ویرانسرایه ویردون عجب خوش صفا بابا
ایتدون بوخسته گوگلومی غمدن رها بابا
چوخداندی انتظاریده قالمیشدی گوزلریم
یاخشی گلوب بو دردیمه ایتدون دوا بابا
مشگلدی انتظاریده قالماق بو مدّتی
خاصه بیزیم کیمی اولا بی اقربا بابا
الله بیلور خرابه ده من چکمیشم نه لر
گوندوزلریم اولوبدی گوزومده قرا بابا
سن بیزدن آیریلاندان ایا شاه تاجدار
اولموبدی سن کیمی بیزه بیر هم صدا بابا
عمّم چکوبدی چوخلی اذّیت بو مدتی
اولموش همیشه بیزلره درد آشنا بابا
چوخ گورمسین بوجمعه خدا زینب عمّمی
چونکی اولوبدی اهلی وه مشگل گشا بابا
دشمن ووراندا قمچی قولون حایل ایلیوب
قویموبدی اهل کین بیزه قمچی وورا بابا
گر عمّم اولماسیدی بو مدتده وار یقین
چوللّرده اولدورردی بیزی اشقیا بابا
گاها طعام سهمینی تقسیم ایدوب بیزه
چوخ گونلر آج قالوب یمییب دور غذا بابا
شهلر چخاندا سیره علمداری لن چخار
بس سنله گلمیوب نیه صاحب لوا بابا
چوخدان دوشوبدی گوگلومه شهزاده قارداشیم
سویله گوروم هایاندا دور اول مه لقا بابا
گلماقیوی بولیدی اگر خسته قیزلارین
پیشوازیوه چیخاردیلا دلده نوا بابا
ویر بیر اجازه لبلریوین قانینی سیلوم
گوزیاشیم یله زخمی نه ایلوم دوا بابا
الله گوروم یزیدین عذابین چوخ ایلسون
وورموش ندن دوداقیوه بیله یارا بابا
گر زحمت اولماسا گوزون آچ بیرده باخ منه
تا ایلیوم او بیر باخیشا اکتفا بابا
وار دور یقین کی قالمارام الّم خرابه ده
قال بوگیجه اوزون منه ساخلا عزا بابا
بیرده منیم غمی مده عزا ساخلیانلاری
لطف ایله قویما حشریده آغلار قالا بابا
(رزاقی) دا بو نیّته درگاهه اوز قویوب
ایستور آدی قاپوزدا یازیلسین گدا بابا
- شنبه
- 20
- شهریور
- 1400
- ساعت
- 16:27
- نوشته شده توسط
- یوسف اکبری
- شاعر:
-
ستار رزاقی
ارسال دیدگاه