یازام ایستیرم هر الین سوزون گلور ابتدا سنون اللّرون
یازا بولمرم الیمه اگر کمک اولماسا سنون اللّرون
یتور ابتدای کلامیده کسوک اللّرون الیمه ائله
که منیم سطوح کلامیمه وئره ارتقا سنون اللّرون
یتور اللّرون الیمه سوزی ائله باشلیوم ایله قورتاریم
ائدیم ایله عرض ادب سنه که اولا رضا سنون اللّرون
صاق الون مصیبتینی و یا صولوون حکایتینی یازوم
نجه یاردیلار باشووی نجه یره سالدیلا سنون اللّرون
سنون اللّریوی بابان ندن آلوب اللّرینه وئرنده جان
اوپوب اللّرون دوتوب اوز گویه ایلدی دعا سنون اللّرون
اوپوپ اللّریوی بوعلّته که جهانیانه بولون دوره
ندی ارزشی نه مقامی وار شه لافتی سنون اللّرون
سنیله حسینی وئرن زمان بابان ال اله نیه آغلادوز
دیین اولمادی ولی تئز ایدوب اونی برملا سنون اللّرون
الیوی حسینون او ساربان کسن اللّر اوسته قویاندا سن
اونون اوّل اللّری تیتردی دئ گوروم و یا سنون اللّرون؟
اگر اهل محشره امر اولا هامی اللّرین گویه قؤزیا
هامینین الیندن او گون فقط گوروشر اوجا سنون اللّرون
یره پرچمون او زمانیدن که دوشوب کنار فراتیده
گینه ده نسیم صبا اسور ائدوری صدا سنون اللّرون
کیم اونی فرات کنارینه گوتوروب وروب دئیه لر منه
دیرم باجون وروب اَل ولی یتوروب اونا سنون اللّرون
ایلییوبله نقش علملره کسوک اللّرون بو دور علتی
گئده کیم حسینون عزاسینه اولا رهنما سنون اللّرون
نه قدر معابر شهریده ورولوبدی سبز و سیاه علم
اولاری حسین آدینا ووروب هامیسین آقا سنون اللّرون
تاپا بیرمریض شفا اگر او کسه شفانی خدا وئرر
ولی خلق بیله دییَر ویروب او کسه شفا سنون اللّرون
بو کفایت ایلر او اللّره که گوروب دوشوب یِره اللّرون
یره دوشدی قویدی یوزون اؤپوپ شه کربلا سنون اللّرون
سنون اللّرون نه ادبلیدی سو الونده تشنه اولا اولا
بوشادوب سووا سووا ایتمدی اوگون اعتنا سنون اللّرون
کیم ایده بولردی او جرأتی ویرا خیمه گاه ربابه اود
یره سالماسیدی او گون کی گون اگر اشقیاء سنون اللّرون
سالوب اوّل اللّریوی صورا باشیوی بو علّته یاردیلار
که باشون یاراسینا قویماقا داخی اولمیا سنون اللّرون
سنون اللّرونده نه وار سنه بالالار سو مشکینی ویردیلر
دیوب العطش ایلموردولر نیه بس رها سنون اللّرون
اورگینه قویدی بو نیّته الیوی رقیّه سَرینلسون
اورگی بولوردی فراتیده دگَجاق سووا سنون اللّرون
بوقدر گناهیله (گلشنی) اگر ایسته سه اولا تبرئه
عرصات حشرده تک اونا ایدر اکتفا سنون اللّرون
- دوشنبه
- 29
- شهریور
- 1400
- ساعت
- 16:56
- نوشته شده توسط
- یوسف اکبری
- شاعر:
-
حاج محمد گلشنی
ارسال دیدگاه