ای عمّه دلده ویروب مِهرِ یاره گیزلت دیم
دُرِ مَحبّتی سالدیم حِصاره گیزلت دیم
گلِ اُمید و وِصالی درونِ سینم ده
وِیروب سو اَشگیله عشقِ نگاره گیزلت دیم
و لیک جورِ زَمانه جفائیله عمّه
گلِ اُمیدیمی توش ایتدی خاره گیزلت دیم
سِپهرِ عزّتیمون ایتدی مِهر و ماهی غُروب
گوزوم ده دوندی گونوم لیلِ تاره گیزلت دیم
یارالی قلبی مه هر قَدر ووردی دستِ جَفا
خَدنگِ مُحنتی له تازه یاره گیزلت دیم
قانادی باغلی قوشا دام ده مَثَل اولدوم
نوا و نالمی مثلِ هَزاره گیزلت دیم
بو مدّتی نقّدر آخدی گوز یاشیم گوزدن
گوگلده مین ایله غمدن شَراره گیزلت دیم
اورکده غم لریمی ساخلادیم سنه دی مدیم
دِئدیم دِیسم غمون آرتار دوباره گیزلت دیم
بو توزلی زلفمی ایتدیم نقّاب گورمی سن
یوزوم ده سیلی یرین آشکاره گیزلت دیم
یارالی صِید کیمی اوُچی قورخوسوندان من
سالوب سیزلتی می قلبِ فِکاره گیزلت دیم
نه چکدیم آجلیق اَلیندن خدا بولور عمّه
تحمّل اِیتدیم او دردِ کُباره گیزلت دیم
دیین ده دردیمی من زیرِ لب صبا یِلی نه
آنام رباب ایدنده نظاره گیزلت دیم
یتیم لیق آجلیق اسیرلیق غریب لیق غمینی
نه بولدی گون نه آی نه ستاره گیزلت دیم
سیزلدادیق جا ایاقیم ده خار، یاره لری
اوجاتمادیم سسیمی اِنتصاره گیزلت دیم
بیلک لریمده دو شاخه جَراحَتین سیزدن
الیمی قوینوما قویدوم هَماره گیزلت دیم
دِیردیم اوُز اوُزومه اکبریم گلر آخر
آلار دوباره منه گُوشواره گیزلت دیم
بو شامده اورگیم دوندی قانه صبر ایلدیم
رضایِ حقّدن اوُتور اِنزجاره گیزلت دیم
گلر دئدیم اوُرگون درده، ساخلیوب دلده
سوروش مادیم هانی بس شیر خواره گیزلت دیم
گویون ستاره لری ندن چوخ عمّه جان مُطلق
یانان اورکده غمِ گاهواره گیزلت دیم
نه چَکدیم عمّه او دردی گیدنده قول باغلی
سنیله مجلسِ شُرب و قُماره، گیزلت دیم
امان یزیدین الیندن که داغی داغ اوُسته
چکوب نجه بو دلِ داغ داره گیزلت دیم
یارالی باشی نا ایتدی نه ظلم لر بابامون
او حالی سالدی منی آه و زاره گیزلت دیم
نه حاله قالدیم او احوالی غیظیله بیردن
اَلین آتاندا او بی دین فَناره گیزلت دیم
نجه یانوب اورگیم بر مَلا او یانماقیمی
آغاج ووراندا لبِ زَخمداره گیزلت دیم
گوگل ده داغدان آغیر نسگلین غریب آتامون
یانان اوُرک ده آپارّام مَزاره گیزلت دیم
وورولدی ریشهء نخلِ حیاتی مه تیشه
یتیشدی صدمه بُنِ اِختیاره گیزلت دیم
دور ایمدی جان وِیرورم گور تدارکُون بُول دوم
مَکان خرابه دی بو غَم دُچاره گیزلت دیم
خانم شَمادت اوُدوندا منِ (شعاع) یاندیم
سالانمادیم اونی دلدن کَناره گیزلت دیم
منیم ده باغریمی قان اِیتدی طَعنهء اَغیار
ولی پناه آپاروب اِصطباره گیزلت دیم
دئدیم سیزه توخونار دردیمی دیسم دئمیوب
بو غربت ئولکَه ده هر بی وِقاره گیزلت دیم
توجّه اِیله عَلاج اِئت او دَرده کی بولوسن
آچیق دینمه دیم ایتدیم اشاره گیزلت دیم
- شنبه
- 20
- شهریور
- 1400
- ساعت
- 16:3
- نوشته شده توسط
- یوسف اکبری
- شاعر:
-
حاج غلامعلی شعاع
ارسال دیدگاه