بیر الده نقدِ جان عمو، بیر الده فرمان گلمیشم
اوز قتلیمه عنوان ایدوب بیر تازه عُنوان گلمیشم
گلدیم حضورندن آلام ازّلده بیر اذنِ جَهاد
رُخصت عمو جان ویرمدون اولدی ملال و غم زیاد
گَتدیم آتام فرمایشین پروردگاریم قیلدی یاد
مأیوس گتمیشدیم ولی شاد و خرامان گلمیشم
بو دست خطّ مجتبی، بو من بو دشتِ کربلا
بو روزِ عاشورا عمو، بو ازدحامِ اشقیا
ایله مرخّص جانیمی ایلوم رکابوندا فدا
محکومِ بیر حُکمم گرک ایلوم فدا جان گلمیشم
قویما بو غملی گوگلیمی چوخ درده گلسین شاد قیل
غم مکتبی ندن ای عمو بو غمکشی آزاد قیل
سن مرشدِ عشّاق سن، یول گوستروب ارشاد قیل
قوی منده اکماله یتوم، بو درسه چوخ دان گلمیشم
بو گون بو کوی عشقیده بیر نچه قوربان ویرمی سن
بیر بیر حضور‌ِ حضرتِ جانانیده سان ویرمی سن
آخر شهادت مژده سین ازّلده یکسان ویرمی سن
منده گیدوب اولماخ لیقا خاکی له یک سان گلمیشم
منده عمو قربانلی قا یوخسا لیاقت یوخ بو گون
یا اینکه زخم و خنجرِ پیکانه یوخ طاقت بو گون
بیر اوزگه منظوریم منیم غیر از شهادت یوخ بو گون
اذن شهادت ویرگی لن ایتمه پشیمان گلمیشم
لطف ائت کفن سال بوینوما قیل لایقِ جانان عمو
چوخ شایقم تشنه ویرم جانان یولوندا جان عمو
حالون منی دلتنگ ایدوب ای شاهِ مظلومان عمو
اولسون قسم بو جانیوه جانه عمو جان گلمیشم
بو گون ضیافت خانهء عشقه گیدنلر گیتدیلر
یولداش اولوب نچه نفر جانان یولون طیّ ایتدیلر
باش ویردیلر نام آلدی لار عینِ مرامه یتدیلر
منده بو باشی ایتماقا شاباشِ جانان گلمیشم
بو گون عمو نه نوعی بو فیضِ فراوان دان گچوم
فیضِ شهادت تاپماقا چوخ مایلم جان دان گچوم
کوی وفاده جانویروم، اکبر کیمی جان دان گچوم
منده بو صحراده اولام جانانه قربان گلمیشم
ایله (شهابه) بیر نظر گر چه گنه کارم حسین
آخر سنون اولادیوه منده عزادارم حسین
شش گوشه قبروندن اوتور چوخ گونلر آغلارم حسین
حضّاریلن گورسم نولور بیر وقفه مهمان گلمیشم
- چهارشنبه
- 17
- شهریور
- 1400
- ساعت
- 23:10
- نوشته شده توسط
- یوسف اکبری
ارسال دیدگاه