اشاره اولدی گینه بیر شه شهادتدن
خبر ویروم سیزه بیر صاحب شجاعتدن
رشادتیله صلابتده، نائب حیدر
گورون نه وقت قالوب صولت و صلابتدن
او دم که نخل بدن دن اوزولدی قولاری
الی دوشوب یانینا، دوشدی سَهم و صُولتدن
زِ بس که جسمی نه دگدی یارا یارا اوستن
وجود حضرت عباس دوشدی طاقتدن
دوشه دوشه یِره سسلندی یا حسینِ علی
گل ای اولان قدی خم، بار درد و مُحنتدن
الیمی دوت، الیوی مُرتضا علی دوتسون
که سالدی لار منی کفار کوفه، قدرتدن
یتور گلن ئوزیوی ای اَبُوتُراب اوغلی
گوتور عزیزیوی قارداش تُراب ذلتدن
الون یتور الیمه، ببر ئوپوم اِیاقوندان
اگر چه شرم ایدورم چوخ، بو نوع جرعتدن
و لیک جان گیدوری، جانیمی گرک چاغ یرام
یولوندا چون ئولورم، دوشموشم طراوتدن
یتوب نه گوردی دوشوب بیر قنادسیز شهباز
سالوبدی شهپر، آچوب اوج، بال همتدن
او دم که غالب اولوب ضعف، گیزلنور نفسی
چکن زماندا نفس، قان آخور جراحتدن
نقدر قانی آخوب، یرده یا حسین یازی لوب
که هر نه گلسه خیاله، چخار محبتدن
الی که یوخدی چالا ال ایاق، او دور سورونور
سسین چخاتموری اما کمال غیرتدن
مباد طعنه وورا ابن سعد و شمر لعین
اوغورلوری نفسین، قورخوری شماتتدن
گهی یاراسی سیزیل دار، گهی تلاطم ایدر
گهی یاتوب حرکت ایتموری حمیتدن
کسنده باشینی قاتل زِ بس که مانع اولوب
که قارداشین گوره، ببر کام آلا زیارتدن
گوروب که یوخ الی، خنجر قباقی نه ویرسون
ولی باشین کسن، ال چکموری شقاوتدن
زِ بس یوزون یِره سورتوب، یوزی گیدوب یِرده
دوشوب دی ماه بنی هاشمی لطافتدن
حسین حالینی معناده بیر تصور ایدون
نقدر غصه اونا اَل ویروب بو حالتدن؟
یره اوتوردی آلوب باشینی دیزی اوسته
گوروب که یوخدی دیزینده نشانه قوتدن
بویوردی آچ گوزون، ای نور چشم عین الله
گلوبدی گون باشوا، دور بو خواب راحتدن
او دم که گوردی باشی اوسته رُوح اَرواحی
دوباره جانه گلوب قوخمیوب مذمتدن
نهیب عشقیله بیر بانگ یا حسین چکدی
که گچدی ناله صداسی، حجاب وحدتدن
اولوب حسین، تمام وجودی نه، ساری
ئوزون حسین گوروب عباس، دوشدی شدتدن
دئدی بغشله دورا بولمورم، یارام چوخ دور
دیمه یوخوم دی خبر، راه و رسم حرمتدن
یوزون ایاقینه قوی دی، دئدی که عفو ایله
الیم یوخوم دی دوتام دامن جلالتدن
قولوم اوزولدی بدندن، ولی نه باکیم وار
اوزول میوبدی الیم، دامنِ وِلایتدن
سنون یولوندا شَهیدم، ئوزونده شاهدسن
باشیم گیدونجه من، ال چکمرم حمایتدن
قوجاق لاشوب ایکی قارداش، باخوب چو اهل حرم
دایاندی عرشه فغان عترت طهارتدن
منِ غریبه بو غربتده یار بیر سنی دون
منی قویوب گیدوسن، الامان بو غربتدن
قاباق جا چون گیدوسن، اکبریمه ایله سلام
گلونجه من او دیاره، بو دار محنتدن
سُوله اوغول سوزی، قارداش سیز ایلدیم گلدیم
بتولی ایله خبر دار، بو مصیبتدن
بویوردی دور آپاروم جان وِیرنده خیمه لره
دئدی که یوخدی یوزوم گیتماقا خجالتدن
دئدی سکینه قیزیم انتظاریوی چکوری
دئدی خجالتم اول نو گل صباحتدن
دئدی سوروش سا سنی، من سکینیه نه دیوم؟
دئدی بو مشگی آپار، قورتولوم ملالتدن
دئدی دایانما داخی، خیمیه آپار تشریف
گئت اول اوزون متوجه، عیالِ عصمتدن
دئدی که سن اوخی یاسین، ای امام مبین
که بلکه مست اولام، نغمه تلاوتدن
یولوندا شوقیله مستانه جان ویرم خوش دور
که گورمیم سکرات مماتی، سکرتدن
باتوب صدالری چون وِیردیلر نفس نفسه
ظهور وحدت اولوب کثرت شراکتدن
سوسوز دیلیله دیوب لا اله الا الله
ایدوب نبوته اقرار، صون امامتدن
جمال حقّه باخوب، حقّ دیوب، گوزون یومدی
که ساکت اولدی دیلی کلمه شَهاتدن
ایدوب او حاله نظر، چونکه زینب و کلثوم
چخوب دیلار ایشگه خیمه خدارتدن
بیری حسین دیردی، بیریسی یا عباس
زمانه تنگه گلوب بانگ آل عصمتدن
قوجاق لاشوب ایکی قارداش کیمی، ایکی باجی
اولار خموش، بولار نعره زن بو حالتدن
بس ائت (دخیل) که حضار دوش دولر دلدن
سوون که دوش میاجاق دور دیلون فصاحتدن
گینه بو دللّری تعلیم ایدوب لسان الله
لسان صدق الهی، بریدی لکنتدن
بو یادگاریدی جان تک ویرونجه جان، ساخلا
نه چونکه ناشی اولوب منشاء صداقتدن
- پنج شنبه
- 18
- شهریور
- 1400
- ساعت
- 18:21
- نوشته شده توسط
- یوسف اکبری
ارسال دیدگاه