گل خسته جانیم مقدمون قربانی قارداش
دریا یانیندا یخدیلار سقانی قارداش
لشگر توکولدی اوستومه ساق وصولوم دان
رَد اولمادی بیر ثانیه دشمن یولوم دان
ظلمی له محروم ایتدیلر بیر جوت قولوم دان
قاف اوسته پَرسیز قوی دولار عنقانی قارداش
یان نام سنون احوالیوه چوخ چوخ اوزوم دن
بیرده خیامه گلماقا گلمز یوزوم دن
بیر اوخ ویروب قاتلریم بو ساق گوزوم دن
گل چک گوزوم دن زَهری لی پیکانی قارداش
بیر حالدِه یدیم سیدی آتدان دوشنده
نه گوزده طاقت گورماقا نه قول بدنده
الده عَمو د آهنین نُوفل گلنده
آغلاتدی حالیم سنگدل عدوانی قارداش
لطفین آنام زَهرا یتوردی اِنتهایه
آلدی قوجاقه جسمیمی باخ بیر وفایه
آهسته قویدی نعشیمی دشت بلایه
گل باشیم اوسته گور آنام زَهرانی قارداش
دنیاده نسگیل اولماسین اُم البنی نه
زَهرا آلوب عباسنون باشین دیزی نه
گه آغلار عباسه آنام گاهی حسینه
گاهی سیلر شَهلا گوزوم دن قانی قارداش
اولدی هجوم آور هامی بیر پیکر اوسته
اوخ لار اوخ اوستن دگدی خنجر خنجر اوسته
اون یِدی خنجر یوز قویوب بیر حنجر اوسته
یوخ باشیم اوستن طَرد اِیدن اَعدانی قارداش
گر چه ویروب لار جسمی مه سان سیز جراحت
چوخ راحتم حاشا ایدم بیر آن شکایت
اما آلوب آراممی طَعن و شَماتت
دل یاره سی دلدن سالار انسانی قارداش
گل باشیمی اللّردن آل ای شاهِ عطشان
بیرده گوروم رخساریوی راحت وِیرم جان
لشگر قباقونده منی کس سونله قربان
سنده قبول اِیت بو سو سوز قربانی قارداش
من دین یولوندا دویمارام جنگ و جدلدن
چون وقف دور دینه منیم جانیم ازلدن
نیلیوم کُومَک یوخ دور صدا گلمز تک الدن
مضطر اولوب ترک ایلدیم دعوانی قارداش
بیز آل هاشم گیمِ روخ ذلّت لباسین
اگمز بو سفیانی لره باش آل یاسین
قانیله تعمیر ایله روخ دینون بناسین
جاندان گرامی ساخلاروخ قرآنی قارداش
دین اوسته مال و جان باجی قارداش نه لازم
بزم نگاره گیتماقا یولداش نه لازم
قول ویرمیشم گوز ویرمیشم بیر باش نه لازم
بیر قانلی باش دور عهدی مون پایانی قارداش
بیز آل هاشم اولماروخ کفاره تسلیم
دنیادن اوتری ایتمروخ اشراه تعظیم
درس شهامت ایلروخ دنیایه تعلیم
دیندن مقدم دوتماروخ دنیانی قارداش
دین اولماسا گورمز بشر صلح و سعادت
دین دور ویرن انسان لارا عز و شرافت
قوی بیر باتاخ آلقانه دین قالسون سلامت
عالم لره اعلان ایداخ تقوانی قارداش
ایلر (کریمی) مسئلت دائم خدادن
گیتسون صحیح ایمانله دار فنادن
اولسا توجه خامس آل عبادن
گورمز جزاده آتش نیرانی قارداش
- پنج شنبه
- 18
- شهریور
- 1400
- ساعت
- 18:13
- نوشته شده توسط
- یوسف اکبری
ارسال دیدگاه