حسینه انس و جان آغلار بو آیدا
امامِ عَصر قان آغلار بو آیدا
گلوب موجه بو آی بحرِ مصیبت
بو آیدا دولدوروب آفاقی محنت
بو آیدا باش لانوب شورِ قیامت
زمین و آسمان آغلار بو آیدا
ویروب غم یوز بو آیدا ماسوایه
گلوب جن و ملک شور و نوایه
چکوب لر قاره عرشِ کبریایه
هامی لاهوتیان آغلار بو آیدا
لوای غم آچوب پرچم حسینه
قان آغلار عالم و آدم حسینه
دوتوب افلاکیان ماتم حسینه
ایدر اشکِ روان آغلار بو آیدا
آچوب جنتده باش ختم پیغمبر
آلوب زلفین اله خواتونِ محشر
حسینیم وای دیر ساقی کُوثر
امیرالمومنین آغلار بو آیدا
اَسوب دور صَرصَرِ مُحنت جهانه
دونوب گلزارِ پیغمبر خزانه
گلوب بلبلری غمدن فغانه
گل آغلار گلستان آغلار بو آیدا
یازوب چوخ نامه لر عدوان حسینی
عراقه گتدی لر مهمان حسینی
او چولده قوی دیلار عطشان حسینی
فرات آخدوق جا قان آغلار بو آیدا
علی اکبر کیمی شِبهِ پیمبر
بویاندی قاننه اُول ماه منظر
اورکده اللّری لیلای مُضطر
ایدر داد و فغان آغلار بو آیدا
گلنده قانلی نعشی خیمگاهه
اوجالدی شور و شیون مهر و ماهه
دوشوب هر غلغله خرگاهِ شاهه
حرملر مو کَنان آغلار بو آیدا
قورولدی قاسمه بیر طُوی اساسی
طُوئی یاسه دونوب باشلاندی یاسی
عروسی یاخدی قاندان طُوی حناسی
آناسی باغری قان آغلار بو آیدا
حسینون اوندا پرگاری پوزولدی
ابوالفضل ین قَلم قُولاری اولدی
سو مشکی اوخ لانیب قانیله دولدی
او حاله قدسیان آغلار بو آیدا
بو سوزده ایسترم رُخصت اوزیندن
اُولوُم آثاری گورسن دی یوزیندن
گلوب بیر اوخدا دگدی ساغ گوزوندن
هامی اهل جهان آغلار بو آیدا
دوشوب قولسوز یره اُول ماه پاره
قلج خنجر وران دوردی کناره
دیّلدی حُکم بش یوز نیزه داره
اوزی یاره وران آغلار بو آیدا
گورن ده حرمله اصغرده جان یوخ
عطش دلدن سالوب بی حال دور چوخ
کمانه قویدی بیر اُوچ شُعبه لی اوخ
سیزیل دار اوخ کمان آغلار بو آیدا
رَها اولدی کمان دان تیرِ پَران
هَواده آچدی پر سسلندی قان قان
حسینون اصغری اوخلاندی عطشان
گل آغلار باغبان آغلار بو آیدا
او ساعتدن امان شاهِ لب عطشان
دوشوب توپراقلار اوسته قانه غلطان
او قدری وردی لار داش نیزه پیکان
سنان الده سنان آغلار بو آیدا
چخاندا شمر حسینون سینه سینه
تَزَلزل سالدی اَفلاک برینه
توکولسون آز قالوب گویلر زمینه
زمین آغلار زَمان آغلار بو آیدا
اوتانموب شمرِ کافر مُصطفادن
سو سوز کسدی حسین باشین قَفادَن
هوا تار اولدی قان یاغدی سَمادَن
نشانِ بی نشان آغلار بو آیدا
(صحاف) آغلا بو غمده عالم آغلار
آچوب باشون رسولِ اکرم آغلار
توکر قانیاش خلیل و آدم آغلار
سراسر کُون فغان آغلار بو آیدا
- چهارشنبه
- 17
- شهریور
- 1400
- ساعت
- 14:47
- نوشته شده توسط
- یوسف اکبری
- شاعر:
-
مرحوم صحاف تبریزی
ارسال دیدگاه