قرار و صبریمی آلمیش باشیمداکی شور
او شوریدن اورگیمده واریمدی بیر منظور
بودور خیالیم ایدم شرح عیدِ اضحانی
ندور بو قصّه بولون سون ندور بو قربانی
یتیشدی عالَمِ رؤیاده امرِ رَبّ جلیل
اوز اوغلینی کسه قربان رَهِ وفاده خلیل
گلوب خیالینه تردید گوردی رؤیانی
او دور همان گجه نون ترویه قالوب آدی
ایکیمجی گیجه گورنده اوزی دئدی صِدّق
آدی قالوب عرفه شکّیدن چیخوب مُطلق
اوچومجی گیجه دئدی هاجره او پیرِ نبیل
صباح منله قوناقی دور مِناده اسماعیل
ایشیتدی هاجر، اوغول صبح اولوب قوناخ گیده جاخ
او فکریله که اونی نچّه لحظه ترک ایده جاخ
بونیله بیله دییه بولمرم آنا یاتدی
یوخودادا دیمه بو فکری باشیدن آتدی
گلور خیاله بو حالیمده لیلِ عاشورا
او گجه نی نجه صبح ایتدی بینوا لیلا
بولوردی اکبری صبح اولسا قانینه بویانور
آنا اولان مگر عالمده بو غمه دایانور
همین که بیکس امامین مرامینی سِچدی
اوتوردی صبحه کیمی اوغلونا کفن بیچدی
خیالیده باشا اکبر قراسینی سالدی
علی علی دئدی بیر ایل گجه اویاق قالدی
نه بیر آنا گورونوب بو جهاندا لیلا تک
نه بیر اوغول او شبیهِ امیرِ بطحا تک
او واقعه که بو با جا گریزه اولدی سبب
گرک تعاقب اولا، ناقص اولماسین مطلب
او دم که یتدی باشا شامِ وصلِ اسماعیل
او صبحِ فرقت اولوب تیره بیر شبه تبدیل
بیاضِ گَردنینی تا نشان ویروب خورشید
دوزوب او گردنه هاجر بیر عقدِ مُروارید
توکردی دانهء اشگین یوزینه گوهر تک
یاناردی اوز اودونا اودلانان سَمندر تک
ادبلی اوغلونا زیبنده زینت ایلردی
اورگی تک الی گر چه اسردی تترردی
ویراری زلفینه شانه او تتریَن الینن
او طولِ قصّه نی ختم ایلرم بو مُجملینن
آنا گوروب آتا کاردیله ریسمان ایستر
وجودی رَعشه دوتوب بیله بولدی جان ایستر
سؤال ایلدی بو باره ده او سَروردن
اساسِ مطلبی مستور قیلدی هاجردن
جواب ویردی اورکدن شکاره میلیم وار
پیچاقیله ایپی لازم بیلّوله اهلِ شکار
شکار ال ایاقین باغلاماقا اولسا رَسن
بو کاردیله کسرم باشینی شکارین من
بونیله بیله گینه دوزمیوب آنا اورگی
باخاردی اوغلونا تترردی استخوان و رَگی
و لیک لیلی اوغول گوندرنده میدانه
اورک ویروردی اوزی اول جوانِ عطشانه
دییردی گیت اوغول الله یولوندا قربان اُول
بو شاهِ تشنه لبانه مطیعِ فرمان اُول
نقدر گُل جسدون یاره سی چوخ اولسا خوشام
اوخیله زخم، دمِ خنجریله دولسا خوشام
مرارتِ غمِ هجرون دآیمه خیال ایدرم
گورنده جسمیوی باشسیز سنی حَلال ایدرم
گلوب او دم که باخوب نعشیوه کباب اولدوم
او وقت بولّم اوغول منده کامیاب اولدوم
خلاصه گتدی منایه خلیل دلبندین
خدا بیلردی مرامین او آرزو مندین
ازَل او گوردوقی رؤیانی ایلدی اظهار
عجبدی اولمادی راضی که ایلسون تکرار
ادبله عرض ایلدی اُول مُطیعِ حکم الله
اولان قضیّهء اِنّی اَرایه خاطرخواه
بابا اونا که سنه امر اولوب ایله اجرا
بو تزلی قیله تاپارسان منی قضایه رضا
ایاقیمی الیمی باغلا ای بابا مُحکم
باشیمی کسگیله تا یتمسون وجودیوه غم
کسنده باشیمی شاید گتورمیَم طاقت
ایاقیمه الیمه ای بابا ویرم حَرکت
همی ایدم بابا من ترکِ اِحترام و اَدب
همی سنون اولا قلبونده اضطرابه سبب
مباد قانیم آخاندا دَگه بو دامن یوه
او قان سبب اولا گوردوقجه داد و شیون یوه
یوزیمی قوی قوری توپراقه ای بابا بیرده
که خوشدی گر اولا قربانِ حقّ یوزی یرده
اوغول ایاقین الین باغلادی طناب یله
پیچاقینی گوتوروب بی حد اضطراب یله
قوری یر اوسته گورنده یوزینی غملندی
ذَبیح حالی خلیلِ خداده گورسندی
آتا اوغول وارکَن وار حیاتیدن دویدی
اوغول بوغازینه بولمم نجه پیچاق قویدی
بوغاز کسیل مدی چکدی پیچاقینی کَرّات
او گوردوقی ایشه قالدی اوزی اورک دن مات
الینده کی پیچاقی غیظه گلدی ووردی داشا
