شاهد اول یارَب الیمده اصغری عطشان گتوردوم
اولموشام شرمنده سندن تحفهء ارزان گتوردوم
شوقیله منای عشقه اصغری عطشان گتوردوم
سن بلورسن گیچموشم من سندن اوتری اکبریمدن
بیر نه یالقوز اکبریمدن عون و فضل و جعفریمدن
کشف اولور حالیم الهی ایمدی حال اصغر یمدن
آلتی آیلوق طفلی ایمدی کوی وه قربان گتوردوم
درد فرقتدن جهاندا بسکه یارَب جانه گلدیم
آتش هجراندا یاندوم ناله و افغانه گلدیم
اصغری گوتدوم الیمده درگه سلطانه گلدیم
بیر محقّر ارمغان دور دستهء ریحان گتوردوم
چوخ ریاضت لرچکوب تا یتموشم من بو مقامه
شان و قرب اصغری گوسترّم ایمدی اهل شامه
اهل شامه چوخ دیدیم هر حجتی یتدی تمامه
من الیمده اصغری بیر گل کیمی خندان گتوردوم
حالینی بلّم اوزوم تک حال زار زینب یمدن
خیمده آغلارحرملر ایمدی بیر بو مطلب یمدن
اصغریم الده درون دلدکی تاب و تبیمدن
اصغرین قویدوم آناسین خیمده گریان گتوردوم
تنگ ایدوب لر عرصه گاهی لشکر کافر حسینه
ظلمیله قویموبلا قالسین بیر نفر یاور حسینه
خوشدی مین دفعه یولوندا اوخلانا اصغرحسینه
ایتماقا قانین بو چولده زینت میدان گتوردوم
کربلا دشتی حسینه محفل خلوتدی یارب
اوخ قاج خنجر یاراسی باعث عزتّدی یارب
اصغریم قانه بویان سا عشقیده لذّتدی یارب
بو امیدیله خوشام من فدیهء جانان گتوردوم
یاندورار حالی ربابین بلورم کلّ جهانی
دوشسه گر روی زمینه اصغرین بیر قطره قانی
اوجوما آلام او قانی سرخ قیلاّم آسمانی
عرض قیلاّم شاهد اول بو اصغری آلقان گتوردوم
سن اوزون آگاهسن وار دلده چوخلی درد و محنت
الدورو پیغمبر او غلین ظلمیله بو عاصی امّت
لیک بو اوغلوم (ثرّیا) آغلور ایلور دینه خدمت
سویلوری درگاهوه من دیدهء گریان گتوردوم
- شنبه
- 13
- شهریور
- 1400
- ساعت
- 21:29
- نوشته شده توسط
- یوسف اکبری
- شاعر:
-
مرحوم ثریا تبریزی
ارسال دیدگاه