شامدن گلدیم خدایه شکر اولا قارداش حسین
قسمتیم اولدی دوباره کربلا قارداش حسین
واردی دنیاده مگر بوندان گوزل بیر آرزو
باجی قارداش قبرینه اشگیله ویرسون شستشو
دویمارام قبروندن اصلا مدفنِ روحیم دی بو
قبریوه اولسون قُوری جانیم فدا قارداش حسین
هاردا وار باغِ جناندا بیله عالی منظره
بوتهء گل تک اوُشاخلار صف چکوبله یکسره
یوزلرین هر چند سیلی دوندروب نیلوفره
وار ولی ذاتی طراوت مطلقاً قارداش حسین
ای ویرن ذُوق کمالی له تمیز خوب و زشت
گور بو قبرین عطری خوش دور، یا گلستانِ بهشت
فرش ایدوب زلفین بو قبره بیر نچه حوری سرشت
سایهء طوبادی گویا بر ملا قارداش حسین
اولما رنجیده گیدنده کربلادن شامه من
سن اوزون گوردون امان ویرمردی اَشرارِ زمن
یوخسا قویمازدیم سنی توپراقلار اوسته بی کفن
گون اوینده جسم ده سان سیز یارا قارداش حسین
سن ایکی دریا یانندا تشنه لب اولدون قتیل
منده قلام قبرون اوسته گوز یاشین سو تک سبیل
ایلرم جاری فَرات اوستنده نهرِ سلسبیل
تا فَراتی شَط غم دَن قان اولا قارداش حسین
ایندی که یوخ فُوج دشمن، قبریوه قربان اولوم
دول میوب نامحرمی له سر به سر ساق و صُولوم
وِیر اجازه قبرون اوسته باش آچوم بیر ساچ یولوم
آغلیام وِیرمزدی مُهلت اَشقیا قارداش حسین
کوفه ده ایستردیم اوّل بولمه سُونله من کیمم
اولمادی ممکن، بولوندی زینبم زَهرا شیم
من نئجه یاندیم نئجه بیر حالته قالدیم او دَم
نه بیلر بیگانه، آنلار آشنا قارداش حسین
ایستدیم حقّ اوسته مقهور اولماقیم اولسون ثبوت
آتشین بیر نطقی له وِیردیم او دَم امر سکوت
باشلادیم بیر خطبه دلده نام حَیِّ لایَموت
کوفه ده یاد اوُلدی نِطق مرتضی قارداش حسین
سنده گوردون غم هجوم آور اولوب از بس منه
اودلی سوزلر دیلده یاندیم، یانمادی بیر کس منه
آیهء کهفی له ویردون نُوکِ نِی دن سس منه
نخلِ طور اولدی منه نُوک جدا قارداش حسین
هیچ یادیم دان چخمیوب چخماز بو مطلب روز و شب
گوردی اطفالون پریشان کوفیانِ بی اَدب
غفلتاً وِیردی بیر عورت بیر قیزا نان و رُطب
وِردی کلثومه خبر اَمر قضا قارداش حسین
قارداشی عباس تک غیظِ تمامی له ازَل
بو اَسَفلی حاله باخدی حیرتیله ماحصل
ورمیون سویلوب بالالار نان و خرمایه سیز اَل
گور نه گونلر گوردی آلِ مُصطفی قارداش حسین
شرحه گلمز مجلسِ اِبن زیادین محنتی
بو قدر وار مایه خجلتدی ذِکرِ صحبتی
وار یادوندا منده گوردون تا او پُوزقون حالتی
گوزلرون یُوم دون گوزیم ده ای ضیا قارداش حسین
بیر گئجه یولدا قوناخ گیتدی کلیسایه باشون
گویدن عیسانی گتوردی دِیر ترسایه باشون
وِیردی بیر توضیح نَسخِ دین عیسایه باشون
راهبه اولدی بو یولدا رَهنما قارداش حسین
شامده چوخ کوچه و بازاری گزدوخ هر طرف
وای یَهودی کوچه سندن صبریمی اِیتدی تلف
غُرفه و بامه کلیمی لر دوزولدی صف به صف
ایله بیر کوچه ها را زینب هارا قارداش حسین
بی سبب سَجاد اِیتمز داد ظلمِ شام دن
اِنتقام آلدی یَهودی ملتی اِسلام دن
توکدیلر بی شَرم رولر اوُدلی نِیلر بامی دن
اوُد دوتوب عَمامهء زین العبا قارداش حسین
گر دئسم قوردی یزیدِ بی حَیا بزمِ طَرب
خدمتونده چوخ جسارت دور اولور ترک ادب
باخ حیایه، اوُچ اِمامُون محضری نده بی سبب
باشلادی بی دین کلامِ ناسزا قارداش حسین
چوخ سوال ایتدی اوشاق لاردان یَزید بی حجاب
بیر قیزون اما او شُومه وِیردی بیر کافی جواب
ایله بیر مجلس ده بیر قیز بیر شهی ایتسون مُجاب
وار یقین بو ایشده بیر سِرِّ خدا قارداش حسین
آدینی قویموشدی ظالم پیشوای مُسلمین
خلقه اولموشدی پیغمبر مَسندی نده جانشین
نَهی اِیدوب پیغمبر اَمرین نه بولوب مَذهب نه دین
نه اوتاندی نه ایدوب حقّدن حَیا قارداش حسین
ایستدی اشیاخِ بدره سندن آلسون اِنتقام
اَل آپاردی خیزرانه دلده نالایق کلام
گوزلرین یوم دی سکینه سس چکوب قزلار تمام
گتدی درده عترتون بو ماجرا قارداش حسین
باجی قارداش لقدی نیلیوم گور اوُلور اُلفت کسم
یوخسا گلموردی یوزوم گلماقه، وار حَقّیم دِئسم
خجلتیم چوخ دور بو توزلی قبریوه اولسون قسم
ئولدی یولاردا نئچه خوردا بالا قارداش حسین
بیر قیزون اما خَرابه شام ده شام و سَحر
آتشین آهیله یانمش قلبی مه سالدی شَرر
شام اوُلاندا هر گِئجه آلدی سنی مندن خبر
نه دییدیم ایله وقته من اونا قارداش حسین
گورمیوب دنیا گوزی ایله ادب لی بیر اوشاق
گزله دوردی آجلقین ایلردی اِظهار فَراق
طاقتِ کلثومی اما بیر گِئجه ایتمشدی طاق
نه دیمشدی من اونی بولدوم صُورا قارداش حسین
بیر گِئجه چرخ صبایادن باتوب بیر اوُلدوزون
غصه می ایلوب نِجومِ چرخ اطلس دن فزون
وای منه ویرانه یِرده ئولدی بیر نازلی قیزون
چوخ موُثر وِیردی جان اوُل مَه لَقا قارداش حسین
بیر نفر یوسف آدنلی سِیّد عالی نَسب
هم بیزه اولّاد هم صاحب عزا دور روز و شب
اوُچ مریضه بش نمازنده شَفا اِیلر طلب
قلبینی سیندیرما لطفاً وِیر شَفا قارداش
بیرده بیر عهد ایلیوبدی (شانیمیز) (خوشخوانیله)
ایستوری وِیرسون او عهدی باشه سالم جانیله
وِیر شَفا ایسته تمامی آرزو مندانیله
قبریوه گلسون سنه دوتسون عزا قاداش حسین
- شنبه
- 20
- شهریور
- 1400
- ساعت
- 17:0
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه