تاپوب نجات اِئله کی اَهلِ بیت زنداندان
کناره چخدیلا اوُل شهرِ شامِ وِیراندان
اَسیرلر اولوب آزاد یوزلرینده نقاب
نه وار اَیاقیده کُنده نه واردی قولدا طَناب
اوُتوردی اَهلِ حرم قاره پوش محمل دَه
هره سینون نچه برجَسته داغی وار دِلده
او حاجیانِ مصیبت کشیدهء اَیام
قرا لباسیله مِنایه باغلیوب اِحرام
قدم قدم یِریور ساربانی چوخ سنگین
عَزا نواسی اِیله سسلی دور دَوَه زنگین
اوزنگی لر سسی نه توقّوشور حَزین سسلر
ایکی سسون سسی بیر دَفعه یاحسین سسلر
دیارِ کرب و بلا اِیچره بانوانِ حریم
مطافِ شاهِ شهیدانه اِیتدیلر تعظیم
مدینه سمتی نه یول باشلادی قطارِ بلا
همان قراریله طِىّ مَنازل اِیتدیله تا
قالاندا بیر نچه فَرسَخ مدینه گورسندی
یانان اورکلره بیردن غبارِ غم اَندی
اِمام مُفترض اَلطاعه قافله سالار
وِئروب اِجازه او دم کاروانی ساخلادیلار
وُورولدی بیر اوجا خیمه یِئره به رَسم عَرب
گئچوب او خیمهء مَخصوصه اَگلنوب زینب
اِمام عابدِ بیمار او سیّدِ رَنجور
بشیری اِئیلدی شهرِ مدینیه ماُمور
گئدوب مدینه دَه خُرد و کُباره چَکسون جار
گلور عراقه گِئدن کاروانِ مُحنت بار
بو فکریلن که چیخان وَقته شهرِ یثربدن
چیخوبدی عمه سی زینب جَلال و شُوکتلن
گرک مراجعتی کُوچمگه مثال اوُلسون
اولاندا داخلِ شهر اوُزگه بیر جَلال اوُلسون
بشیر اَمرِ اِمامت له اَلده قاره عَلم
اوزی قَرا گینوب شهر اِیچی نه قویدی قدم
اِمامون اَمرینی شهر اِیچره اِنتشار اِئلدی
او گُوزلری که گُوزتلردی اَشکبار اِئلدى
دیلی دییوردی گُوزی آختاروردی صاق صَولونی
گوزتلیوردی اَبُوالفضلون اوُغلنون یولونی
رِموز محنتی بیربیر آچوب عیان اِئتدی
حسین آدین دِیمدی زینبی بیان اِئتدی
که اِی مدینه نون اَهلی بیلون اوُلون آگاه
قریب شهرده چادر قوروبدی آل الله
گلور او بانوی عِصمت مریض اِمامیله
چیخون قباقلارینا عزّ و اِحترامیله
نئجه گیدنده یولا سالمیش دوز عزّتیلن
ورود شهر اِئلیون غایت جَلالتلن
او زینبی که گئدوب تخت زرنگاریلن
گلور مدینه سینه تیره روزگاریلن
گئدنده گئتمیشیدی دودمانِ اَعلادن
ولی چیخوب گلور اِیندی خرابه ماُوادن
آپاردی وِئردی مِنادَه فَدالرین گلدی
چَکوبدی کُوفه و شامون بلالرین گلدی
سالاردی محملی سایه او چرخِ دَوّاره
فلک کجاوه سینون اوُرتوگون اِئدوب قاره
گیدون اونی گتورون وار خجالتی گلسون
آناسی فاطمیه وار اَمانتی گلسون
هر اول خانم که او خاتونی اِیلیور پیشوا
یُولوق یُولوق اِیلسون ساچلارینی پای اَنداز
طَعام و سُو آپارون پیشوازه فرصت دور
او خورداجا بالا قیزلاری طَعامه حسرت دور
آپارمیون قباقا شیر خواره طفل لری
دِگُل یانیندا ربابون او طفلِ صُود اَمری
اَدب گُوزتلیون آخر عَروسِ فاطمه دَن
گلین لره قباقا چیخماقی اِیدون قَدَغن
چوخ اِحترام اِیلیون اکبرون آناسینه
فلک قویوب اونی حسرت جوان بالاسینه
هیچ اِیستمزدی گوره لیلی دَهری اکبر سیز
او بینوا نئجه گورسون بو شهری اکبر سیز
پیامِ قاصدی شهر اَهلی دَرک اِیدن ساعت
اوجالدی عَرشِ بَرینه صدای وا مُحنت
مدینه شهرینون اَهلی تمام خُرد و کُبار
اوشاق بویوک هاموسی شهردَن اولوبلا کنار
عموماً اَگنی نه گئیمیشدی جامهء ماتم
بشیر قباقه دوشوب دور اَلینده قاره عَلم
یاخون لاشاندا هامی بارگاهِ اُردویه
