اولدی حسینه مَنزل او گُونکه بَلا یری
قالمادی یر یوزونده داخی بیر صَفا یری
جشن و سُرور اولوندی وِلا اَهلنه حَرام
دولدی غم و ملالیلن اَهلِ وِلا يرى
بیجا دولانما ير يوزون اِی دِل خوش اولماقا
يوخ ير یوزنده عشرت اوچون بیر بنا یری
نه قالدی گُل صَفاسی و نه ذُوقِ عندلیب
غم چولقادی تمام خوش آب و هَوا یری
فصلِ بهار اولیدی نه ای کاش آچیدی گُل
نه گُل گیاهیلن دوشَنِیدی قَرا یری
نه گلستان اولیدی نه گلشن نه جورِ خار
نه عندلی به گلشن اوُلیدی نَوا یری
گورسن آچوبدی قرمزی گل باخما یوم گوزون
قاره گیوبدی فاطمه وار دور حَیا یری
گُل ایستسن اورک گوزون آچ کربلایه باخ
بیر طُرفه گُلستانه دوُنوب کربلا یری
نه کربلا، که خرمنِ گل دور معاینه
گلگون اولوبدی قانیله، یوخ بیرجه پا یری
تازه گلین قولاقی اولوب پاره بولمورم
قاندور داموبدی گل گل اولوبدی بَلا یری
یا اللّرین خَضاب ایلمیشدی حنائیلن
داماد اَلين يوووب بویویوبدی حَنا يرى
قیل کربلا دیارینه یا فاطمه نظر
گُور بیر اولوب او چول نجه بیر ماجرا یری
باش سیز جنازه لر توکولوب قوملا اوستنه
قربانیلن دولوب دیه سن بس مِعنا يرى
گُور سينّن اوُسته یاتماقا ناز ایلین بدن
مأوا ایدوبدی بی کفن و بی رَوا یری
سِیر سعادت ایله یرین گور شرافتين
اَشرفدی عَرشیدن دیولّه، يوخ خطا یری
پیغمبر اوغلینون جسدين باسدی باغرينا
اَلبتّه آرزو ايدوب اوُلدَم سَما یری
الله قانیدی قانی حسینون، آخوب یره
اِکسیرِ اعظم ایتدی او خونِ خدا، یری
وار دور اورکده دردون اگر کربلایه گیت
يوخ ير يوزنده بیر ایله درده دوا يرى
چون تربتِ حسینده قویموش شَفانی حقّ
حقّ بین گورر حقیقت او یر دور شفا يرى
بیمارِ کربلا قيدن وقته شامیدن
قصد ایلدی بو فکریله اوُل پُر بها يرى
باشلا او يرده ایلیه بیر چاره دردینه
تاپدی طیبِ حاذق اوچون اِلتجا یری
سالدی اوزون او مَرقدِ ششگوشه اوُستنه
اولدی بالایه زینتِ آغوش، آتا یری
گویا بو دللّريله بیان ایتدی حالینی
بیمار خسته ام ایده سن وار عَطا یری
مَجروح اوُلوبدی ساقلریم بسکه اِیپ کسوب
بوینومدا واردی ایمدیده طوقِ جَفا یری
دور قوى اليوی ياره مه بلکه شفا تاپا
چوخ انجيدور منی باباجان بو یارا یری
قان ایلیوبدی باغریمی شامین مُصیبتی
بر باد اوُلیدی کاش او مُصیبت فَزا یری
بیر بی حیالیق ایلدی شامون جماعتی
واضح گتورمرم دله یوخدور اَدا یری
اما بیزی گورنده هامی کف چالوردولار
دوتموشدی چرخی غلغله هم بو صدا یری
هر ستمتيدن گلوردی صدا خارجی گلور
آلِ عَبايه هیچ یوخودی بیر رَجا يرى
عورت اوشاق کیشی هامی آچمشدی ظلمه اَل
جور و جفاده قویمادیلار اِنتها یری
دولدوردولار اَتکلرینی بعضی داشیلن
هر گونه ظلمه گورودوله بیزه روا یری
آلِ عبانی شامده بیر گون غروبه تک
گزدیردیلر بو نَحويله هر ناسزا یری
ایلردی بیر مُنادی نِدا رهگذارده
ای فرقهء یهود يتوب مُدّعا یری
آلِ علی گلوبدی گَلون اِنتقام آلون
هر گونه اِنتقام آلاسوز یوخدی لا یری
پیغمبر اَهل بیتی یهودی محلّه سی
قان آغليا بو نکتيه وار مُرتضا يرى
شام اولدی، اهل شام يتوب استراحته
اولدی خرابه گوشه سى آلِ عَبا یری
نه چَکمشوخ خرابده عرض ايتمرم بابا
گوردون کسیک باشیله او ویرانسرا يرى
ویردی رقیّه آج و سوسوز جان خرابه ده
اولدی خرابه گوشه سی اوُل مُبتلا یری
قالدى جنازه سی قوری یر اوُسته بیکفن
ایتدی گوزومده جلوه بابا کربلا یری
سالدی سنی خياليمه یاندیردی قلبمی
معناده گتدی درده بو غم برملا، یری
چوخ مشگل اولدی شامیده دشمن شَمادتی
هیچ یرده گورمدوخ ايله بيحد جفا یری
بر باد اولیدی قصری یزیدِ ستمگرین
اول گونکه اولدی آلِ شهِ اوُلیا یری
قولار طنابه باغلی بویونلاردا سلسله
باخسان قالور طنابلرین جابجا یری
پیغمبر عترتین ایله گورجک یزیدِ دون
گورموردی وَجددن او لعینِ دَغا یری
باشون گوروب قباقدا آچوب دل شَمادته
گوردی قصاصِ بدره عجب اِقتضا یری
آلدی او بيحيا اله بیر چوبِ خیزران
وار لبلرونده باخمادی تیرِ بلا يرى
گیتمز جزا گونونده بو زحمتلرون هدر
وار دور (شهاب) هر عمله بیر جزا یری
یاز نوحه آغلا، نوحه نی زَهرا خانم سوور
علّت بودی که خوشدور اونا هر عزا یری
- یکشنبه
- 28
- شهریور
- 1400
- ساعت
- 15:44
- نوشته شده توسط
- یوسف اکبری
ارسال دیدگاه