تعالی الله جانسان يا كه جانان يا رسول الله
اولوب دور خلقتنده، خلق حيران يا رسول الله
كمالِ خلقتون خلقتده اولموش خلقته عنوان
اولوب لولاكه بو عنوانه بُرهان يا رسول الله
حريمِ درگهون اَفضل دی مين قصرِ سليماندان
قاپوندا مورِ مسكين دور سليمان يا رسول الله
ديانت مُلكونون تختنده سلطانِ مؤيّد سن
كه عدلیندن مشيّد كاخِ اِيمان يا رسول الله
قالار كنجِ لبینده بارماقی گر گورسه حسرتدن
يقين مِهرِ جمالون، ماهِ كنعان يا رسول الله
حريمِ بارگاهِ لطفيوه اِجلال و عزّتده
سزا دور رشگ اِئده موسی ابن عمران يا رسول الله
وجودون علّتِ غائی اولوب دور كُون و اِمكانه
تاپوپ فيضِ وجودوندان جهان جان يا رسول الله
كرم درگاهی سان بير كیم سه مأيوس اولميوب اولماز
قاپوندان كافر اولسون يا مسلمان يا رسول الله
گدادور بابِ احسانندا مين لر حاتمِ طائی
سنون تك يوخ عطا مُلكونده سلطان يا رسول الله
گونش قنديل ايوانين دی، آی شمعِ شبستانين
فلك بزمون، مَلك بزمینده، دربان يا رسول الله
بلا هنگامه سنده فيضِ لطفون ايلدی امداد
خليل اللّهه اود اولدی گلستان يا رسول الله
قدم تا رنجه قيلدون عالَمِ امكانه، هيبتدن
ييخيلدی قصرِ خسرو، اولدی ويران يا رسول الله
مُبرّادور خلايق مدحتندن شرحِ اوصافون
سنون وصفینده بس آياتِ قرآن يا رسول الله
بهشتين فكرين اوّل آتموشام باشدان كه عشّاقه
حريمِ درگهون دور باغ رضوان يا رسول الله
ندن يا للعجب، بيلمم قالوب حيرتده عالَم لر
يتوردی اهلِ ظلمی كامه دوران يا رسول الله
او درگه كه مَلك اذن آلمينجه داخل اولمازدی
ووروب اود ظلميله يانديردی دونان يا رسول الله
كمالِ خجلتيمندن ديل بيانِ شرحه قاصردور
نه ظلم ائتدی قيزون زهرايه عدوان يا رسول الله
ياناندا ظلم اودوندا درگهی بيلمم نلر چكدی
خديوِ ملُكِ عرفان، شاهِ مردان يا رسول الله
رياست گوزلرين توتدی، خدايه اولدولار طاغی
جفادن ائتديلر دنياده طغيان يا رسول الله
گلستانِ وفايه كينه دن يول سالدی كركس لر
ترانه اولدی بلبل لرده افغان يا رسول الله
جفادن پايمال اولدی گُلِ گلخانهء توحيد
پوزولدی ظلم اليله باغِ عرفان يا رسول الله
غَرَض عرض ارادت دور، بهانه ائتموشم شعری
اميد ِرحمتونله الده عنوان يا رسول الله
گدادنده گدادور درگهونده بينوا (شبخيز)
ترحّم ايله، قيل مشمولِ احسان يا رسول الله
- دوشنبه
- 29
- شهریور
- 1400
- ساعت
- 16:0
- نوشته شده توسط
- یوسف اکبری
ارسال دیدگاه