گل ماه آل هاشم دوشدی خسوفه قارداش
سرداروه اَل آچدی اشرار کوفه قارداش
فریاده گل برادر صاحب علم یخیلدی
باش زخمین ایتدی خاک و احجار روفه قارداش
ای شمس چرخ عزت ای نیّر امامت
هرگز دیمم واریم دور جسمی مده چوخ جراحت
مندن صورا تاپار بو دشمن سنه جسارت
آی باتدی گون یاخون دور دوشسون کسوفه قارداش
ای لشگری سنان شه درک ایله سر سپاهی
سندن صورا بلورسن یوخ دور امید گاهی
سن سن بو گون جهاندا عالم لرین پناهی
لطف و عطاده مظهر حَیّ رَئوفه قارداش
قلب سپاهِ کفره اوّلده لرزه سالدیم
تا لشگری داغیتدیم نهرِ فراتی آلدیم
اما الیم کسیلدی اشرار الینده قالدیم
اولدی نیام جسمیم مین لر سیوفه قارداش
یول آختاروردی روحیم راهِ صواب عشقه
بیر حرف ساق قولوم دان اوّلده باب عشقه
بیر حرف صول قولوم دان یازدیم کتاب عشقه
قانه دونر سرشگون باخسان حروفه قارداش
قولاریمی سالاندا بو پیروان باطل
سو مشگیمه برادر ایتدیم قولومی حایل
دورت بیر طرفدن از بس اوخ ووردی بو اراذل
الفی گیچوب یتشدی زخمیم الوفه قارداش
ال سیز منی گورنده ال قوم کافر آچدی
عنقا تک اوخ یاراسی جسمی مده شهپر آچدی
اوج وصال قدسه روحیم قوشی پر آچدی
اشگیم کیمی سپیلدی قانیم طفوفه قارداش
جسمی مده زخم پیکان گلشن کیمی گل آچدی
هر یاره شرح حاله بیر نوعیله دل آچدی
عالمده مین رسائل تک بو مسائل آچدی
کیم سجده گه ده گورمیش آچسون شکوفه قارداش
زخم سنان و پیکان گر چه بدنده چوخدی
اما منه موثر نه نیزه دور نه اوخدی
من سیز سنه بو چولده بیر جان نثار یوخدی
باعث بو غمدی بئله داد و لهوفه قارداش
آتدان دوشنده گوردوم ال یوخ ویرم قباقه
دوشدوم یوزی اوسته آتدان چون پای بسته ناقه
قادر اولانمادیم تا بیرده دورام ایاقه
ایلوم دوباره حمله یاغی صفوفه قارداش
آختارسان ای (حسینی) بو مشکلاته چاره
عباسه قیل توسل گل نی تک آه و زاره
اوز مطلع کلامون یاز مقطعه دوباره
گل ماه آل هاشم دوشدی خسوفه قارداش
- پنج شنبه
- 18
- شهریور
- 1400
- ساعت
- 18:16
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه