آلوب از بسکه آناسیندان علی طاقت و تاب
آنالیق عالمی اوز اوغلونا ایلردی خطاب
گَل گیداخ بو ره عشقی علی باهم چالشاق
شمع و پروانه مثالی یانار اودتا آلشاق
قید قویمور منی، گل کوسموسن اوغلوم بارشاق
اهل بیت ایچره علی یاندیم ،اوتاندیرما منی
صود گلوبدور سینمه، اَم بالا یاندیرما منی
یانمیشام آغلامیشام بس کی سنه ئوز دولوسی
اورگیمده یانار اود واردی، اولوب سوز دولوسی
باش قارشدی گوزوه باخمادیم هیچ گوز دولوسی
او گیچن گونلریمین خاطره سی یاد اولسون
یاخچی آغلار گونه قویدون ایوین آباد اولسون
آناوا گولمدون اوغولوم اوخا گولدون نیه سن؟
توخدیبدور بوغازون یاره سی؟ سویله نجه سن
آیری عالمدی علی خیمییه گلسن بوله سن
قوشولوب بیر بیره اهل حرم ایوای دیوری
هامی آغلور یانور اوخشور سنه لای لای دیوری
بَلییَن وقت سویونردیم سنی من ،اوز اوزومه
او گوزل گوزلریله جلوه ایدردون گوزومه
ایندی فکر ایلییورم باخ علی منده دوزومه
نیلیوم ایش بئله گلدی، بالا غفلت ایله دیم
منی عفو ایله دویونجا سنه لای لای دیمه دیم
مهر رخشان سحر خیمه سرادن سوزولوب
گوزلریم مردمونه غصه و غمدور دوزولوب
اوخلانان گوندن آناویندا اورگی اوزلوب
چرپنور قلبیم او گوندن که اَلون باغلامیشام
بوغازون یاره سینی یاده سالوب آغلامیشام
غملی نی زاره یاغار غصه، اَسنده یللر
بلبل اوخشار یانار آغلار که آچولسون گللر
اوخشیاندا سسیمی چونکی تانیلار ائلر
ایشیدنلر بولر آغلور گینه اصغر آناسی
چاره سی یوخدی دیللر گیدوب الدن بالاسی
لای لایون زمزمه سی غصه لی آواز اولدی
غملی اکبر آناسیله آنان همراز اولدی
شکر لله که بالام عاشق ممتاز اولدی
شوقیلن جانوی تسلیم ایلدون جان آلانا
منده قربان اولارام سن کیمی قربان اولانا
گُل بوغازون ای اوغول، غنچه کیمین پرپریمش
اوخلانان گوندن آناویندا وجودی اریمیش
خیمه دئیدیم دیدیلر قانه باتان اصغر یمیش
بیر گمانیم گلوری قانه باتان گوز یاشیما
ایندی بولدوم آنان اُلسون نه گلوبدی باشما
خیمه گاه حرم عصمته گر دوشسه یولوم
(پوررادم) دیَرم من علی قربانون اولوم
داغ ایّام مصائبده منی قویما سولوم
تا منیم وار نفسیم سیزلره مجلس قورانام
اللّها شکر ایدورم اصغره زنجیر وورانام
- پنج شنبه
- 18
- شهریور
- 1400
- ساعت
- 17:59
- نوشته شده توسط
- یوسف اکبری
ارسال دیدگاه