آرام جانیم اِی شَه بَطحا حسینیم
مَسموم اِیدوب قارداشیوی اَعدا حسینیم
قارداش غمینده صبر اِیله قارداش آز آغلا
سن آغلاسان آغلار آنام زهرا حسینیم
بیر عمر اوُلان آفاقیده غم آشناسی
سالدی داخی دلدن منی چرخین جفاسی
بیر بیله درده دوشموشم یوخدور دواسی
قالموب وجودیمده داخی یارا حسینیم
هر تیرِ غم گلدی منی اِیتدی نشانه
دُوز دوم دایاندیم گلمدیم اَصلاً فغانه
آگاه سن یوخ حاجتی شرح و بیانه
نه ظلم لر اِیلوب منه اَعدا حسینیم
هر لحظه قلبیم آتشِ آلامه یاندی
اوُج اِیلیوب آهیم اودی عرشه دایاندی
داغلار کیمی بو سینمه غملَر قالاندی
یوز وِیردی هر دم مُحنت عُظما حسینیم
ای هر مُصیبتده منه یولداش آز آغلا
توکمه عذاره بیر بیله قانیاش آز آغلا
آغلاتما جان اوُسته منی قارداش آز آغلا
اِی گُلشن غمده گُلِ زیبا حسینیم
اِی مُجتانون دَهریده جانِ عزیزی
اوُلما فراق اَیاّمّونون چوخ اَشگریزی
قویما اَبوالفضلیم چِکه شمشیرِ تیزی
غیضه گله اوُل فارِسِ هیجا حسینیم
مانع اولالّار دَفنی مه بو قوم اَعدا
مندن وَصیّت دور سیزه صبر اِیتماق اَمّا
بو اَمره راضی اوُلمارام من قارداش اَصلا
دفنیم دن اوُتری اُولسا گر دَعوا حسینیم
اَشرارِ کینه ظلمه بیر شَورا قورلّار
تیر و کمان اَلده گلوب یکسر دورلّار
کین اوُخلارین تابوتیمه قارداش ورولّار
مَجروح اُولار مَسموم اوُلان اَعضا حسینیم
حقّدَن مُقّدر دور یقین اَهل حقیقت
هر دوریده گورسون گرک دور چوخ مُصیبت
من باشه وِیردیم عهدیمی تاپدیم فراغت
غملر ولی قالدی سنه تنها حسینیم
اوُلموش اَزل گوندن مَشیّت اِقتضاسی
سالسون منی دلدن عَدو زَهرین جفاسی
اَمّا سنون وار باشیوین بی حَد بلاسی
اِیلر او عالَم صبریمی یَغما حسینیم
گر چه منه مَدفن دِگُول جَدّیم جَواری
بیر شهریده واقعدی قَبریم له مَزاری
اَمّا سنه مَدفن اوُلار غُربت دِیاری
بیله ازَلدَن ثَبت اوُلوب طُغرا حسینیم
من گر چه دوزدوم دَهریده چوخ اِبتلایه
اَمّا دوشر باشون سنون بی حَد بلایه
اَمرِ قَضا آخر چَکر کَرب و بَلایه
اوردا قوپار بیر مَحشر کُبرا حسینیم
سانما جَفادن اَهل کَین قارداش دُویالّار
قلبِ جهانی تیر ظلمیله اوُیالّار
صد چاک اوُلان گُل جِسموی عِریان قویالّار
آغلار سنه دنیا و ما فیها حسینیم
(هوشی) بیزه بیر عمر دور نوحه سُرا دور
پَر سُوخته پروانهء شَمعِ عَزا دور
درگاهیوه اُمّیدیله گلمیش گدا دور
لطف اِیله اوُلسون عِزّته دارا حسینیم
- یکشنبه
- 28
- شهریور
- 1400
- ساعت
- 17:39
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه