ای دُخت علی نائبهء عصمتِ کبری
شأن و شرف و غفّتی آیینهء زَهرا
سن سن او خانم که آدیوی حینِ وِلادت
پیغمبره ابلاغ ایلدی خالقِ رَحمت
یعنی که بو قیز دور آتاسی حیدره زینت
شایسته دی زینب اولا زینِ اَبَه دارا
سن سن او خانم که گلِ گلزارِ وفاسن
سن عزّت و وقر و شرفِ شیرِ خداسن
سن گوهرِ پُر قیمتِ دریای حیا سن
زیرا که آنان فاطمه دور عصمته دارا
سن سن او خانم که اونی تقدیر ایدر عالم
وار مدرکی اثباتی نه چوخ قاطع و محکم
ذلّتدی آتایه قیز اگر چه اولا مریم
بیر سن بیر آنان فاطمه دور لیک مجزّا
سن سن او خانم که اوجادی اوجِ خیالون
هر عصرده تابنده دی خورشیدِ جمالون
ناچاردی مستلزمِ ترقیم جلالون
استبرق اولا صفحه قلم شاخِ طوبی
سن سن او خانم که ینه مسحوریدی دنیا
سن سن دُرِ نابِ صدف عصمتِ زَهرا
شخصیّتوه غبطه ایدر هاجر و سارا
محتاجِ غبارِ قدمون دیدهء حورا
سن سن او خانم که ایلیوب خالقِ داور
مین رمزِ وفا صفحهء رویونده مُفَسَّر
زیبنده دی عشقون اولا عشق اهلی نه رَهبر
اَنوارِ محبّت ایلیوب سنده تجلّا
سن سن او خانم که نَقَدر یتدی مصیبت
ابراز ایلدون مین او قَدَر صبر و شهامت
ایتدون او شدائده حسینی له شراکت
حیراندی سنون قوّتِ قلبونده شَکیبا
سن سن او خانم که هامی اسراردَن آگاه
سجّاد وجودیله او یالقوز یارالی شاه
تاپشوردی سنه قیزلارین ای دُختِ یَدالله
کافیدی سنون صورتِ عشقونده بو معنا
سن سن او خانم که سنه واضح هامی مُعضل
تا اُلدی حسین اولدی سنه امر مَحَوّل
هر بیر قیزا غارتده دیدون قاچما قیزیم گل
خون ریزیدی خون خواریدی بو لشگرِ اعدا
سن سن او خانم که هامونی حیرته سالدون
هر سس واریدی کوفه دَه بر وَهله ده آلدون
الله اوزی عالیم دی که نه حالته قالدون
تا گوردون او گُل یوزده کُول آثاری هُویدا
سن سن او خانم که سنه عزّتدی اِسارت
مرجانه نین اوغلی ایلین وقته جسارت
بیر سن ایلدون سیّدِ سجاده حمایت
قتلیندن ایدوب صرف نظر استمدی ایذا
سن سن او خانم که شررِ عشقیله یاندون
گلدی نه بلا راهِ محبّت دَه دایاندون
ظاهرده اگر ناقه ده شاماتی دولاندون
معناده ولی ایلدون اوز عهدیوه اِیفا
سن سن او خانم که سنه محتاجی دی عالم
(خوندل) سیزه منصوبی دی ای بانوی اَعظم
ذیحقِ دی بو منظوریله فخر ایلیه هر دَم
صدق ایتسه اگر بو سوزون حقّینده او رُویا
- سه شنبه
- 30
- شهریور
- 1400
- ساعت
- 19:54
- نوشته شده توسط
- یوسف اکبری
- شاعر:
-
حاج حیدر خوندل
ارسال دیدگاه