خیمه دَن دُخت علی گوردیلر میدانه گلور
دیه سن یانماقا اوز شمعینه پروانه گلور
کوفه ده قانه باتان گون آتاسی شیرِ خدا
مسجده گیتماقنا مانع اولوب شَرم و حَیا
کربلاده نه دور علّت بو دُرِ کَنز حَیا
اللّری باشدا گیدیر خیمیه میدانه گلور
گون کیمی اولدی عیان شرق خیمدن او زمان
یوز قویوب قتلگهه دُخت شهنشاه جهان
زینبین عشقنه حیرتده قالوب کُون و مَکان
شیر تک رزم گهه بس که دِلیرانه گلور
اُوج صبر اُسته وفا پرچمی همّتله ساچور
دلده کی عشق دلیلنی رهِ مقصودی آچور
اللّرین باشه قویوب گاهی یِرور، گاهی قاچور
اود سالور نُه فَلکه ایله یانا یانه گلور
دلده کی عشقینی عالملّره اعلان وِیروری
قلب مجروحی گوتوردوقجه قدم، قان وِیروری
گوروری قارداشی میداندا سوسوز جان وِیروری
اشکیله سو سپه لَعل شَهِ عَطشانه گلور
سعی ایدور قارداشنا بلکه اوزین تیز یتوره
دلده هجران یاراسین مرهم وَصلی بتوره
دخترِ شیرِ خدا دور، اوزین حاشا ایتوره
عرصه گاهه ایله زَهرا قیزی مردانه گلور
سانما بیر ذرّه وقارین پوزوب اول گوهر پاک
کوکبِ بُرج شهامت دی دِیمه ایلوری باک
حالی پوزقوندی یاخون دور ایلسون غصّه هلاک
پوزقون احوالینی هر کیم گورور اَفغانه گلور
روزِ امّید آچان وقتی ده تیره شبه یول
اوزینی لشکره ووردی آچا تا مطلبه یول
گوردی بو حالی قشون اهلی آچوب زینبه یول
بولدولر عشق شَراری سالوب اود جانه گلور
بیر بیره سویلدی بو فاطمه رِیحانه سی دور
گورموسوز باک ایلمور چون علی دردانه سی دور
قارداشی شمعِ وَفا دور بودا پروانه سی دور
عالمه ایله نه بیر شمع و نه پروانه گلور
گر دِی ساخ حوریدی یوخ حوریده بو پایهء شور
عشق سر مشقنی بوندان گرک آلسون هامی حور
گوروری قتل گهی چولقالیوب شعلهء نور
ظلمتِ غمدن او دور روضهء رضوانه گلور
قلبی اودلار اورگی اولسا غریبین یارالی
دوزه بولمز گوره محبوبِ حبیبین یارالی
عشق بیماری او دم تاپدی طبیبین یارالی
نه طبیب حشره تک عالم اونا درمانه گلور
ایستدی قتلگهِ عشقه خانم سال سون اوزین
یارالی قارداشنا شَرح اِیلسون دلده سوزون
باغبانِ چمنِ عشق آچوب قانلو گوزین
نه گوروب بلبل غم غملی گلستانه گلور
سسلدی سال دون عجب وقتده منی یاده باجی
یالقوزام بول دون او دور گَلموسن اِمداده باجی
آشنا اول غمه گلمه بیله فریاده باجی
سیل گوزون یاشنی، چوخ آغلاما بیگانه گلور
بیر سوزوم واردی باجی عُمده وصیّتدی سنه
سویگلی نازلی رقیّم چون اَمانتدی سنه
جان سنون جان بالامون گر چه اَذیّتدی سنه
آغلارام نالیه گورسم من او دُردانه گلور
گوردی شه آز قالوری عمر گُلُستانی سولا
گل رضا اولمادی بلبل گوزی اشکیله دولا
خیمیه بیر دلیله زینبینی سالدی یولا
ایله قارداش باجی گور عالم اِمکانه گلور
دیمه قارداش دان او دَمده باجی دویدی گیدوری
جسمی دن مهر و وفا رختینی سویدی گیدیری
قتلگه ایچره ولی روحینی قویدی گیدیری
خیمه ده قارداشی نا قُورسون عَزاخانه گلور
خیمه ده گوردیله گون باتدی قرا یللّر اسر
بیر بیره سویلدی میداندا قیامتدی مگر
گوز تکوب لر یولا حیران گوره لر وار نه خبر
گوردولر زینبین اللّر بویانوب قانه گلور
یتدی خرگاهه خانم دوره سین آلدی بالالار
باغبان اولماسا واضحدی که گُللّر سارالار
دیه بولمور شه ئولوب، قلب لرین غم یارالار
بو مُحن ایله گران زینب نالانه گلور
یوز دوتوب حضرتِ کُلثومه دیدی آغلا باجی
وِیردی جان شاه زَمن سینوی گل داغلا باجی
دستگیر اولماقا مُحکم بیلوی باغلا باجی
دیمه بیرده باشوین مُحنتی پایانه گلور
قوردی بیر بزم عزا زینب آی اولدوزلاریلن
نی کیمی داده گلوب لیلی اوغول سوز لاریلن
قول بویون اولدی رقیّه بالا قیزلاریلن
گور اِیله بزم عزا بیرده بو دورانه گلور
آغلاشوردی بالالار گوردوله بیر سس اوجالوب
ازدحامی له گَلولّه، گورن حیرتده قالوب
بیر بیره سویلَدیلر کیمدی بولار یاده سالوب
تسلیت وِیرماقا بو جَمع پَریشانه گلور
دِیدیلر یوخدی بیزیم بیر کسی میز داده گَلَه
باغبان اولماسا، کیم همدم اولار غُنچه گُله
فکر ایدوللّر نه حکایتدی گلوب مطلب اله
گوردولر لشکر کین خیمیه تالانه گلور
دِیمورم عشقون او گون قافله سی دوشدی گجه
لیک بولمم نجه زینب گونوزی ایتدی گئجه
اویانان خیمه ده زَهرا بالاسی یاتدی نجه
یانسون هانسی غمه، زینب غمی گور سانه گلور
یوخ دور عبّاس، اوزی مخیم ده وِیروردی گئجه پاس
گوردی بیر آتلی گلور، لیک گیوب قاره لباس
دِیدی دشمن دی گلور غارته، یوخ بیزده لباس
گئجه وقتی حرمه کیمدی، نه عُنوانه گلور
فکر ایدور کیمدی بو آتلی گوره سن یاللّعَجَب
تا یاخون لاشدی گوروب اوز آتاسی شاهِ عَرب
سسلنور قورخما قیزیم زینب اَیا کان اَدب
مُرتضی دور خیمه شام غَریبانه گلور
ای سلیمان وفا، ای شه اِقلیم مُحن
درگه وندن الی بوش ایلمه سن سائلی سن
الده بیر پای مَلخ تُحفه سی ای شاهِ زَمن
مور تک (اعظمی) درگاه سلیمانه گلور
- پنج شنبه
- 18
- شهریور
- 1400
- ساعت
- 19:13
- نوشته شده توسط
- یوسف اکبری
ارسال دیدگاه