ای رواقی عرشه زینت یاعلی موسی الرضا
جنّت اهل حقیقت یاعلی موسی الرضا
مرقدین تشبیه قیلدیم جنته ائتدیم خطا
هاردا جنت ده اولار سنده اولان عشق و صفا
روضهء رضوان هارا، بوجانفزا قبرین هارا
رشک ائدر بو شانه جنت یاعلی موسی الرضا
بارگاهین اهل عشقه قبله گاه عشق دیر
سالکان کوی یاره شاهراه عشق دیر
جمله عشاقه بو قبرین جان پناه عشق دیر
کیمده واردیر بوجلالت یاعلی موسی الرضا
طور سینای حقیقت دیر او خاک بی بدیل
من غلو ائتمم بو سوزده چون که وار الده دلیل
خضر و عیسی و کلیم و آدم و نوح وخلیل
ایلییر عرض ارادت یاعلی موسی الرضا
ای شه گردون مدار ای عالمه پشت وپناه
التجا ایلر سنه بو دردمند بی پناه
گوشهء چشم یله قیلسان حالینه بیر دم نگاه
دردینه ایلر کفایت یاعلی موسی الرضا
عرش اعلانی قویوب تحت الشعاع ده ارض طوس
چون چکیب آغوشه سن تک شاهی ای شمس الشموس
قصد قربتله اولوب ارواح یکسر خاک بوس
تا ائده کسب شرافت یاعلی موسی الرضا
لطف ربّانی ایدوب دور مرقدون مشکوی عشق
قبریوی طوف ایلمز تک حاجیان کوی عشق
درگهون تپراقینه سُورتر ملک لر روی عشق
یوخدی بیر کس ده بو حشمت یاعلی موسی الرضا
ظاهرا گرچه مزارین شیعیه اولموش مطاف
لیک باطینده دئسم بوسوز یقین اولماز خلاف
ایلییر جنت دن اعلا قبریوی عالم طواف
چون که سن سن باب حاجت یاعلی موسی الرضا
بیرائله عزت سنه لطف ایلییب دیر لایری
ریزه خوارین ماسوادیر گردئسم اولماز خطا
هانسی شاهین درگهینده واردی بیر بیله گدا
ای اولان کان سخاوت یاعلی موسی الرضا
اولدی مجنون لیلی تک بیر گول عذارین عاشقی
عندلیب اولموش چمنده لاله زارین عاشقی
اولموشام منده سنون تک شهریارین عاشقی
وار سنه دلده محبت یاعلی موسی الرضا
نئچه مدت دیر اسیر بند هجران اولموشام
روز و شب نی تک انیس آه و افغان اولموشام
خاطر مجنون کیمی زار و پریشان اولموشام
دلده وار دور شوق وصلت یاعلی موسی الرضا
صبریمی الدن آلیب دیر شوق دیدارین سنین
ای گل زهرا خوشام اولسام اگر خارین سنین
میل جنت ایلمز کیم اولسا زوارین سنین
ای وئرن جناته زینت یاعلی موسی الرضا
وار گورورسن سوز عشقیندن اورکده اشتعال
مایهء فخریمدی بو آتش ده یانماق ماه و سال
ظل عشقونده سنین ای خسرو شیرین مقال
تاپموشام عزّ و وجاهت یاعلی موسی الرضا
لذت وصلی نه آنلار عشقیدن بیگانه لر
شمع حُسن یاریله روشن اولار کاشانه لر
یانماقین مشقین گرک مندن آلا پروانه لر
واردی دلده سوز حسرت یاعلی موسی الرضا
هر کیم عالمده اگر اولسا گرفتار محن
اوز قویار درگاهیوه عجزیله ای شاه زمن
اولموسان مشهور شاها ضامن آهویه سن
مشتهر دور بیله شهرت یاعلی موسی الرضا
سن اوشه سن که پناهنده اولوب آهو سنه
گوز بالا هجرینده قان جاری ائدردی دامنه
کینهء صیادیدن محبوب حی ذوالمنه
دل آچیب ائتدی شکایت یاعلی موسی الرضا
آرزوسین سن او آهونین اجابت ایله دین
شادقیلدین گویلونی رفع ملالت ایله دین
بچه آهونی گلیب آلدین ضمانت ایله دین
کیم گوروب بیله کرامت یاعلی موسی الرضا
دام عشقینده گرفتارم سنین تیهو کیمی
شوق وصلونده اوچار گویلوم قوشی یاهو کیمی
اولموشام منده پناهنده سنه آهو کیمی
حشرده ایله ضمانت یاعلی موسی الرضا
یازدی بو اشعاری (نادم) غرق دریای خطا
ایلدی شرکت (نویدی) اول رفیق با وفا
اجرینه لطف ایله شاها بیر برات کربلا
قیل کرم ایله عنایت یا علی موسی الرضا
- یکشنبه
- 14
- شهریور
- 1400
- ساعت
- 12:44
- نوشته شده توسط
- یوسف اکبری
- شاعر:
-
حمید محرمی نادم تبریزی
ارسال دیدگاه