گل باجی آل بالامی ، اوخلاندی قان آپاردی
جان ویردی اللریمده ، آرامِ جان آپاردی
بیرده گلم خیامه گلمز باجی یوزومدن
اهلِ دل اولسا آنلار احوالیمی سوزومدن
بیر حاله قالمیشام من ، مأیوسم اوز اوزومدن
اصغر غمی دلیمدن نطق و بیان آپاردی
گل آل آپار آناسی ویر اوخشاسین بالاسین
اطرافنه دئ یغسین هم خویش و اقرباسین
دوتسونلا اصغریمون اکبر کیمی عزاسین
چون اکبریمدن آرتوخ مندن توان آپاردی
سو اولمادی آناسی ویرسین بو طفلِ زاره
گل تک سارالدی سولدی ، یاندی بو شیرخواره
چوخ اینجیدی سوسوزدان گوردی یوخ اوزگه چاره
اوچ شعبه لی خدنگه آخر امان آپاردی
چون حرمله بالامی گوردی ویرور سوسوز جان
گوندردی پیشوازه بیر آبدار پیکان
دوتدی دمِ خدنگی شوقیله بو لب عطشان
پستان یرینه امدی ، بیله گمان آپاردی
سسلندی اوخ گلنده بولمم بالام نه قاندی
آلدی اوخون صداسین وحشتله بیر اویاندی
اوخ حلقینه توخوندی القانینه بویاندی
قان یاره سندن آخدی ، هوشه بیر آن آپاردی
آچدی گوزون یوزیمه باخدی تبسّم ایتدی
آلمیشدی اوخ توانین هوشه دوباره گیتدی
پرواز قیلدی روحی ، وصلِ بتوله یتدی
بو طفلی شوقِ زهرا ، ذوقِ جنان آپاردی
منقارینه آلور بیر بلبل نجه گلِ تر
منده او نوعی ایتدیم بو طفلی زینتِ بر
واردور یری دیسونلر باجی منی گورنلر
بیر دسته قرمزی گل ، بیر باغبان آپاردی
هر گل آچار چمنده بیر مدّتی دایانی
ایلر باجی معطّر عطریله گلستانی
اما منیم بالامون بو غنچه لق زمانی
سولدوردی آب رنگین بادِ خزان آپاردی
بو چولده گوز یاشیم تک ، آب فرات آخدی
سوزِ عطش بالامی یاندیردی باجی یاخدی
گاهی گوزوم فراته گاهی بالامه باخدی
بو غم سو آبروسین تا وار جهان آپاردی
قویما (شهاب) الوندن دوشسون بو خامه بیجا
یاز نوحه آغلا ، ایسته ویرسونله نطقِ گویا
مرحوم اولان او (صافی) دم ویردی حالِ رؤیا
گوردون دئدی حسینه نوحه یازان آپاردی
- شنبه
- 13
- شهریور
- 1400
- ساعت
- 12:19
- نوشته شده توسط
- یوسف اکبری
ارسال دیدگاه