گوزون آچ یاتما اویان دور علی قربانون اولوم
دور اوتور آز منی یاندور علی قربانون اولوم
منه بو دهریده هر فضل و کرامت سنیدون
عافیت بستری، بالینِ سلامت سنیدون
حُسنِ پیغمبره هر یرده علامت سنیدون
سنده بس بو نه نشاندور؟ علی قربانون اولوم
سن کیمی گوگلوم اِوین کیم بزر آرایش ایدر
منیله خوش دانیشوب حالیمه بخشایش ایدر
سنون عهدون کیمی هاردان آنان آسایش ایدر
چرخِ دون چوخ دولانان دور علی قربانون اولوم
سن منم خلق آرا سرمایهء تمجیدیمدون
بَختِ فیروزیم دون، دولتِ جاویدیم دون
هر نجه مشکلیم اولسیدی سن امّیدیم دون
ای امیدیم دور اماندور علی قربانون اولوم
بوندان ازّل ایشیدیردیم غمِ هجران آدینی
بیله بولمزدیم اوغول بو آجی زهرون دادینی
گوزون آچ گوز تانور آخر رُفَقادن یادینی
باخ بو بیچاره آناندور علی قربانون اولوم
یاتما توپراقلارا باتما دور اوتور اَگلن اوغول
بیر نچه کلمه منیم خاطریمه دللن اوغول
آنالیق حقّین اونوتما دئ دانیش منلَن اوغول
بیر سوزون قیمتی جاندور علی قربانون اولوم
آچ گوزون ای گوزیمون نور و ضیاسی گوزون آچ
منه گلسون او گوزون درد و بلاسی گوزون آچ
اوجالا قویما آنان ناله صداسی اوغلیم گوزون آچ
قلبیم آخر نگران دور علی قربانون اولوم
اوجادان آغلامارام اشکیمه عالم بویانا
قورخورام یاتمیش اولا طایرِ روحون اویانا
گَله لعنت منی اوز اوغلوما حسرت قویانا
نوجوان داغی یاماندور علی قربانون اولوم
بیر دقیقه نه قویولّار علی تأخیر ائلیوم
نه عبارت تاپیلور دردیمی تقریر ائلیوم
نه گلور فکریمه بیر چاره نه تدبیر ائلیوم
باغریم آخر دولی قاندور علی قربانون اولوم
بلبلم گُل سوزینی قویسالا مین ایل دیرم
بال و پَردن توکولن گوگلومه بِسمل دیرم
نقدر عجز ایدرم، دیندیررم، دل دیرم
دیمیسن بو نه فغان دور علی قربانون اولوم
من دوتاخ جبراً اوغول شامه گیدوب یتمه لیم
نظرِ مرحمت وندن نیه ترک ایتمه لیم
اذن ویر بیر دولانیم باشوه من گیتمه لیم
آز منی ساخلا یوبان دور علی قربانون اولوم
چون دیمز عاشق اولان کیمسیه دردِ دلینی
زنگِ غم، صحبتِ جانانیله دلدن سیلینی
آنالاردا اوغول اولادینه باغلار بیلینی
اوزووه بو سوز عیان دور علی قربانون اولوم
عشق تا گلمیه انسانون اوغول اوز باشینا
آخماز عاشق کیمی گوز یاشی اونون اوز باشینا
اَزبریم دور دیرم آدیوی هر سوز باشینا
گُور آنان درسی روان دور علی قربانون اولوم
یاریلوب باشون آخوب قان سرِ زلفون بولاشوب
آق یوزون، قاره تلون، قرمزی قان خوش یاراشوب
گوز یاشیم سیل کیمی بسکه آخوب باشدان آشوب
کیم دیر سیله دایان دور علی قربانون اولوم
من سنون خاطریوه گوگلیمی آباد ایدرم
هاردا بیر تازه جوان اولسا سنی یاد ایدرم
یازسا نوحه سنه (هندی) اونا امداد ایدرم
چون اونا وردِ زبان دور علی قربانون اولوم
- شنبه
- 13
- شهریور
- 1400
- ساعت
- 11:41
- نوشته شده توسط
- یوسف اکبری
- شاعر:
-
مرحوم هندی تبریزی
ارسال دیدگاه