هلالِ غم گورونوب باشلانوب عزاسی حسینون
باتوب عزایه گلوب ناليه آناسی حسینون
چکوبله قُبهٔ اَفلاکه چادرِ نیلی
آچوبدی پرچمِ محنت عزا لواسی حسينون
مُنادی، حضرتِ جبریل دور بو ماتمده
ایدر نِدا که گلون باشلانوبدی یاسی حسينون
قرا لباس گیون، ایولره چکون قاره
قرادی زینتِ بزمِ غمِ بُکاسی حسینون
چوخ آغليون چوخ ایدون ناله چوخ فغانه گلون
که شوریلن دولاتا بزمِ غم فزاسی حسینون
آناسی آغلوری هر دم دیور سوسوز بالا وای
يوزونده زلفی باشندا عزا قراسى حسينون
ادب ملاحظه ایله سرین سو ایچمه بو آی
ایشتمیسن که گلور العطش صداسی حسینون؟
اوزی حرملری شش ماهه اصغری یانوری
بالیق کمی چابالور سود امر بالاسى حسينون
یاخوب دی زلفنه دامادی قان حنا یرینه
تاپولموری سو یووّل سون او قان حناسی حسینون
گیدوب فراته گتورسون سو اولمیوب ممکن
حیا ایدور گَله سقّای کربلاسی حسینون
ایکی الین سویا وورمشدی، فوری قانیلن
همان سویی یودی اول یارِ با وفاسی حسینون
دئدی سویا دگن اللّر منه نه لازم دور
بو اللّر اولميه، چوخ حیفدی فداسی حسينون
خيامه گیتمدی بولدی سکینه عطشان دور
سو انتظاریدی اُول زارِ مُبتلاسی حسینون
ببر اوخلی مشگه ایکی ال ایدوب ضمیمه دئدی
بو دور بو پاره اولان مشگنون بهاسی حسينون
دوشنده توپراقا سسلندی یا حسین ئولورم
خمیده لَندی او سسدن قدِ رساسی حسینون
الى بیلنده حسین گلدی نعشینی آپارا
هزار حیف اله گلموبدی مدّعاسی حسینون
گوروب او قدر دگوب یاره گُل کیمی داغیلوب
ير اوسته نقش اولوب اول سروِ دلرباسی حسینون
اوتوردی باش طرفنده باشین آلوب دیزینه
اوجالدی شیونیلن بانگِ وا اَخاسی حسینون
اگیلدی خم قديله، قویدی گُل یوزون یوزونه
بوياندى قانیله رخسارِ کَهرباسی حسینون
بویوردی قارداش ابوالفضل ازوم سنه قربان
سن ئولدون، اولدی خرابه هامی اساسی حسینون
(شهاب) الونده قلم گلدی نالیه قورتار
تمام اولان دگی هرگز بو ماجراسى حسينون
- یکشنبه
- 14
- شهریور
- 1400
- ساعت
- 13:41
- نوشته شده توسط
- یوسف اکبری
ارسال دیدگاه