شیعه مُوسم عَزا دور شُوقیله گَلون نَوایه
آغلیون شَهیدِ زَهرِ ظُلم یعنی مُجتبایه
مُصطفایه هم رِضایه
سر به سر دوتوب جَهانی مُحنت و مُصیبت و غم
آخرِ صَفردَه گویا غرّهء مه مُحرّم
آشکار اوُلوب اُفقدان شیعه لَر دوتوبلا ماتم
هم بو اوُچ بُزرگواره هم شَهیدِ کَربلایه
بیر گُونه دوشوب بو آیدا حَضرتِ رِضا وَفاتی
رِحلتِ رَسول اَکرم بیرده مُجتبا وَفاتی
چونکه جامعِ مَصائب اوُلدی مُصطفیٰ وَفاتی
خَتم اوُلوب بو اوُچ وَفاتین ختمی خَتمِ اَنبیایه
هر بیریسی اؤز یِئرینده چوخ بُویوک مُصیبت اوئلدی
اِبتدا غُروبِ شَمسِ مَشرقِ رِسالت اوُلدی
یِر یوزونده آشکارا شُورشِ قیامت اوُلدی
کَعبه تک مَدینه اَهلی سر به سر باتوب قَرایه
ساقیَّ زَمانه لَبریز اِئتدی ساغرِ بلانی
زَهریله اِئدوب ازَلده تَلخکام مُجتبانی
گوردی ساغرینده باقی زَهردَن قالوب نشانی
ساخلیوب گِنه او زَهری وِئردی عاقبت رِضایه
دوُغریوب جگرلرینی پاره پاره زَهرِ مأمون
اِحترامیله همان گُون نَعش پاکی اوُلدی مَدفون
بو قَضیه دَن پیمبر، فاطمه اوُلوب جگر خون
نه کَفن نه غُسل اوُلوندی نورِ چشمِ مُرتضایه
گَر حسن جَفای سَمّ جَعده اِیله اوُلدی مَسموم
قارداشی حسین تک اَمّا اوُلمادی سُودان که مَحروم
یِکّه و فَرید و تنها بیکس و غَریب و مَظلوم
نه مُعین اوُلوب نه یاور اوُل غَریبِ نِینوایه
کاش او وَقتینه حسینین شیعه لَر اوُلیدی قربان
کیم یارالی پیکریله دوشدی قُوملّار اوُسته عَطشان
وِئرمیوبله سُو سُوسوزدان اَلعَطش دِیوب وِئروب جان
بیر باخون جَفا و جُورِ کُوفیان بی وَفایه
ئولدوُروب سُوسوز او شاهی سُو یانندا قومِ اَعدا
هم لباسی هم اَساسی خیمه گاهی اوُلدی یَغما
دست بَسته و شِکسته ناقه اوُسته آلِ طاها
کُوفه دَن اوُلوب رَوانه شامِ شُوم پُر جَفایه
شمر نَقل اِئدر حسینین حَلقی نه قُویاندا خَنجر
فاطمه بالاسی گُوردوم خود بخود تَکلّم اِیلر
اِیلدیم گُمان که نَفرین اِیلوری منه او سَرور
گُوردوم اِیلیوب توجه بارگاهِ کِبریایه
عَرض اِئدر خدا بو شمرین خَنجری بو حَنجریم دور
بو منم بو کَربلانین قُوملاری بو پِیکریم دور
بو سنون یُولوندا قربان اَکبریم بو اَصغریم دور
عَهدی مه وَفا من اِئتدیم راضیم هامی قَضایه
شَک یوخ وَفا اِئدن سن سنده وَعده وَه اِلهی
آغلیانلارین حسینه هر قَدر اوُلا گُناهی
عَفو قیل منه باغیشلا هم (حقیرِ) روُسیاهی
وار اُمیدی اَهلِ بیتِ خاندانِ مُصطفایه
- دوشنبه
- 29
- شهریور
- 1400
- ساعت
- 14:34
- نوشته شده توسط
- یوسف اکبری
ارسال دیدگاه