شیر مردون یخلوب توپراقا قارداش یارالی
ایلورم سجده جبینیم یارالی باش یارالی
اوج اعلاده قُوشون دگسه یارا شهپری نه
قدرتی اولماز حمایت ایلیه پیکری نه
مرد شمشیرون اگر یتسه خطر اللّری نه
کسیلر چاره سی دشمن قباقیندا سخلار
قارداشون تک یخلاندا یوزی اوسته یخلار
دولسا هر بیر گوزه قان لخته سی گورمز قاباقی
سندیرار شخصی مسلّم قولونون اول ماماقی
یخلان وقیتده بند اولسا رِکابه ایاقی
مرکبی گیتدوقی جا لرزه دوشر قامتی نه
یوزی توپراقه دگر صدمه یتر صورتی نه
سرو نسگللی اولار دوشسه بوداق سیز چمنه
ایتمورم دردیمی اظهار اولان اولدی منه
گَل اوزون ال یتور ای شاه بو ال سیز بدنه
دیمورم مهلکه دن جسمیمی قارداش چکه سن
ولی چوخ خوشدی بو ال سیز باشیما باش چکه سن
ایتموسن سن گوز آچاندان منه تعلیم وفا
دیمیشم امریوه بیر عمریدی لبّیک و بَلی
سایه تک پشت سرونده دولانوب صبح و مَسا
قاباقا گیچمه میشم ایندی گینه گیچ میورم
ساقی کوثر آتام سو گَتیروب ایچ میورم
من اوتوز بش ایله بالغ قاپیوین نوکریم
خوان اجلالی وین عالمده نمک پروریم
دیمورم کنز وفا و ادبین گوهریم
هر نیم صحنهء عشقونده اوزوم دن گیچنم
تیرِ عشقون پر آچان وقته گوزوم دن گیچنم
خدمتیم اولسا برازنده یوبانما ئولورم
گَل طبیبانه باشیم اوسته، دایانما ئولورم
خیمه لرده الی قوینوندا دولانما ئولورم
دشمنه وقریمی ای میر امم ویرمه میشم
ویرمیشم اللّریمی الدن عَلم ویرمه میشم
دلخوشام گوزلریمی فاطمه لطفیله سیلور
سینمون یاره سینه باد بهشتی اَسیلور
دلخوشام باشیوه نَذر ایلدیقیم باش کسیلور
شاد اولوب نوکریوین روحی آقا غم یِرینه
شکری وار نَذریمی بو چولده یتورسم یرینه
آلدی قارداش سسینی قتلگهه گَلدی امام
گوردی عبّاسی چالیخلور یوخودی حال قیام
دیدی جان قارداشیوین قارداش ایشی اولدی تمام
اکبری گیتمی شیدی اصغری دوشدی خطره
زینبون باشدا قرا معجری دوشدی خطره
برج محنتده که اولدوزلاری مون وای گونونه
قورخولی چولده آدام سیز لاریمون وای گونونه
سایه وه دالدالانان قیزلاری مون وای گونونه
صف عشقه دوزولن لر سنه قربان یارالی
الی الدن اوزولن لر سنه قربان یارالی
مایلم نطقیوه گفتاریوه قارداش دی منه
قلبیوین دردینی اظهار ایله قارداش دی منه
دم بدم آدیمی تکرار ایله قارداش دی منه
چرپنان قلبیمون آرام ایله چرپنماقینی
بِلیمون بلکه یادیم دان چخادام سنماقینی
من حسینم غم هجرونده یانان قارداشوام
نو جوان اوغلی ئولن قدّی کمان قارداشوام
یخه سی خیمه ده اللّرده قالان قارداشوام
گوزیوین قانینی حسرتله سیلن قارداشوام
قوجا وقتینده علاجی کَسیلن قارداشوام
نه قدر چوللّری حیران دولانوم آه چکوم
نه قدر اشک ملاله بویانوم آه چکوم
نه قدر آتشِ هجرونده یانوم آه چکوم
نه قدر قلبیمی پیکان مصیبتله یانوم
نه قدر خیمیه بیر گونده جنازه آپاروم
من نجه دشمن ایچینده سنه غم بزمی قوروم
من نجه طعنه ووران لار قباقیندا اوتوروم
من نجه سن یخلان یِرده ایاق اوسته دوروم
من نجه ایم دی بوقول سوز بدنین ترکین ایدوم
من نجه خیمه سرایه الی قوینوم دا گیدوم
یاندورار حشره کیمی عالمی درد و محنون
شاخه سیز سروه مثل دور کچیلیب دو ر بدنون
قالسون اللّرده او ال که الیوی کسدی سنون
بِلی سن سون ستمی له بِلیمی سندی رانون
گوزی چخسون آتام اوغلی گوزیوه اوخ آتانون
- پنج شنبه
- ۱۸
- شهریور
- ۱۴۰۰
- ساعت
- ۱۸:۳۷
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه