بو سُودان سن اِیچمه قارداش بو سُو قسمت دور منه
شمر دون خنجر دَمنده ساخلیوب دور سُو سنه
اِیچمیشم من بو سُودان اَحشا و اَکبادیم یانار
سن منه باخما حسینیم اولما بی صبر و قرار
اِیستسن بیر سوئیله اولسون اِیکی دل داغدار
بیر مُصیبت چوخدی زِینب تک بلاکش بیر زنه
بیر سُو اِیچدیم اُود دوتوب اُودلاندی جانیم مو بمو
قویمادی قارداش بو سُو قالسون سُولاردا آبرو
نه یوزیله جان وِئرن وقته سنه باخسون بو سُو
اولماسون بیر بیله سو قارداش گوروم قسمت سنه
سُوزشِ قلبیم دُوداقی مده اِئدوب اِیله بُروز
آشکارا دور اؤرکده واردی نه اَندازه سُوز
سن بئله سُو اِیستمه اوُچ گونلریله قال سُوسُوز
تشنه لب جان بَذل اِیله دینِ خدای ذُوالمنه
گُورموسن بیر سُو سالوب نه زَحمته قارداشیوی
باخ منیم اَحوالیمه یان آغلا تُوک گوز یاشیوی
شمردَن سُو اِیستمه قوی کَسسون عَطشان باشیوی
بیر سُودان اؤتری دل آچما زادهء ذِی الجُوشنه
بو همان ساعتدی که جدّیم او فَخرِ کَائنات
اِئتدی فرمایش اوزی مخدوم کُلِّ مُمکنات
سبز اولور اوغلوم حسن رَنگ رُخی حِین مَمّات
دوندرَر زَهر جَفا رَنگِ جَمالین سُوسَنه
گر چه بو حالیم سنه قارداش حسین نسگلدی چوخ
لِیک صَبر اِیله هَله جسمّده زخم تیر یوخ
نِیله سن وورسا عدو تابوت اِیچینده یِتمیش اوخ
اوُندا سن قویما اَبُوالفضلیم اَل آچسُون دشمنه
ظلمده بولَّم ائِله طُغیان اِئرد قومِ دَنی
قویماز آخر دَفن اولام جدّیم جِوارینده منی
دِین مه صَبر اِئت حقّیمه وِئرّم قسم قارداش سنی
جسمّی دَفن اِئتماقا قِیتَر بیر اؤزگه مَدفَنه
من حسین ئولّم دوتار بُو آلِ هاشم یاسمی
قویما چوخ فریاده گَلسون آغلاسون عَباسیمی
جان کیمی آغوشه چَک عبدالله یله قاسمی
سن بُولورسن هر اِیکیسی مهجهء دل دور منه
گر چه من بیر دستِ بی دادین بو گُون مَسمومیم
خانمانیم دَه اؤزوم اؤز اَهلی مون مَظلومیم
بیر گُونون وار دور سنون من اوُل گُونون مَغمومیّم
وار یِری آخسا بو حالیمده سِرشگیم دامَنه
بیر نفر اوُلماز ئولنده سن گُوزیوی باغلاسون
شمر قویماز زِینب مَظلومه سینه داغلاسون
باشون اوُسته باش آچوب بیر جه دُویون جا آغلاسون
نَعشون اَطرافنده گَلسون اَهلِ بِیتون شیونه
سندَن اَل چَکمز جَفادن سانما ظلم اَهلی دویار
باشوی عَطشان کَسر حتی لباسونده سُویار
کهنه بیر پیراهن اوُسته پِیکرون عُریان قویار
من، آنام، جدّیم، آتام یانّوق هَمان پیراهنه
(عاصیا) دین الهینی همیشه دُوت عزیز
وِئر هر اَعَمالونده حقّ و باطله دَلدن تمیز
تابعِ حقّ اول وَلو دوغرانسا جسمون ریز ریز
چَنگ وورما هئچ بیر اِیشدن اؤتری باطل دامنه
- یکشنبه
- 28
- شهریور
- 1400
- ساعت
- 17:19
- نوشته شده توسط
- یوسف اکبری
- شاعر:
-
مرحوم حسن عاصی تبریزی
ارسال دیدگاه