هواسی شامین آلوب قلبیدن توان عمه
منی قوجاقیوه آل باغریم اولدی قان عمه
دوشوب خیالیمه خوش گونلریم صفای وطن
دوشوبدی باشیمه ویرانه ده هوای وطن
نه دور گناه میز اولدوخ بی بی جلای وطن
بو روحیمین قوشونا یوخدی آشیان عمه
خرابه شامه کی گلدوخ چوخالدی نیسگیللر
نه وقت اولار خبریم یوخ، هایاندادور اکبر
بیله گمان ایدورم کی کوسوب علی اصغر
رباب آنامین ائدوب صبرینی تالان عمه
بو شامین اهلی بیزیم روزگاری ائتدی قرا
امان شمادت الیندن اورگیم اولدی یارا
زمانه گور بیزی هاردان چکوب گتوردی هارا
یئریم خرابه دی، دشمندی میزبان عمه
یانور اورک غم و اندوه و دل یاراسیندان
نولوب بابام داخی دوتمور خبر بالاسیندان
هایاندادور سوروشا لشگرین جفاسیندان
نلر گلوب باشیما ائلییَم بیان عمه
بابامی گورسم اگر چوخ حکایتیم واردی
بو شام و کوفه لیلردن شکایتیم واردی
قولوما قمچی وروبلار جراحتیم واردی
گرک وئرم باباما بیر به بیر نشان عمه
بابامی ایستییرم یانمیشام فراقینه
نقدر یانمالیام حسرت احتراقینه
اگر گله منی اوّل آلار قوجاقینه
داریخمیشام گله جاق بس بابام هاچان عمه
باشیم بلالیدی اینجیتمیشم همیشه سنی
یئتوبدی جان دوداقا عمه جان باغیشلا منی
غم ائتمه یوخدی اگر چه رقیّوین کفنی
بو قاره کوینگه بوک ائتمه چوخ فغان عمه
اجل گلیب اُلورم قالدی انتظار گوزوم
بابام اگر گله وار دیلده چوخ گلایه سوزوم
داریخمیشام گله گر باشینا دولانام اوزوم
بو آروزده وارام وار نقدری جان عمه
- پنج شنبه
- 18
- شهریور
- 1400
- ساعت
- 20:36
- نوشته شده توسط
- یوسف اکبری
- شاعر:
-
محمد هوشمند
ارسال دیدگاه