جانه گلوب دِل هجردن دیدارِ جانان آختارور
رَنجورِ عشقِ یار دور وَصلیله درمان آختارور
بلبل کیمی اِیلر نوا جور و جفای خاریدن
سر گشته چون پیکِ صبا صحنِ گلستان آختارور
تا شُعلهء رخسارینه یانسون یتشسون کامنه
پروانه تک هر لحظه دِل شمعِ شبستان آختارور
جامِ شراب لَعلینی خضره نشان وئر اِی گُوگُل
گورسن دِلِ ظلماتده گر آبِ حیوان آختارور
ترصیع اولا تا سا تکین اِیستر اوُپَه لَعلِ لَبین
اِیتسون فزون تا رونقین یاقوت و مرجان آختارور
دِل گل کیمی پژمرده دور جان جسمدن آزرده دور
دِل دلبر اِیستر هر زمان جان وَصل جانان آختارور
طورِ تَجلا دور جهان یوخ درکنه گوزده توان
بو نوری تا گورسون عیان دِل پُورِ عمران آختارور
تا دردین اِیتسون چاره دِل سرّین دِیسون دلداره دِل
بیچاره دِل آواره دِل شاهِ خراسان آختارور
حقّ نوری هر شام و سحر آفاقی دوتموش سر بسر
بو نوری اَمّا بی بَصر هر لَحظه هر آن آختارور
سویله دولانما عالمی اِیله خراسانه گذر
اوُل کس که اَنوارِ حقی هر گوشه هر یان آختارور
اِی حُجّتِ رَبّ الفَلق وی میزبانِ ماخلق
خوان نوال جودیوی سر گشته مهمان آختارور
هر کیمسه بیر اُمّیدیله درگاهیوه گلمیش شَها
شَه آستانینده گدا گُسترده بیر خوان آختارور
عالملره سن سن رَجا قبرون جهانه مُلتجی
بو قبری دلده اِلتجا اَربابِ حرمان آختارور
تنها نه خاکِ مدفنون زائر اِیدر کَحلِ بصر
قبرون طوافین شوقیله گردونِ گردان آختارور
گر چه تُرابِ مَرقدّون مُهرِ نماز اولموش ولی
بو بُقعه دَن هر اَهلِ دل مُهرِ سلیمان آختارور
صحن و رواقون منظری خُلده دِیمم وار بنزری
قبرون صفا و جلوه سین فردوسِ رضوان آختارور
حُولِ حریمون خاکینی اَشكیله اِیستر پاک اِیده
ابر بهاران من کیمی گر چشمِ گریان آختارور
گلدستهء درگاهوه اِیستر طراوت آرتیرا
چشمِ سحابیله فلک تقطیرِ باران آختارور
دور اِیلوری گردونی ده قُرصِ قَمر تا صبحدم
گویا طوافِ قبریوه هر لَحظه اِمکان آختارور
مین جان اولا اولماز شَها بیر دَم بهای وصلتون
بیجا دِگول نِطقُون دِئسم آیات قرآن آختارور
شَمع جَمالون جلوه سین اِی نورِ وجه كِبریا
اَفواجِ اَنجم سهلدور خورشید و کِیوان آختارور
اِیله عنایتله نظر هر کیم قویوب یوز قبروه
دَرمانده دور آشفته دور لطفونه سامان آختارور
زَهرا آنان جانی رِضا نُومید قِیترمه شَها
بو آستانه هر گلن توقیعِ درمان آختارور
سن بحرِ جودِ لَم یَزل، چون قطره زائر بی بَها
اوز رأفتون شامل اولوب تا قطره عُمان آختارور
وصفون فراتر ذکردَن مدحون فزونتر فکردَن
توصیفوه درمانده دل بُولمم نه عُنوان آختارور
گر چه غبارِ درگهون بالِ ملائک پاک اِئدر
اَمّا منیمده گوزلریم جاروی مُژگان آختارور
بو رُوضه نون هر چند وار مینلَر خوش اِلحان بلبلی
اَمّا باجون معصومه تک مُرغِ خوش اِلحان آختارور
اوغلون فراقینده سنون حالون حکایت اِیتماقا
صَحنِ گُلستاندا سَمن زُلفِ پَریشان آختارور
آگاه سن اَسراره سن بو آستانه هر گلن
سندن برات مدفنِ شاهِ شهیدان آختارور
هر چند واحد نور سوز آگاه سوز اَمّا اوزون
سیراب وَصلوندن اولان سلطانِ عطشان آختارور
(عابد) کیمی حاجت اَلین آچموش (فغانی) و (على)
هر تک تکی بو قَبردن مین گُونه اِحسان آختارور
- دوشنبه
- 29
- شهریور
- 1400
- ساعت
- 14:43
- نوشته شده توسط
- یوسف اکبری
- شاعر:
-
محمد عابد
ارسال دیدگاه