زُورق طَبعیم دوشوبدور غملرین دریاسینه
هم قلم هم دفتر آغلور ماتمون عُظماسینه
سیّد اولاد آدم بستر موته دوشوب
تب اثر ایلوب رسول اَکرمین اَعضاسینه
باغلیوب بار سفر گویا مسافردور گئدور
آیریلیق رنگی دوشوبدور صورت زیباسینه
اَلرَّحیل آهنگینی گویا چالور ناقوس غم
رَحمتُ الِلعالمین ایستور گِئده مَاواسینه
ساق طرفده آغلیور پیغمبره مظلوم علی
صول طرفده فاطمه دَم وِئردی واویلاسینه
پای پاده سَس سَسه قوشدی حُسینیله حسن
آغلاشولّار یان یانا درد و غمین معناسینه
زحمتیله گوز آچور طاها اِئو اهلین آغلادور
گَه باخور شیرخدایه گَه باخور زهراسینه
فاطمه بی تابیدور هجرانه یوخدور طاقتی
حسرتیله گوز تیکوب پیغمبرین سیماسینه
بیرده خَتمُ المُرسلین آچدی اوزیبا گوزلرین
منتظردور هرباخان اول حضرتین اِیماسینه
زحمتیله اِئتدی فرمایش حُسینیم هاردادی
مُشتریدور سینَم اوستی جَنّتون آقاسینه
چَکدی آغوشه حسینی اِئتدی فرمایش اودَم
صابر اول بو چَرخون ای گُل بیوَفا دنیاسینه
آغلاما سن آغلیاندا آغلاشور اهل سَما
آهون اود سالمیش بو چَرخون گنبد میناسینه
آغلیار عالم سنه ، سن آغلاما آرام جان
طاقتیم یوخدور بو لَحنون سوزش آواسینه
خامَه بیردَه حاشیه آچدی بو یِرده مَطلبه
سوز سوزی گَتدی یتیشدی مَقتلین غوغاسینه
یا رسول الله حُسینون آهینَه سن دوزمَدون
بیر گون امّا آسمان اهلی اَنوبدور یاسینه
نِیلَدی کَرّوبیان اوغلون دوشنده مَقتله
نالیَه گلدی فَلَک بو عالمون مولاسینه
بیر طرفده ظُلمت مَحض ایستیور نوری یخا
بیر طرفده نور مُطلق رَحم اِئدور اَعداسینه
نیلَدون عَمّامون اَلده یا رسول الله اوگون
اوندا که قاتل چیخوبدور سینهء سیناسبنه
ظالمین تیغی اَنوب تِزتِز حُسینون حَلقینه
نیلَدی گور تیغ عُریان بوسه گاهِ یاسینه
فاطمه آلدی اَله مَعجر یوموبدور گوزلرین
اِئتدی اُمَّتدن شکایت رَبّیَ الاَعلاسینه
عرض اِئدوبدور باراِلها دَن دَن اولدی گُللریم
تَک تَکی ناز اِیلیوللَر جَنّتون طوباسینه
بو حُسینیم تشنه لب گِیدی شهادت جامَه سین
تشنه دور دنیا سویی لَعل لب حَمراسینه
(نادرا) وقت سحردور دور گِنه سَجّاده سال
سن سوزی یازدون صبور اول حضرتین اِمضاسین
- دوشنبه
- 29
- شهریور
- 1400
- ساعت
- 14:40
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه