ای جماعت من گلِ گلزارِ ایمانم بیلون
دین گلستانی نده بیر سروِ خرامانم بیلون
شاهبازِ اوجِ عزّت، آشیانیم فوقِ عَرش
طایرِ فَرخنده سِیر باغِ رِضوانم بیلون
اصلِ فطرتده قُریشم، نسلِ پاکِ هاشمی
چرخِ عزّت بُرجی نه بیر ماهِ تابانم بیلون
چون حَسَبده اِبنِ عَمَّم، مُصطفی دلبندیم
هم نَسَبده دین ایچون مَرصوص بنیانم بیلون
حمزه دور عَمّ کباریم، شاهِ اقلیمِ وفا
مسندِ تختِ وفاده مَنده سُلطانم بیلون
بیر عَموم شهبازِ جنّت، جعفرِ طیّاریدور
بارگاهِ رَفعته شَمعِ شَب ستانم بیلون
وار جَلالیم، ابنِ عَمِّ کربلا سلطانی نه
جانشینِ میرِ بطحا شاهِ دورانم بیلون
گوشوارِ عرشه نائب، مُسلمِ ابنِ عَقیل
منزیل تده آصفِ مُلکِ سُیلمانم بیلون
گوندورب دی چون منی مصرِ بلا بازاری نه
گلمیشم ، بیر یُوسفِ یَعقوب کَنعانم بیلون
ایتمیون هیچ اوزگه فکر، ای لشکرِ فرعون یان
سیزلره دریا یاران مُوسی ابنِ عُمرانم بیلون
اولموشام شیرِ خداونده شجاعت وارثی
دهریده قائم مَقامِ شیرِ یَزدانم بیلون
قالعِ خِیبر علیِّ المُرتضا دور لّافتا
من داخی قلّاعِ رُکنِ قُومِ سُفیانم بیلون
جوش ایدوب دعوا گونی دریای قَهرِ سِطوتیم
گر تلاطم ایلسم دریای عُمّانم بیلون
رَعد تک اولّام خُروشان، چرخه سالّام اضطراب
عرصه گاهِ رَزم یده بنیاد طُوفانم بیلون
هیبتی ندن نَعره مون لرزاندی دوقّوز کوهِ قاف
معرضِ جَنگاه ایچینده شیر غُرّانم بیلون
صف شکن، اعدا فکن، ضَرغامِ صَحرای نبرد
دُشمنه هیجا گونون ده مَردِ مِیدانم بیلون
ای اولانلار ظاهراً اسلام، باطین ده یَهود
یوخ مگر انصافوز آخر من مسلمانم بیلون
وورمسوز اُول قَدر یاره قان آچوب فَوّاره لر
طاقتیم یوخ لاله تَک اَلقانه غَلطانم بیلون
یوخدی باکیم ئولمگیمدن، وار باشیم دا عشقِ یار
اولسا مین جانیم اگر عَبّاسه قُربانم بیلون
کوچه لرده قالدی سَرگردان ایکی اوغلان لاریم
اونلارون احوالینه چوخ دیده گریانم بیلون
تا نفس وار وِرد و ذِکریم یاحسین دور یاحسین
گلشنِ ماتمده بیر (قمریّ) نالانم بیلون
- دوشنبه
- 15
- شهریور
- 1400
- ساعت
- 23:5
- نوشته شده توسط
- یوسف اکبری
ارسال دیدگاه