خورشیدِ دل افروزِ جهانِ بشریّت
تاپدی صمدیّتده نشانِ احدیّت
تجریدِ محبّتده گورر روحِ مجرّد
مغربدن ایدوب مشرقه خورشید عقبگرد
مطبخده کول اوسته ایدوسن گاه تجلّی
گاهی گیدوسن داره بِمانند مسیحا
هر چند مسیحایه عوض اولدی یهودا
قربانی قرآنه یقیناً عوض اولماز
جوهرده تجلّای جلای عَرَض اولماز
رؤیادی و یا اینکه حقیقتده توهُّم
یا عشق طبیعتده تاپوب حقِ تقدّم
گلمیش بو کسلموش باشا نیروی تکلُّم
بولدوم که فقط بسته دی بو قدرتِ عشقه
قرآن اوخی سال ولوله شامات و دمشقه
بیر گون بیله ای گون قالا مشکلدی بو حاله
گون آی کیمی بیر گون اولا تشبیه هلاله
کولدن چکیله دوره سینه پرده و هاله
اوّلده منه واضح اولونموشدی بو مطلب
ای وای یارالی سنه قربان اولا زینب
زهرا قیزینی کوفه لیلر یاخشی تانولّار
چون بولَهب ایمدی تبِ تَبّتده یانولّار
اولدوز کیمی بیر عدّه دالونجا دولانولّار
یولّاردا غبارِ غم و درده بورونولّر
بیر عدّه اوغول سوزدا دالونجا سورونولّر
ای مرشدِ کامل سنه هر یرده مریدم
ای آیتِ امید، سحرگاهِ امیدم
نومیدم اگر بستهء بیدادِ یزیدم
بو نهضتی تعقیب ایدوب اتمامه یتورّم
حتماً بو رقیّه قیزیوی شامه یتورّم
شاماته یارالی گیدرم ولوله سالّام
سودای محبّتده مگر فکریده قالّام
بیر گل ساتارام شامیده بیر پیرهن آلّام
من پیرهنِ یوسفی کنعانه گتورّم
محنت زده یعقوبه گوزوم اوسته یتورّم
قارداش باجیوین شامده برنامه سی واردی
هنگامهء عشقین گینه هنگامه سی واردی
زهرا آنامون من کیمی علّامه سی واردی
بو کوفه ده الهام آلارام نطقِ علیدن
تاریخِ فصاحت دیه تا زینبه احسن
آهنگِ شباهنگ ایدرم مثلِ شباهنگ
عشق اهلینه بو عیبدی اصلاً، اولا دلتنگ
اولّام یارالی باشیله قارداش سنه همرنگ
بیر تازه قانه سن باتاسان منده بویانّام
ویرّام باشیمی محمله منده یارالانّام
گوز یاشیمی مانندِ شفق قانیمه قاتدیم
باشون کسیلوب باشداکی باش فکرینی آتدیم
بو کوفه ده ایوای منه زنداندادا یاتدیم
الله بولوری اوردا عجب گونلره قالدیم
قارداش بولوسن بیر گونون عرضینده قوجالدیم
زینب هارا؟ زندان هارا؟ گور من هارا گیتدیم
اما گینه زندانیده مقصودیمه یتدیم
زهرا آنامین آغلاماقین بیرده ایشیتدیم
قارداش عجب آماله یتوب آلِ امیّه
قرآن اوخی ویر تسلیت، آغلور بو رقیّه
سن عالَمِ عرفانیده تاجِ عُرفاسن
نای نِی عزّتده سخن سازِ خداسن
لب تشنه ئولن پادشهِ کرب و بلاسن
یوخ صبریمه معیار منیم صبر داشیندا
سرلشگروین باشی هانی نیزه باشندا؟
دنیا گوزی گورموبدی که بیر دفعه گولیدیم
کامیمده اونون لذّتینی منده بولیدیم
ای کاش حسینیم سن ئولونجه من ئولیدیم
باخ بیرجه ربابون گوزینون یاشینه قارداش
باخدوقجا جداده صود امر باشینه قارداش
لیلایه دئدیم سیلِ سرشگون یوزه باغلا
آغلا بو یانان قلبیمی نارِ غمه باغلا
عذر ایستمه مندن نقدر آغلاسان آغلا
آخر نجه من ایتمیوم اظهارِ تمایل
اکبر باشیدی محملِ لیلایه مقابل
هر قلبدن آگاهسن ای واقفِ مطلب
بو (هادی) غمدیده نی غم ایتدی معذّب
لطفاً نظرِ لطفوی کسمه سنی زینب
هر قدر مصیبت ویره یوز هیچ سوزوم اولماز
آخر بابا هر قلبیده سن تک دوزوم اولماز
- یکشنبه
- 14
- شهریور
- 1400
- ساعت
- 12:18
- نوشته شده توسط
- یوسف اکبری
- شاعر:
-
مرحوم هادی تبریزی
ارسال دیدگاه