یا رَب نولور خزان دولانا نو بهار اولا
دنیا یوزی بهشت کیمی لاله زار اولا
بادِ بهار اَسه گُلی گُلشنده گُل دوره
بلبل عزیز و خُرم اولا خار خوار اولا
یِر فرش اولا گیاه زُمرد نمائیله
برگِ گل اوسته صنع خدا آشکار اولا
صحرا و دشتی لالهء نُعمان بَزَندیرَه
نَرگِس باخا شقایقه چشمی خمار اولا
زاغ و زغن فرار اِیلیه مرغ زاردن
قمری مکانی سروده بیر شاخسار اولا
گُلشنده یوز یوزه قویا گُل عَندلیب یله
بلبل کنارِ گُلده یاتا کامکار اولا
رَحمت سحابی یاغدیرا بارانِ مشگ بیز
عالم نسیم رَحمتیله مُشگبار اولا
اشگیم کیمی روان اولا سُو جویباردن
سرو و صنوبرِ چمنه آبیار اولا
یعنی اِمام عصر گله گُل یوزین گوراخ
فصلِ خزان محبّلره نو بهار اولا
گُل صورتین نشان وِیره دنیانین اَهلنه
گُللّر او گُل جمالی گُوره شرمسار اولا
من عاشقم پیمبره بنزر جمالی نه
عاشق گرگدی طالبِ دیدارِ یار اولا
یا رَب اِمام عصری ظهوره مُجاز اِیله
قویما بو منتظرلری چوخ انتظار اولا
دنیانی روشن ایلیه نورِ جمالِ حقّ
تابنده نور ظلمتِ پروردگار اولا
غاصبلرین خلافت اَلندن چخا بو حقّ
حقّ صاحبی وَلیّ حقه واگذار اولا
پیغمبرین اُو اَمرینی اجرا ایده اِمام
فرمان روا او خسروِ گردون مدار اولا
کرب و بلاده کی توکولن قانلاری آلا
آلوده خون دشمنیله ذوالفقار اولا
ارثیه دور علیدن او مولایه ذوالفقار
فرزند ده گرک آتادان یادگار اولا
- دوشنبه
- 29
- شهریور
- 1400
- ساعت
- 15:49
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه