوناق
خولیِ ستمکاره جبرئیل
(غمگین) ایلیوب شیعه نی غمیم
حشره دین ایدر درده مبتلا
نوحه ایلیوب هر کیم آغلیا
آغلادا دوتا یا منه عزا
حشرده اونی قویمارام ملول
منده ایلرم عهدیمه وفا
چونکه یارلن عهد ائتمیشم
شیعه یانماسون ناره جبرئیل
- جمعه
- 12
- شهریور
- 1400
- ساعت
- 23:13
- نوشته شده توسط
- یوسف اکبری
ارسال دیدگاه