عالمده قالمیوبدی صداقت نشانه سی
نه شرم و نه حیا و نه حرمت نشانه سی
من گلمیشم که عزت اسلامی آرتورام
آرتور عوض به عزته ذلّت نشانه سی
من هر چه ایستورم که سیزه یاخشیلیق ائدم
سیزدن گلور بروزه عداوت نشانه سی
معلومیدور سیزه که بو عالمده بیر منم
نور امامتیله رسالت نشانه سی
من گلمیشم محبته اما بودور عوض
یوزمین علم تیکوبسوز عداوت نشانه سی
واجب ائدوب اطاعتیمی چون سیزه بابام
آیا بودور رسوله اطاعت نشانه سی؟
مشهوریدور دیلّه عرب چوخ غیور اولار
سیزدن ندن گورونموری غیرت نشانه سی؟
اوچگون سوسوز قویوبسوز عیال پیمبری
آیا بودور عربده سخاوت نشانه سی؟
رنگی قاچوب دوشوب چوخورا گؤزلری تمام
اطفالیمه یتوبدی هلاکت نشانه سی
یؤخدور یوزوم که بیرده عیالیم یوزون گؤرم
چون یؤخدی سو واریمدی خجالت نشانه سی
بیلدوز نقدر ایلدوز اصحابیمی شهید؟
پیغمبریله شاه ولایت نشانه سی
گؤردوم شهید ایلدوز اصحابیمی تمام
یؤخ بو غریبه کیمسه ده نصرت نشانه سی
ناچار بیر جوانیمی میدانه یولّادیم
خُلقیله خَلقی ختم نبوّت نشانه سی
بیلّم که دؤغراسوز بوجوانی بوغوم بوغوم
یؤخ بیر نفرده رحم و مروّت نشانه سی
اکبر یانیندا اصغریمی اؤخلاسوز نه باک
عدلین شفاعتنده شهادت نشانه سی
نه ظلم ایلسوز ائلیون،راضیم که چون
اولماز امام اولاندا شکایت نشانه سی
عادت اولوبدی همیشه عداوت ائدلّه خلق
هرکیمده اؤلسا خارق عادت نشانه سی
اکبر کیمی جوانیمی قیلدیم فدای دوست
هانسی نبی ده وار بو کرامت نشانه سی؟
گئتدی باشین قلیجلیالار تا علی کیمی
اولسون باشیندا تیغیله ضربت نشانه سی
ناچاردور دچار اولور اهل ضلالته
هرکیمسه ده که اولسا هدایت نشانه سی
هرکیم ازل قبول ائلیوبدور ائدر بروز
آخر گونونده صحّت فطرت نشانه سی
هر دردمند گئتسه سراغ طبیب ایچون
بی شک تاپار مزاجده صحّت نشانه سی
هرنوجوان اطاعت ائده بیزلره (دخیل)
واردور ائله جواندا سعادت نشانه سی
- شنبه
- 13
- شهریور
- 1400
- ساعت
- 11:39
- نوشته شده توسط
- یوسف اکبری
ارسال دیدگاه