زَهرا قیزی آیریلدی مَزار شُهدادن
غم قافله سی دوشدی یولا کرب و بلادن
مَحملده سالوب باشلارینا قاره حَرمَلر
گئتدوق جا شتر زنگی حسین وای سسی سسلر
کُلثوم باسوب سینیه عبّاس عَلمینی
لِیلا آلوب آغوشه عَلینون کَفنینی
بیردن دئدی قزلار بی بی گُورسندی مَدینه
زینبده حسین پیرهنین آلدی اَلی نه
سسلندی او بیکس خانم اِی شِبه پیمبر
گَل عمّووی پیشواز ایله گلدیم علی اَکبر
غم قافله سی دوشدی بیابان آراسیندا
زینب اورگی لَجّهء طُوفان آراسیندا
مَحملدن اَنَن وقته او بانوی مُطهر
همیشه دوشوردردی عَلمدارِ دِلاور
بیر باخدی ساقا بیر صُولونا اوُلدی پَریشان
بس هاردا قالوبسان دئدی قُوللّاریوه قربان
سس وِئرمدی عَباس گُلوب سینه سی دَرده
اَندی یِره مَحملدن اوتوردی قُوری یِرده
اون یِدی جوانیله گِئدن وقتیده گِئتدیم
قُویدوم هاموسین تُوپراقا آواره قِیتدیم
ئوز شهرینه زوار چاتاندا اوُلی راحت
چاووش آچار پَرچمینی تا آلا خَلعت
چاووشِ علی اِبن حسین اِبن مُحمد
زحمت کش و سر قافلهء عترتِ اَحمد
بیر قاره علم آچدی نَواسی اوُجالاندی
تا گلدی سرا پَرده قباقی نده دایاندی
تُوپراقه ئوزون یخدی او چاووشِ مُحبت
زَهرا قیزی زینبدن او دَم اِیستدی خَلعت
سالدی اَشاقا باشین او خاتونِ قیامت
دنیا مالی یوخ گوردی خانم چَکدی خَجالت
سسلندی او غم دیده بَلالی باشیم اِی وای
اِی وای جَلالی پوزولان قارداشیم اِی وای
چون شامیده آلمیشدی خانم بیر نچه غارت
گوندردی همین غارتی چاووشی نه خَلعت
چاووش آلوب باخدی پَریشان اوُلوب اَحوال
قِیتردی او دَسمالی خانم زینبیه فی الحال
عَرض اِئتدی نه شمرم نه سَنانم سیزه قربان
اطفالِ حسینی اِیلیم ظلم یله تالان
دنیا مالی من اِیستمورم آلِ خدادن
لطف ایله اَگر اوُلسا لباسِ شُهدادن
من قَبره گِئدنده آپاروم مُوسمِ رِحلت
اوُلسون منه مَحشر گُونی اَسباب شَفاعت
تئز دوردی خانم گوزلرینون یاشینی توکدی
بیر تُحفه گوتوردی او همین بقچیه بُوکدی
گوندردی بَشیره دئدی چوخ دور اوُنا قیمت
آلدی اَله چَکدی گوزونه قیلدی زیارت
حس اِیلدی تیترور اوُرگی درده دوا دور
الله گوره سن هانسی لباسِ شُهدا دور
گوزدن توکُولوب یاش نِجه که بوقچانی آشدی
ناگه گوزی بیر قرمزی دَسماله ساتاشدی
رنگی ساری دور قرمزی قانه بویانوب دور
اَما اِیکی یِردن دَگوب اوخ پارچالانوب دور
هی باخدی توکُوب گوز یاشینی رَنگی سارالدی
گلدی او قَضایانی خانم دان خبر آلدی
حضرت دِئدی باخسون تانی نور اوخ یاراسیندان
آلدیم اونی شِشماهه بالانون آناسیندان
(منعم) دور آدیم عَرصهء ماتم چَمنیم دور
هر یِرده حسین وای سسی گلسه وَطنیم دور
بو قاره نَقدری دِیریّم پیرهنیم دور
ئولسمده آغیر داشلارون آلتدا کَفنیم دور
- یکشنبه
- 28
- شهریور
- 1400
- ساعت
- 17:4
- نوشته شده توسط
- یوسف اکبری
- شاعر:
-
مرحوم منعم اردبیلی
ارسال دیدگاه