تخمیس از شعر مرحوم عبدالعظیم ذهنی زاده
تأثیر ائلدی داغِ دیلیم داغ داشا قارداش
سیلابِ غم آز قالدی کی باشدان آشا قارداش
قارداش ئولومی مشکل اولار قارداشا قارداش
چاتمیش یارالی سینه ده اوخ باش باشا قارداش
بو باش باشا چاتماق وئریب عمری باشا قارداش
بو قافِ محبّت ده کی عنقادی برادر
اولدی ستمِ فرقهء کین پروره خو گر
چوخ سعی ائلدیم کامه یئته آلِ پیمبر
بس کشمکش ائتمیش دی علمداریله لشکر
بو کشمکش آخرده دایاندی باشا قارداش
عمروم چراغی سنله یانیب، سنله ده سوندی
سنله واریدی عالَمیمیز حیف اودا چوندی
تا جلوهء جانانه بو قان ایچره گوروندی
گوز یاشی، اورک قانی آخیب دجلیه دوندی
آز قالدی کی قان دجله سی باشدان آشا قارداش
ظلم اهلی بیر اود ظلمیله بو خرمنه ووردی
چوخ صدمه لر افسوس گُل و گلشنه ووردی
سعد اوغلی شماتت اوخون اوّل سنه ووردی
هر کیم نه سلاح الده واریدی منه ووردی
هر بیر بوش الین گلدی گمانی داشا قارداش
تیغ الده دوروب دشمنِ دون پیش و پَسیمده
قالدی نگران سن کیمی فریاد رسیمده
روحیم قوشی فریاده گلیب دور قفس یمده
قارداش دئمیرم گَل منی گور سون نفس یمده
یول خاطرینه لطف ائله بو یولداشا قارداش
خونِ دیلیله کاسهء چشم اولد لبالب
دردین بیلیرم چوخدو حسین اولما معذّب
گلمه سنه قربان، ای اورک چرخینه کوکب
گلسن ائله گل بیلمه سین احوالیمی زینب
گوز تیکمیشدی من، یئخیلان قارداشا قارداش
نقشِ رُخِ جانانی نظرده ائله تصویر
سوز چنگ وورار دیللره گر اولماسا تزویر
اشعار (شهاب) اودی ایلیر دیله تأثیر
بو مصرعی (ذهنی) نه گوزل ائیله دی تقریر
چاتمیش یارالی سینه ده اوخ باش باشا قارداش
- شنبه
- 13
- شهریور
- 1400
- ساعت
- 12:28
- نوشته شده توسط
- یوسف اکبری
ارسال دیدگاه