شیعه لر قان آغلیون صاحب زمان اغلار بوگون
حضرت صادق غمینده قدسیان آغلار بو گون
باد ظلمیله گل گلزار بیغمبر سولوب
صادق آل محمد زهریله مسموم اولوب
گر دیسم زیبنده دور زهرا بو گون زلفین یولوب
عالم معناده میر مومنان آغلار بوگون
بغضیله منصور نور وحدتی خاموش ایدوب
پیشوای دین حق جام شهادت نوش ایدوب
جعفری مذهبلری محنتله هم آغوش ایدوب
گوز یاشی گوزدن توکر اهل جهان آغلار بو گون
باعث ایجاد عالم حامی دین خدا
نور یزدان مظهر توحید سبط مصطفا
مذهبه رونق ویرن دینه بویوک بیر بیشوا
درک ایدوب فیض شهادت انس و جان آغلار بو گون
شور محشر شهر یثربده بو گون اولدی عیان
وا اماما ناله سی خلقه اولوب ورد زبان
بوینی چگنینده توکردی گوز یاشی اسلامیان
تابعان حضرت صادق عیان آغلار بو گون
جان ویروب جانانه یتدی بو امام ممتحن
ایلدی اوز اوغلی موسی جسمینه غسل و کفن
اولدی چوخ اجلالیله تشییعینه چوخلی گلن
کربلا مظلومینی یاده سالان آغلار بوگون
قالدی اوچگون یرده گل جسمی یارالی بیکفن
اولمادی بیر کس او گون بیغمبر اوغلین دفن ایدن
گون ایوینده قانه غلطان قالدی یتمیش بیر بدن
بیله بیر احواله هر شیعه یانار آغلار بو گون
یتدی اوچ گوندن صورا بیماره چون فرمان حق
دفن اولونسون تا نقدری وار سوسوز قربان حق
کربلا صحراسینه اعجازیله سلطان حق
گلدی بو اعجازیدن آگاه اولان آغلار بوگون
بیر قبیله اهلینی گوردی ملول و دلفکار
قصد دفنیله گلوب اللرده حفر اسبابی وار
دفنینه اما او گل پیکرلرین حیراندیلار
بو سوزه اول جمع تک حیران قالان آغلار بو گون
باخدی اول بیر آتاسی نعشینه چکدی فغان
سویلدی ای بذل ایدن جانانینه لب تشنه جان
کربلانی ایتموسن اوز قانویله گلستان
یاسمن سرو سمن هر گلستان آغلار بو گون
بیر مزار اول شهریاره قازدی با شور و محن
گوردی لازیمدور اولا شاهانه بیر عالی کفن
قالدی حیرتده او گل جسمه کفن ایتسون ندن
بو مصیبتده تمام افلاکیان آغلار بو گون
امر ایدوب اول جَمعه سوز آهیله یالقوز امیر
بیکفن دفن اولماسون مقتول اشرار شریر
تاپدیلار اول دشتیده زحمتله بیر پاره حصیر
قبره شه جسمین حصیریله قویان آغلار بوگون
گوردی لیلانین علی اکبر اوجالدوب باشینی
گل کیمی خندان اولوب توکدی یوزه گوز یاشینی
دفن ایدوب پائین باده اول جوان قارداشینی
ایمدی اول ششگوشه قبره هر باخان آغلار بو گون
سن امام صادقه صدقیله (اشکی) دوش دخیل
حاجتین ایلر روا فورا او میر بی عدیل
نا امید ایتمز او شهدور سن اونا نوکر ذلیل
اولسا گر نومید سائل شاهه دور نقصان بوگون
- شنبه
- 13
- شهریور
- 1400
- ساعت
- 12:46
- نوشته شده توسط
- یوسف اکبری
- شاعر:
-
حاج مجید اشکی تبریزی
ارسال دیدگاه