بسانِ رشتهء دل داش کسیلدی یتدی باشا
اوغول باشینی گینه کسماقا هوس لندی
فصیح لحنیله الده پیچاقی سس لندی
خلیل امر ایلوری کَس، جلیل نهی ایدیری
دیمه که اوز باشینا سن پیچاق خطا گیدوری
گلوب تلاطمه دریای لطفِ رَبّانی
قبول اولوندی خدا درگهینده قربانی
آچیلدی بابِ کرم نازل اولدی جَبرائیل
گتوردی بیر قوچ او بی مِثل و بی عدیله بدیل
یتوردی دوست پیامین او پیکِ فَرخنده
بدل اگر چه دگلدی ذَبیحه زیبنده
ولی اولوبدی او ذِبحِ عظیمدن مقصود
عزیزِ فاطمه، زیبنده فدیهء معبود
اوغول فداسینی لایق بولوب حسین ایتسون
که تا هر ایکی جهاندا مرامی نه یتسون
اوغول رضاسیله قان ایچره ال ایاق چالسون
او حالی گورسون اوغولدان آتاسی کام آلسون
فدا اولوم سنه ای کوی عشق سلطانی
جهاندا سن کیمی کیم ویردی دوست قربانی
حرم سراسینه تا اکبرین سسی گلدی
قیزاردی رنگی بیله بیلدیلر که دینجلدی
کمالِ وجدیله گلدی اوغول باشی اوسته
گوووب نشانهء شَقُّ القَمر قاشی اوسته
رکابیدن چیخادوب اوز ایاقلارین بیردن
گوتوردی بیر یارالی پیکری قوری یردن
باسوب دی سینیه بیر نقدِ جانی جان اوسته
سالوب دی سروِ چمن، سایه، اَرغَوان اوسته
سپاه یدن او جنابه باخان بیله بولدی
گر اکبر ئولمَسَده وار یقین حسین ئولدی
قالوب یوزینده یوزی جان ویریردی ظاهرده
او حالی ذکر اولونور ایمدیده مَنابرده
پیمبر عطرین آلوردی اوز اوغلی اکبردن
گوتوردی توشهء دل مَظهرِ پیمبردن
او شاهزاده یوزیندن کنار ایدنده یوزین
غریبه منظره قیلم شدی شهریار اوزین
باخان گوروردی نه حسرتیله اکبرینه باخور
سرشگِ چشمی کیمی قان محاسن ندن آخور
دئدی جوان لارینه اکبری گَلون گوتورون
آناسینا بو یارالی جنازه نی یتورون
نجه گوتوردوله بولمم گُلِ وَرق وَرقی
خیمه قباقینه گتدیله تازه گُل طَبَقی
گینه رجوع ایدرم باشداکی یازدیقیم سوزیمه
او قصّه ختم ینی چون فرض بولمیشم اوزیمه
خلیل گتدی ذَبیحی سلامت و خوشحال
آناسینی یتیشوب گوردی مُضطرب احوال
آنا بالایه باخوب گلدی تازه دن هوسه
بالا آنا ایکی سی ویردیلر نفس نفسه
آنا اوغول بوغازیندا پیچاق یرین گوردی
محبّتین اثرین اهلِ عشقه بیلدیردی
دایانا بولمدی بی اختیار غشّ ایتدی
گلنده حاله باخوب بیرده هوشدن گیتدی
آنا اورگی اولورموش اگر بیله بی تاب
ندور بو باره ده منظور اولان سؤال و جواب
که بیر پیچاق یری گورماقیله بو حاله قالور
گیدور اوزیندن او حالینده مین خیاله قالور
اولیدی کول باشینا کاش فانی دنیانون
یتینده قتل گهه نُولدی حالی لیلانون
گوروب که اکبری میداندا قانه غلطان دور
خیال ایلدی بیر با صفا گلستان دور
که هر یارا باش آچوب سینه سینده بیر گل تک
اوزین ایتوردی شُور اوسته گَلدی بلبل تک
دیمه که محوِ گلِ سروِ بوستان اولدی
بسانِ بلبلِ شُوریده نَغمه خوان اولدی
دوشندی شاخهء گل اوسته باشلادی فریاد
چکردی داد دییردی اوغول ایوین آباد
گیچنکی عمریدن عالَمده بهره مند اولدوم
بابان یانیندا علی منده سر بلند اولدوم
تمام زحمتمین اجرینی بو گون آلدیم
یوزوم آق اولدی سن ئولدون باشا قرا سالدیم
بو قیلدیقون خدماته ئولونجه ممنونم
نه لیلیم، که سنون عشقویله مجنونم
بهارِ گلشنِ رویون خَزانه دوندی اوغول
سنیله من خوش اولان بیر زمانه دُوندی اوغول
اولام بو نشئه ده پرده نشین دگل جایز
گرک بیر عمریده صحرانورد اولام سن سیز
باشی قرالی، قولی باغلی، گوزلریم گریان
گیدم گرک دولانام شهرِ شامی سرگردان
دایاندی خامه دایان (صافیا) تمامه یتور
بو نامهء غمی ختم ایله خاصّ و عامه یتور
بو نوعِ شرحِ دل اولماز، بو قِسم نِطق و بیان
یازی لمیوب بیله شیرین وقایعِ قُربان
- چهارشنبه
- 17
- شهریور
- 1400
- ساعت
- 11:25
- نوشته شده توسط
- یوسف اکبری
ارسال دیدگاه