ساقیا دور گتور بُو بَزمه شَراب
غم دوتوب گوگلومی بیر اِیله ثَواب
موسم گُلدی آل أله بیر جام
قورگیلان بَزم عِیشه بیر اَنجام
نئچه مُدّت دی همدمّم غمیلن
منی قویما بو غملی عالمیلن
اِیله بو مرده گُوگلومی اِحیا
دولانوم باشیوا من رُسوا
منه اوُل باده دَن سن اِئت اَلطاف
ویرار عالم همیشه اوندان لاف
اِیچمین آنلاماز نه لذّتی وار
بو مَجازی دِگیل حقیقتی وار
اولسا هر کیمده بو مُحبت دَن
نه غمی وار اونون قیامت دَن
گتو بیر باده اِیله حاله منی
چون سالوب راوی بیر خیاله منی
نقل اِئدیم بیر حَدیث روح اَفزا
طوطی طَبع چون اولوب گویا
گوش اِئدون بو حَدیثه خورد و كُبار
اِیلیوم بنده بو زَمان اِظهار
بیر گون اوُل پادشاهِ جِن و بَشر
خاتمِ اَلانبیا شَهِ مَحشر
اِئوده دوتموشدی شُوقیله آرام
ناگهان گوردی چون او فَخرِ اَنام
بیر یَهودی یتیشدی با دلِ زار
یا مُحمد سنه بیر عَرضیم وار
بویوروب اوُل دَم اَحمدِ مَحمود
ندی دردون دِئدی او شاهه یَهود
بودی عَرضیم منیم سنه شاها
منیم اولماز عَیالیم هئچ اَصلا
قویموشام مایه بی حَد و بی مَر
اولمیوب نَفع چون به غیرِ ضَرر
سن بو گون گر پیمبر حقّ سن
یِر یوزونده رَسول مُطلقّ سن
اِیسته وِئرسون خدا منه اولّاد
اِی اولان اَصل باعثِ اِیجاد
اِیلرم عهد ای شهِ دوران
گتورم صدقیله سنه اِیمان
نه اوزوم من بو چشمِ پُر نَم ایلن
بلکه شاها هامی قَبیله م ایلن
بُول بُونی دونمَرَم بو نیّت دَن
گئچرم جمله مال و دولت دَن
ائشیدوب بو سؤزی او شاهِ جهان
بِئله وِئردی جواب اونا یاران
گِیت بوگُون صبح وقتی گل تا من
سنه قیلّام دعا یَقین اِئله سن
سنه خالق یَقین وِئرور اولّاد
چوخ مَلول اولما اوُل گیلان دِلشاد
قاییدوب اوُل یَهودی قلبی سُرور
گوردی چونکه اَله گلور مَنظور
اوُل یَهودی گِئدوب رَسول مُبین
گوروب اِئتدی نَزول روح الَاّمین
عَرض قیلدی او شاهه چون جِبریل
آی اوُلان کُل کایناته دَلیل
بویورور خالقِ زمین و سَما
اولماز اوُلادی انتسون او دعا
اوُل زَماندان که خلق اوُلوب اِیجاد
یوخدی نسلینده چون بونون اوُلاد
اِئشیدوب بو جوابی فَخر اُمّم
اوُلدی دلتنگ سِید عالم
فکر اِئدردی بونی شَه کُونین
اوُل زَماندا گَلوب اِمام حسین
گُوروب اوُل شاهی اوُزگه حالیلن
خاطرین غصه و مَلالیلن
عَرض قیلدی بابا حقَّ سُبحان
نیه مأیوس اوُلموسان بو زَمان
من گورنمّم سنی مُکدّر سن
دِئگیلن گر حسینی اِیستر سن
بویوروب اِی اوُغول بو دور مَطلب
وَعده اِئتدیم یَهودیه او سَبب
صبح اولاندا اونا دعا اِئلیوم
اونی من غصه دَن رَها اِئلیوم
اِیمدی حُکم اِیلیوب خدای جَلیل
من دعا اِئتمیوم دِئدی جبریل
عَرض قیلدی او شاهِ بی لشگر
حُکم اِئدوب اِی بابا سنه داور
من دعا اِیلرم چوخ اوُلما مَلول
بلکه اِئتسون خدا بو عَرضی قَبول
اِئشیگه چیخدی شاهِ تَشنه لَبان
تا دعا اِیلسون اوُنا یاران
وار یِری شیعه توکسه گوز یاشین
سِیّدی چون حسین آچا باشین
نازل أولدی أو دَمدَه پِیک خدا
عَرض اِئدوب مُصطفایه یا مولا
قویما آچسون باشین اِمام حسین
مُستجاب اوُلدی اِی شَهِ کُونین
آچسا باشین حسین شَهِ عالم
بُول بُونی کاینات اوُلور برهم
دَیدی دل شیشه سینه داش گینه ده
یاده دوشدی همین بو باش گینه ده
اولا بیر باشی کی بو حُرمت یلن
اونی کَسسونله یِدّی ضَربت یلن
زِینبِ بی نَوانی یاندی رالار
او باشی نیزه دَه دُولاندی رالار
مگر اوُل باش دَگیلدی خُولی اونا
وِئردی کُول اوُسته مَسکن و مأوا
او باشین مُحنتینده دل دُول دی
کُوفه ده بیرده سَنگسار اوُل دی
شامه زِینب گِئدوب او باشی لَن
گوردی زِینب وورالّا داشی لَن
نیزه دَه گُوردولر اوُخور قرآن
اونی اِئتدیله قانی نه غَلطان
شِمر اوُل باشه چوخ جَفا اِئتدی
بَزم اِبنِ زیاده هم گِئتدی
مَجلس شادیانه قوردی یَزید
او باشا خِیزران ووردی یَزید
یِتمز اوُل باش مُحنتی باشه
هر بلا یِتدی آخر اوُل باشه
اِی خداوند قادر و غَفّار
به حقَّ آبروی هَشت و چهار
جُمله حُضّاره سن خدای قَدیم
حَشرده قسمت اِیله خُلدِ نَعیم
هر قَدر وار مُحبِّ آلِ رسول
اوُنی مَحشر گونونده قویما مَلول
(دلریشون) جرمی چوخدی یا ذُوالمَنّ
اوُنی عَفو اِئت به حقَّ شاه زَمن
- یکشنبه
- 28
- شهریور
- 1400
- ساعت
- 17:9
- نوشته شده توسط
- یوسف اکبری
- شاعر:
-
مرحوم مشهدی اصغر دلریش
ارسال دیدگاه