نقدر عورتیدی آیرلوبدی بیر سویه
حسین حسین سسی اِئیدی عُروج نُه طاقه
او طول راهده زُلفلر توکُولدی پراقه
خلاصه سوز یازورام طُوله کِئچمسون مَطلب
قیامت اِئیدی همان وَقتیده خانم زینب
مدینه اَهلی حسیندن منه قالان تَرَکات
گتورمیشم سیزه بیر قانلو کوینگی سُوقات
آچوب او کُوینگی سردی اِیکی دِیزی اوُسته
آلوب زیارت اِئدن قُویدی اوز گُوزی اوسته
غرض مُقدمه نی سوز یتوردی بو اَمره
سوزون دالین دِیمورم اِختیاری وِئر صبره
واریدی مَحضرِ زین العباده بیر دسته
رجالِ شهردن امّا هامی ایاق اوُسته
حضورِ پاکِ اِمامتده باش اَگوب ناگاه
جنابِ جعفرِ طیارون اوُغلی عبدالله
اِجازه اِیستدی محرم سرایه بیر گِئتسون
عیالی زینبه تا تَسلیت اَدا اِئیسون
به امرِ حضرتِ زین العباد وَلیّ الله
مقامِ زینبه یوز دوندرویدی عَبدالله
دوروب کنارده گوز یاشینی روان اِئیدی
جنابِ زینبون اوز آدینی بیان اِئیدی
سلام اولا سنه اِی بنتِ مُرتضی زینب
رشیدهء عَلوی مظهرِ حَیا زینب
یارالی قلبوه بو جانِ ناتوان قربان
اِئشیدمیشم سنی ظلمِ عَدو سالوب جاندان
حضورِ زینبِ عُلیایه بو صدا یتدی
جوابینی او سلامون خانم اَدا ائیدی
خَمیده قامتیلن آهی لن ملالی لن
کناره چیخدی خانم خیمه دَن نه حالی لن
او خیمه سمتی نه دقتله اِیلینده نگاه
بیر عُورتی نظری نه گتوردی عَبدالله
قَرا لباس گیوب باشدا بیر قَرا مَعجر
او مَعجر آلتدا ساچین گیزلدوب او غم پَرور
سالوب اَشاقه باشین اوُندا علتی وار دور
بیله مشخص اوُلور که خجالتی وار دور
گیرنده زینب او زُلفی قَرا آپارمشی دی
مدینیه قیدنده او زُلف آغارمیشی دی
کمان کیمی بوکُولوب قَد و قامتی اَگیلوب
جمالی نه دییه سن رَنگِ زَعفران چکیلوب
قیافه سینده پَراکنده دور چوخ اَحوالی
اِئله ضعیفدو یوخدور تانین مالی حالی
تانیمادی دِئدی اِی عُورتِ غم آلوده
هانی علی قیزی خاتون ماتمِ آلوده
او بانوی حرمی اِیستورم اِیدم دیدار
حسین غمینده اونا تَسلیت اِیدم اِظهار
چکوبدی ضجهء جانسوز حضرتِ زینب
زَمانه گور منی سالمیش نه صورته یارب
گُوروم خَراب اوُلاسان اِی سپهرِ سُفله نواز
رَئیس خانه عَیالین باخار گُورر تانیماز
بو کَلمنی او خانمدان ائشیتدی عَبدالله
تعجب یله دِئدی لا اِلهَ اِلّا الله
حسین عراقه گیدنده جَلال و حشمتی لَن
هاچان سنی یولا سالدیم خانم بو حالتی لَن
او گُون او زینبی که سالمیشام یولا من اوُزوم
او زینب اوُلسون اگر کُور اولا گُورونجه گُوزوم
منی باغشیلا که یوخ منده ذَرّه ای تَقصیر
بیر اِیلده کیم گوروب اوُلسون رَشیده عُورت پیر
نه باعث اوُلدی بیله قامتون کَمانه دونوب
خانم دِئدی خبر آلما علی چراغی سُونوب
بیر اِیلدن آرتوق اولور روزگار کَج رفتار
توکُوبدی اوُستومه دنیاده هر مُصیبت وار
قیریلدی کَرب و بلاده هامی جوانلاریم
گتورمیشم اوزیمیله بو دور قالانلاریم
اِیکی بالاندا سنون قانینه اولوب غَلطان
دِئدی اوُلاردا اوُزومده حسینوه قربان
آغارماسون نئجه باشیم اِئشیت ندور مَطلب
او هِندون اوُغلی دِئدی کَلِّمنی یا زینب
اَلونده (یحیوی) بو کَلمه دَه دایاندی قلم
کِفایت اِئله داخی بوندان آرتوق اِیتمه رقم
- دوشنبه
- 29
- شهریور
- 1400
- ساعت
- 15:6
- نوشته شده توسط
- یوسف اکبری
- شاعر:
-
حاج عباسقلی یحیوی
ارسال دیدگاه